1 Petelu 1:22 - Tokelauan New Testament

²² I te taimi nei, ona ko koutou kua talitonu ki te meamoni, kua fakamamāgia ai koutou mai te agahala, ma ia te koutou ai te alofa moni ki iētahi uho a Kelihiano, ma alofa tētahi ki tētahi ma te loto kātoa.

1 Petelu 1:22 ပူးပေါင်းရင်းမြစ်များ

Ioane 15:17

Ko tēnei la te mea e fakatonu atu ai koutou e au; ke alofa tētahi ki tētahi.

Ioane 15:3

Ko koutou kua uma te fakamamā i nā akoakoga kua tuku atu e au ki a te koutou.

Ioane 17:17

Ko tau kupu ko te meamoni. Ke kavea la te kupu tēnei ma mea e ofo kātoatoa atu ai ki lātou mo koe.

Ioane 17:19

Ona ko ki lātou, e ofo kātoatoa atu ai au mo koe, kae ke mafai ai foki ke ofo kātoatoa atu ki lātou mo koe, ma te fakamāoni.

Gāluega 15:9

E hēki fakakehekehea e ia ki tātou ma ki lātou; na fakamāgalo e ia a lātou agahala ona kua talitonu.

Gāluega 6:7

Ma ko te kupu a te Atua kua halalau pea lava. Kua tuputupu pea lava te nūmela o tagata kua talitonu ki a Iehu i Ieluhalema; ma e tokalahi nā ohitāulaga na ki lātou taliagia te Tala Lelei.

Loma 1:5

Ko ia te na ala ai ona tuku mai te avanoa e te Atua ke kavea ai au ma apohitolo mo Keliho, kae ke takitaki ai e ia ia tagata o mālō uma, ke talitonu ma uhitaki.

Loma 2:8

Kae ka fakaalia tona ita ma tona tōkahā ki a te ki lātou e manatu fakapito ma teteke ki te mea e hako, kae ke mulimuli ai pea ki lātou ki te mea e hehē.

Loma 8:13

Auā kāfai koutou e ola e tuha ai ma te fakatetagata, ko koutou la ka pa ki te oti; kae kāfai i te fehoahoani a te Agaga e fakaumatia e koutou outou uiga kino, ko koutou ka ola.

2 Kolinito 6:6

Ko to mātou loto mamā, te iloa, te onohai ma te agalelei, kua fakaalia ai ko ki mātou ni kaukauna e a te Atua — e ala i te Agaga Paia, e ala i to mātou alolofa moni,

Kalatia 3:1

Kai koutou iēnā i Kalatia te vālelea! Ko koutou nei na fakalauatau e he tino? Ko tēnā na fakakikila outou mata ki te fakamatalaga manino e uiga ki te mate o Iehu Keliho i luga o te hātaulo?

Kalatia 5:5

Kae vē la ko ki mātou, ko te mātou fakamoemoe ke fakalelei e te Atua to mātou va ma ia; ma ko te mea tēnei e hakilikili ki mātou ki ei ona ko te mana o te Agaga o te Atua, e galue ia te mātou e ala i to mātou fakatuatua.

Kalatia 5:7

Ko koutou nae fētutuli lelei lele! Ko ai te nae fakalavelave atu ki a te koutou ma kua hē mafai ai koutou ke talitonu ki te meamoni?

Efeho 4:3

Ko te Aliki te kua maua ai e koutou te tahi. Taumafai la ki te mea e gata ai te koutou mafai, ke tūmau pea te tahi o koutou. Ko te auala e mafai ai te mea tēnei, ko te fuhia fakatahi o koutou i te fīlēmū.

Filipi 1:9

Ma ko au e tatalo ko te koutou alofa ke tuputupu pea lava, ma ke kātoatoa te koutou iloa ma te mālamalama,

1 Tehalonia 3:12

Ke fakatupu pea lava e te Aliki te alofa o tētahi ki tētahi, ma ki tagata uma, ke vē ko te lahi o to mātou alofa mo koutou.

