1 Timoteo 1:16 - Tokelauan New Testament

¹⁶ kae ko te Atua na alofa fakahao mai ki a te au, kae ke mafai ai ia Keliho Iehu ke fakaalia te kātoatoa o tona onohai ki a te au, te tino agahala e hili atu te kino, ke fai ma fakatakitakiga ki nā tino e talitonu ki a te ia i he taimi mulimuli, ma maua ai e ki lātou te ola e fakavavau.

1 Timoteo 1:16 ပူးပေါင်းရင်းမြစ်များ

Luka 15:10

E lea atu au ki a te koutou, ka fiafia lahi ia agelu a te Atua, ona ko he tino agahala e fokotahi kua halamō.”

Luka 23:43

Kua vāgana atu ia Iehu ki ei, “Ko au e lea atu moni ki a te koe, ko te aho nei ka fakatahi ai ki tāua i Palataiho.”

Luka 7:47

Ko au la e lea atu ki a te koe, ko ana agahala e lahi kua uma te fakamāgalo, ona ko te lahi o tona alofa kua fakaalia. Kae ko te tino e hē lahi ana agahala e fakamāgaloa, e hē lahi foki tona alofa e fakaalia.”

Ioane 20:31

Kae kua tūhia nā mea iēnei kae ke talitonu ai koutou, ko Iehu ko te Mehia, te Ataliki o te Atua, ma e ala i te koutou fakatuatua kia te ia, ka maua ai e koutou te ola fakavavau.

Ioane 3:36

Ko ai lava e talitonu ki te Ataliki, e ia maua te ola e fakavavau; ko ai lava e hē uhitaki ki te Ataliki, e hē ia maua te ola, kae ka tūmau i lalo o te fakahalaga a te Atua.

Ioane 5:24

“E takutino atu e au ki a te koutou te meamoni; ko nā tino e fakalogo ki taku kupu ma talitonu ki tē na ia uga maia au, ka maua e ki lātou te ola e fakavavau. E hē fakamahinoa ki lātou, kae kua teka atu ki lātou mai te oti, ki te ola.

Ioane 6:37

Ko nā tino uma lele e fōki mai e toku Tamana ki a te au, e ōmamai lava ki a te au. E hē kō tetekea lele he tino e hau ki a te au,

Ioane 6:40

Auā ko te mea e fofou ki ei toku Tamana, ko nā tino uma e ki lātou talia te Ataliki ma talitonu ki ei, e tatau ke maua e ki lātou te ola e fakavavau. Ma ka kō fakatutūa ki lātou ki te ola, i te aho mulimuli.”

Ioane 6:54

Ko nā tino e kakai ki toku kanofi ma inu ki toku toto, e maua e ki lātou te ola e fakavavau, ma e kō fakatutūa ki lātou ki te ola, i te aho mulimuli.

Loma 15:4

Ko nā mea uma kua tūhia i nā Tuhituhiga Paia, na tūhia ke akoako ai ki tātou, kae ke maua ai e ki tātou te fakamoemoe, e ala i te onohai ma te fakamālohi, e ki tātou maua mai i nā Tuhituhiga Paia.

Loma 6:23

Auā ko te totogi o te agahala ko te oti, ka ko te meaalofa fōki fua a te Atua, ko te ola e fakavavau, i te māfutaga ma Keliho Iehu to tātou Aliki.

1 Kolinito 7:25

E vē la ko te mea na tuhi mai ai koutou e uiga ki nā tino e hēki fakaipoipo: E hē ia te au he fakatonuga mai te Aliki, kae e kavatu hoku lagona, ma e mafai ke talitonu mai koutou ki a te au, ona kua fakaalia te alofa tūnoa o te Aliki ki a te au.

2 Kolinito 4:1

Ko te alofa tūnoa o te Atua kua tuku mai ai e ia tana gāluega ke fai e ki mātou, oi ko ki mātou e hē fakavāivai lele.

Efeho 1:12

Ko ki tātou la iēia na muamua oi tuku atu o tātou fakamoemoe ki a Keliho, keina tātou vīkia te mamalu o te Atua.

Efeho 1:6

Tātou viviki atu ki te Atua ona ko tona alofa tūnoa ma te meaalofa fōki fua mai e ia mo ki tātou — ko tona Ataliki fakapelepele.

Efeho 2:7

Na fai e ia te mea tēnei ke fakaalia ai mo taimi uma lele koi mua, te tūkehe o te lahi o tona alofa tūnoa, e ala i te agalelei o Keliho Iehu ki a te ki tātou.

2 Tehalonia 1:10

i te Aho e hau ai ke kavatu ki ei nā vīkiga mai tagata uma o ia, ma fakaeke atu ki ei te mamalu mai ia te ki lātou uma kua talitonu. Ko koutou foki ka i ei fakatahi ma ki lātou, ona ko koutou kua talitonu ki te fekau na lea atu ai ki mātou.

1 Timoteo 1:13

e ui lava e i ei he taimi kua teka atu nae fāifāi ai au ki tona igoa ma fakahāuā ma fakamātagā ki a te ia. Kae ko te Aliki na alofa fakahao mai ki a te au, ona nae hē kō iloa aku mea nae fai, auā ko hēki talitonu ai au ki a te ia i te taimi tēnā.

Epelu 7:25

Ma e ia mafaia la, i te taimi nei ma taimi uma, ke fakaola ki lātou e ōmamai ki te Atua kui ia te ia, auā ko ia e ola pea ke pa ki te fakavavau, ke fautua ki te Atua mo ki lātou.

1 Petelu 3:20

Ko nā agaga iēnei e hēki uhitaki ki te Atua i te taimi ka koi fakatalitali ai ia ma te onohai mo ki lātou, i nā aho nae fau ai te vaka e Noa. E hē tokalahi nā tino nae i luga o te vaka — e toka valu oioti — na fakaola ki lātou e te Atua e ala i te vai.

2 Petelu 3:15

E tatau ke kikila vē koutou, ko te onohai o te Aliki ko he avanoa tēnā kua ia fōkiatua ke mafai ai koutou ke fakaolagia, e vē lava ko te tuhi atu a to mātou uho pele ki a Paulo ma na ia fakaaogā ai te poto na fōki ki ei e te Atua.

2 Petelu 3:9

Ko te mea kua uma te folafola e te Aliki e hē tuai te fakataunukuga e ia, e vē oi manatu iētahi tino. Kae e onohai pea lava ia, auā e hē fofou ke i ei he tino o koutou e fakaumatia, kae e fofou ko tagata uma ke liliu kehe mai a lātou agahala.