2 Kolinito 2:17 - Tokelauan New Testament

¹⁷ Ko ki mātou e hē vē ko te tokalahi o iētahi tino; e folafola e ki lātou te fekau a te Atua kae ke maua ai ni a lātou tupe; kae ona ko ki mātou na uga mai e te Atua, ko ki mātou e tautatala ma te fakamāoni i mua o te Atua, e ala ia Keliho.

2 Kolinito 2:17 ပူးပေါင်းရင်းမြစ်များ

Mataio 24:24

Auā ka ōmamai nā Keliho pepelo ma nā pelofeta pepelo; ka ki lātou faia ni vāvega uiga kehe ma ni mea ofoofogia ke fakahehē ai ia tagata, ke pa lava ki tagata kua filifilia e te Atua, pe kāfai e mafai.

Gāluega 20:20

E iloa e koutou e hēki kō tāofiagia lele he mea e fokotahi e aogā ki a te koutou, i aku akoakoga nae fai i mua tagata ma loto o outou kāiga.

Gāluega 20:27

Auā e hēki fakanofonofo lele au i te fakailoa atuga ki a te koutou, nā mea uma kua fuafua e te Atua ke fakataunuku.

1 Kolinito 5:8

Ke ki tātou fakamanatua la te Pāheka, i te falaoa e hēai he fefete, te falaoa o te fakamāoni ma te meamoni, kae hē ko te falaoa e i ei te fefete tuai o te agahala ma te āmio kino.

2 Kolinito 1:12

Ko ki māua e mafai ke fāfifia auā ko o mā lotofuatia e mamā lava. Ko a mā gāluega i te lalolagi nei, kae maihe lava i te va ma koutou, e fai lava ma te fakamāoni ma te loto mamā mai te Atua. Ko te mana o te alofa tūnoa o te Atua te mafai ai nā mea iēnei, kae hē ona ko he poto o te tagata.

2 Kolinito 1:18

E molimau te Atua fakamāoni, ko taku folafolaga na fai atu ki a te koutou, e hē he “Io” pe he “Hēai.”

2 Kolinito 11:11

Ko au nei e lea vēnei ona ko au e hē alofa atu ki a te koutou? E iloa e te Atua ko au e alofa ki a te koutou!

2 Kolinito 12:19

Ātonu pe ko koutou e vēakē ko ki mātou e fīnau atu mo ki mātou lava. Hēai! Ko ki mātou e tautatala lava e vē ko te mea e fofou ia Keliho ke tautatala ai ki mātou i mua o te Atua, ma ko nā mea uma e ki mātou faia, e mo te atiakega o koutou a mātou uō pele.

2 Kolinito 4:2

Kua tuku kehe e ki mātou nā uiga mātagā uma ma nā faiga fakalilolilo; e hē taumafai ki mātou ke fakahehē he tino, pe fakaliliu hehē te fekau a te Atua. E molimau te Atua ko ki mātou e tautatala oioti i te meamoni, ma ko te mea ia ka mafai ai ke talitonu mai nā tino ki a te ki mātou.

2 Kolinito 6:7

e ala i to mātou tautatala i te meamoni, ma e ala i te mana o te Atua. Ko ta mātou kaukupega ko te āmiotonu, e tau ma puipuia ai foki ki mātou.

Kalatia 1:6

Ko au e ofo ki te vave lele oi fulitua o koutou ki tē na kalagagia koutou e ala i te agalelei o Keliho, ma talia hētahi talitonuga e lea nā tino ko he tala lelei.

1 Tehalonia 2:4

Kae ko ki mātou e tautatala lava i te mea e fofou ki ei te Atua, auā kua uma te ia fakatagagia o ki mātou, ke tālakia te Tala Lelei. E hē taumafai ki mātou ke fai te mea e fiafia ki ei ia tagata, kae ko te mea e fiafia ki ei te Atua, tē e ia kiteagia nā mea i o mātou loto.

Tito 1:11

Ko nā tino iēnei e tatau ke tāofi, auā ko a lātou mea e fai kae ke maua ai ni a lātou tupe, ma e fakalotovāivai lele ki nā kau kāiga kātoa ona e fai e ki lātou nā akoakoga e hē tatau ke ki lātou faia.

Epelu 11:27

Ko te fakatuatua o Mohe te na ia tukua ai ia Aikupito. Na ia kiteagia te Atua lilo, ma na kavea tēnā ma mea e hēki mataku ai i te tōkahā o te tupu.

1 Petelu 4:11

Kāfai ko tau meaalofa ko te poto oi tautala, folafola te fekau a te Atua. Kāfai ko tau meaalofa ko te fehoahoani ki iētahi tino, tautua la ki iētahi tino i te mālohi e fōki atu e te Atua. Kae e tatau nā mea uma iēnei ke fai i he auala e maua ai he vīkiga mo te Atua e ala ia Iehu Keliho, tē e o ia te mamalu ma te mālohi ke pa lava ki te hēgata.

1 Ioane 4:1

Te kau uho pele, koutou nahe talitonu ki nā tino uma e lea e ia te ki lātou te Agaga, kae hukehuke lelei ma hakili ke koutou iloa pe ko te agaga e ia te ki lātou e mai te Atua. Auā e tokalahi ia pelofeta pepelo kua olo ki itū kehekehe o te lalolagi.

Iuta 1:4

Auā e i ei nā tino hē mātataku i te Atua kua ōmamai munimuni ki te mea e i ei ki tātou; nā tino e fakahehē e ki lātou te fekau e uiga ki te alofa tūnoa o te Atua, kae ke fai ai pea o lātou tuinanauga mātagā ki te tino. E teteke foki ki lātou ki a Iehu Keliho to tātou Matai ma to tātou Aliki e fokotahi. Kua leva te vavalo e nā Tuhituhiga Paia te fakahalaga e ki lātou maua.

Fakaaliga 12:9

Oi togi ai te tālako ki fafo — te gata mai te kāloā e fakaigoa ko te Tiāpolo, pe ko Hātani, tē e fakahehēa ia tagata i te lalolagi kātoa. Na togi ifo ki lalo ki te lalolagi, fakatahi ma ana agelu uma.

Fakaaliga 19:20

Kua puke fakapagotā te manu fekai fakatahi ma te kau pelofeta pepelo nae ki lātou faia ni vāvega mo te manu fekai. (Ko nā vāvega iēnei te na ia fakahehēa ai ki lātou kua i ei te fakailoga a te manu fekai, ma ki lātou nae ifo ki nā fakatuha o te manu fekai.) Ko te manu fekai ma te kau pelofeta pepelo kua togi ola ki loto o te vaitūloto o te afi mumū ma te teiō.

Fakaaliga 2:20

Kae ko tēnei te mea e hē fiafia ai au ki a te koutou: e hēai lele houtou teteke ki te fafine ko Iehapela, tēia e lea ko ia ko he pelofeta e a te Atua. E fakahehē e ia aku kaukauna e ala i ana akoakoga, ke ki lātou faia nā tuinanauga mātagā ki te tino, ma ke kakai ki nā meakai kua uma te fakatō mo nā tupua ta.