2 Tehalonia 1:3

Te kau uho, ko ki mātou e tatau ke fakafetai pea ki te Atua i aho uma ona ko koutou. Ko he mea tēnei e tonu ma tatau ke fai e ki mātou, ona ko te fakatuatua o koutou kua tuputupu pea lava ma ko te alofa o koutou uma tau tokatahi mo tētahi ki tētahi, e gaholo lava e lahi.

2 Tehalonia 2:13

E tatau ki mātou ke fakafetai ki te Atua i taimi uma mo koutou, te kau uho, koutou iēnā e alofa ki ei te Aliki. Auā ko koutou na filifilia muamua e te Atua ke fakaola e ala i te mana o te Agaga ke kavea ai koutou ma ona tagata paia, ma e ala i te koutou talitonu ki te meamoni.

1 Timoteo 1:3

Ko au e fofou ko koe ke nofo i Efeho, e vē lava oi lea atu ai au ki a te koe ka koi faimalaga atu au ki Maketonia. E i ei nā tino i Efeho e akoako e ki lātou ni matākupu hehē, ma e tatau ke fakatonu e koe nā tino iēnei ke tuku loa te lātou mea tēnei e fai.

1 Timoteo 1:5

Ko te ala o te fakatonuga tēnei kae ke tupu ake ai te alofa e hau mai te loto mamā, te lotofuatia lelei ma te fakatuatua moni.

1 Timoteo 4:12

Nahe i ei he tino e fakatauemu atu ona ko koe e tamaiti, kae ke kavea koe ma fakatakitakiga ki nā tino kua talitonu, e ala i tau tautala, tau āmio, tō alofa, tō fakatuatua, ma tō mamā kātoatoa.

1 Timoteo 5:2

ko fafine mātutua ke vē ni mātua, ma fafine talavou ke vē ni tuafafine, ma tō loto mamā kātoatoa.

2 Timoteo 1:14

Puipui lelei ki nā mea kua tuku atu ki a te koe e ala i te mana o te Agaga Paia e mau i loto o ki tātou.

Epelu 11:8

Ko te fakatuatua o Apelaamo te na mafai ai ke uhitaki ki te Atua i te kalagaga ki ei o te Atua ke fano ki te fenua kua uma te ia folafolagia mo ia. Na tukua e ia tona lava fenua kae fano ki he mea e hē ia iloa pe ko fea.

Epelu 13:1

Ke tūmau pea te alofa o tētahi ki tētahi e vē ona tatau ke fai e tagata uma kua mulimuli ki te Aliki.

Epelu 5:9

Na kavea ia ma auala na maua ai e nā tino uma e uhitaki ki a te ia te fakaolataga e fakavavau, i na kua uma te ia fakataunukua o nā mea uma na tuku e ia faia,

Epelu 6:10

Ko te Atua e fai meatonu. E hē mafai ke puli ia te ia autou gāluega nae fai, pe ko te koutou alolofa ki a te ia e ala i te koutou fehoahoani ki iētahi uho Kelihiano ke pa mai lava ki te taimi nei.

Epelu 9:14

Ona ko te mea tēnei e moni, ka hē hili lele atu nei la te lahi o nā mea e mafai ke fakataunuku i te toto o Keliho? Na ia ofo atua ia ia lava ma tāulaga ki te Atua e kātoatoa te lelei, e ala i te Agaga o te Atua e tūmau pea lava ke pa ki te fakavavau. Ko tona toto ka fakamamā ai o tātou lotofuatia mai nā faiga e hēai he aogā, kae ke mafai ai ki tātou ke tautua ki te Atua e ola pea lava.

Iakopo 1:21

Ko te mea ia e tatau ai ke tīaki e koutou nā āmio mātagā ma nā uiga kino uma, kae talia ma te loto maulalo te kupu kua uma te ia totōagia i outou loto ke maua ai e koutou te fakaolataga.

Iakopo 4:8

Fakatafapili ki te Atua, oi fakatafapili mai ai ia ki a te koutou. Fafano outou lima, koutou nā tino agahala! Fakamamā outou loto, koutou nā tino fakagutugutulua!

