2 Kolinito 3:12 - Tokelauan New Testament

¹² Ona kua ia te ki mātou he fakamoemoe vēnei, kua maua ai e ki mātou te loto mālohi.

2 Kolinito 3:12 ပူးပေါင်းရင်းမြစ်များ

Ioane 10:24

kae ōmamai nā tino Iutaia kua fakapotopoto fakatāmilo ia te ia ma fehili vē mai ki ei, “He ā te mataloa ka mumuni ai pea e koe te meamoni mai ia te ki mātou? Kāfai ko koe ko te Mehia, taku hako mai la ki a te ki mātou!”

Ioane 16:25

“Nae fakaaogā e au nā talafakatuha ke fakailoa atu ai ki a te koutou nā mea iēnei. Kae e hau te taimi ka hē toe kō fakaaogā ai nā talafakatuha, kae ka fakaaogā te gagana faigōfie ke tautala atu ai au ki a te koutou, e uiga ki te Tamana.

Ioane 16:29

Oi lea atu ai ki ei ona hoko, “E hako, ko koe kua tautala mai nei i te gagana faigōfie, kae kua hē fakaaogā e koe nā talafakatuha.

Gāluega 14:3

Na mataloa te taimi na nonofo ai nā apohitolo i kinā. Nae hē mātataku lele oi tautatala e uiga ki te Aliki, tē kua ia fakamāoniagia te moni o te lā fekau e uiga ki tona alofa tūnoa, e ala i te mana na ia tuku akea ki a te ki lāua ke fai ai nā vāvega ma nā mea ofoofogia.

Gāluega 4:13

Na ofo nā tino o te Taupulega ki nā fakamatalaga a Petelu ma Ioane ona ko te hē mātataku, kae maihe lava i te ki lātou iloaga ko te toka lua tēnei e hē ni tino e lauiloa pe na akoakogia. Oi hāfia ai e ki lātou ko te toka lua tēnei nae ni hoa e o Iehu.

Gāluega 9:27

Kae na fehoahoani ia Panapa ki a Haulo, ma na ia kavea ke feiloaki ma te kau apohitolo. Na fakamālamalama e ia ki a te ki lātou te kiteaga e Haulo o te Aliki i luga o te auala, ma te tautalaga o te Aliki ki ei. Na ia takua foki ki a te ki lātou te hē mataku o Haulo oi tālaki i te igoa o Iehu, ki tagata i Tamaheko.

Gāluega 9:29

Na ia folafola foki e uiga ki a Iehu Keliho ki nā tino Eleni e tautatala i te gagana Iutaia ma nae fai a lātou fefīnauakiga, kae na taumafai lava ki lātou ke tāmate ia Haulo.

1 Kolinito 14:19

Kae i nā faigālotu, e hili atu toku tautala i ni kupu e lima e mafai ke mālamalama ai, kae ke akoako ai iētahi tino, i lo toku tautala i ni kupu e hefulu afe i he gagana kehe.

2 Kolinito 10:1

Ko au ko Paulo, e aioi atu ki a te koutou i te igoa o Keliho, tē e agamalū ma agaalofa. Ko au tē e lea nā tino, e matamuli ma loto maulalo kāfai e fakatahi ma koutou, kae loto hāuā kāfai e i hētahi mea.

2 Kolinito 3:11

Auā kāfai nae i ei he huhulu pupula i te mea e hēki tūmau mataloa, ka hē hili atu nei la te lahi lele atu o te huhulu pupula o te mea e tūmau ke pa ki te fakavavau!

2 Kolinito 4:13

I te tuhituhiga paia, na lea vē he tino, “Ko au na tautala ona ko au kua talitonu.” I te agaga foki lava tēnā e tahi, kua tautatala ai ki mātou ona ko ki mātou e talitonu.

2 Kolinito 7:4

Ko au e talitonu kātoatoa ki a te koutou; e lahi toku fāfia ona ko koutou. E ui i te lahi o nā fakafītāuli e feagai ma ki mātou, ko au e loto tele pea lava; ko au e fakatumulia i te fiafia.

Filipi 1:14

Kua kavea toku i te falepuipui ma mea e mautū ai te talitonu o te tokalahi o te kau uho Kelihiano ki te Aliki, ma ka ātili tupu ai pea to lātou fakamālohi ki te tālakiga o te fekau e aunoa ma he mataku.

Filipi 1:20

Ko te mea e fakamoemoe ma naunau lahi au ki ei, ke nahe i ei lele he taimi e fakahētonu ai taku gāluega, kae i taimi uma lava, kae maihe lava te taimi nei, ke tumu au i te loto toa, kae ke fakaaogā ai toku tagata kātoa ke maua ai he vīkiga mo Keliho, e tuha lava pe ola ai au, pe oti ai.

Kolohe 4:4

Tatalo la ke mafai au ke tautala i ni fakakupuga e mālamalama lelei ai ia tagata.

1 Tehalonia 2:2

E iloa e koutou ko ki mātou na pagātia ma fakamahiahi e nā tino i Filipi ka ko hēki āhiāhi atu ai ki mātou ki a te koutou i kinā i Tehalonika. Ma e ui nae tokalahi e teteke mai, kae na fōki mai e te Atua te loto mākeke ke mafai ai e ki mātou oi fakailoa atu ki a te koutou te Tala Lelei mai ia te ia.

1 Timoteo 3:13

Ko nā tiākono e lelei te faiga o a lātou gāluega, e taku leleia ma fakaaloalogia, ma ki lātou mafaia oi tautatala mālohi, e uiga ki to lātou fakatuatua ki a Keliho Iehu.

Filemoni 1:8

Ona ko nā mea iēnei, e tatau ai ia te au, tō uho ia Keliho, ke fakatonu atu koe i nā mea e tatau ke fai e koe.