1 Petelu 1:2

Ko koutou na filifilia e tuha ai ma fuafuaga a te Atua te Tamana, ma na fakapaiagia e tona Agaga, ke uhitaki ki a Iehu Keliho ma ke fakamamāgia i tona toto. Ke tūmau pea ia te koutou te alofa tūnoa ma te fīlēmū o te Atua.

1 Petelu 2:17

Āva ki ho he tino, alolofa ki outou uho a Kelihiano, mātataku i te Atua ma āva ki te Tupu o Loma.

1 Petelu 3:1

E vēnā foki koutou fafine kua fai kāiga, e tatau koutou ke i lalo o te pule a autou tāne. E tuha lava la pe i ei ni tino o ki lātou e hē talitonu ki te kupu a te Atua, kae ka kavea te koutou uhitaki ma mea e liliu ai ki lātou ma talitonu. E hē tau faia e koutou he kupu ki ei,

1 Petelu 3:20

Ko nā agaga iēnei e hēki uhitaki ki te Atua i te taimi ka koi fakatalitali ai ia ma te onohai mo ki lātou, i nā aho nae fau ai te vaka e Noa. E hē tokalahi nā tino nae i luga o te vaka — e toka valu oioti — na fakaola ki lātou e te Atua e ala i te vai.

1 Petelu 3:8

Ko te toe mea e lea atu ai au: ko koutou uma lele e tatau ke tutuha outou manatu ma outou lagona; alofa tētahi ki tētahi e vē ni tuagane ma ni tuafafine, ma ke agalelei ma loto maulalo tētahi ki tētahi.

1 Petelu 4:17

Auā kua pa mai te taimi ka kāmata ai te fakamahinoga, ma ko nā tino moni o te Atua ko ki lātou iēnā te ka muamua oi fakamahino. Kāfai e kāmata ia te ki tātou, he ā nei te ikuga o nā tino e hē talitonu ki te Tala Lelei mai te Atua?

1 Petelu 4:8

Kae fakahilihili ai, ke tūmau pea lava te alofa o tētahi ki tētahi, auā ko te alofa e kave kehea ai te lahi o agahala.

2 Petelu 1:7

ki te mataku i te Atua, fakaopoopo ki ei te alofa faka-Kelihiano; ki te alofa faka-Kelihiano, fakaopoopo ki ei te alofa ki tagata uma.

1 Ioane 3:11

Ko te fekau na fakalogo koutou ki ei mai te kāmataga ko tēnei: e tatau ki tātou ke alofa tētahi ki tētahi.

1 Ioane 3:23

Ko te Atua e fofou ko ki tātou ke talitonu ki tona Ataliki ko Iehu Keliho, ma ke alofa tētahi ki tētahi. Ko tēnei foki lava te mea na fakatonu mai e Keliho ke fai e ki tātou.

1 Ioane 4:12

E hēai he tino na kua ia kitea te Atua, kae kāfai ki tātou e alofa tētahi ki tētahi, ko te Atua e ola i te māfutaga ma ki tātou, ma ko tona alofa kua kātoatoa te lelei i loto o ki tātou.

1 Ioane 4:20

Kāfai ki tātou e lea ko ki tātou e alolofa ki te Atua kae inoino ki o tātou uho ma o tātou tuafafine, ko ki tātou ni tino tala pepelo. Auā e hē mafai ki tātou ke alolofa ki te Atua e hē ki tātou kiteagia, kāfai ki tātou e hē alolofa ki o tātou uho ma o tātou tuafafine e kitea e ki tātou.

1 Ioane 4:7

Te kau uho pele, e tatau ki tātou ke alofa tētahi ki tētahi, auā ko te alofa ko he mea e hau mai te Atua. Ko nā tino e alolofa ni fānau ki lātou e a te Atua, ma e ki lātou iloa te Atua.

Fakaaliga 2:4

Kae ko tēnei te mea e hē fiafia ai au ki a te koutou: ko koutou e hē alolofa mai ki a te au i te taimi nei, e vē ko te taimi muamua.