1 Kolinito 8:1 - Tokelauan New Testament

¹ E vē ko te mea na tuhi mai ai koutou e uiga ki nā meakai kua ofo atu mo nā tupua: E hako e “ia te ki tātou uma te mālamalama,” e vē oi lea ai ki lātou. Ka ko he mālamalama vēnā, e fefete ai he tino i te fāfia; kae ko te alofa, e fakatau fehoahoani ai tētahi ki tētahi.

1 Kolinito 8:1 ပူးပေါင်းရင်းမြစ်များ

Gāluega 15:10

He ā la te kua tofotofo ai e koutou te Atua i te kua fakauta e koutou o he kavega ki luga o nā tino kua talitonu ki te Aliki, he kavega na hēki mafai e o tātou tupuna pe ko ki tātou oi taukave?

Gāluega 15:29

nahe koutou kakai ki ni meakai kua ofo ma tāulaga mo nā tupua; nahe koutou kakai ki ni toto; nahe koutou kakai ki ni manuvaefa na titina; kalo kehe ma tuinanauga kino ki te tino. Ka lelei lele atu mo koutou, kāfai koutou e fakaeteete ma hē koutou faia nā mea iēnei. E alolofa atu ki mātou.”

Gāluega 21:25

Kae e vē la ki nā tino nukukehe kua kavea ma Kelihiano, kua uma te kave ki ei te mātou tuhi ke taku ki ei kua tonu ia te ki mātou, ko ki lātou e hē kakai ki ho he meakai na ofo ma tāulaga ki nā tupua ta, pe ni toto, pe ho he manuvaefa na titina, ma ke kalo kehe i nā tuinanauga mātagā o te tino.”

Loma 11:25

Oku uho, e i ei te meamoni lilo e fofou au ke koutou iloa, ona e fehoahoani ke tāofiofi ai koutou mai te manatu ko koutou e popoto. Ko tēnei la; ko te loto makaka o tagata Ihalaelu e hē tūmau, ma e fātoā uma kāfai kua kātoatoa te nūmela o tagata nukukehe e ōmamai ki te Atua.

Loma 12:16

Koutou ke ola fealofani. Koutou nahe fia hihili, kae fakamāhani ki nā tino loto maulalo. Koutou nahe fia popoto.

Loma 14:10

Ko koutou la iēnā e kakai oioti ki nā fuālakau fatoaga — he ā te fakamahino atu ai koutou ki iētahi tino Kelihiano? Ma ko koutou iēnā e kakai ki ho he mea — he ā te faitio tauanoa ai koutou ki iētahi uho Kelihiano? Ko ki tātou uma lele ka tutū i mua o te Atua ke fakamahino e ia.

Loma 14:14

Ko te māfutaga a āku ma te Aliki ko Iehu, kua kō mautinoa ai e hēai he meakai e hē mamā i nā tūlaga tau tāpuakiga; kae kāfai koe e talitonu e i ei ni meakai e hē mamā, ka hē mamā lava la mo koe.

Loma 14:19

Ko te mea ia, ko ki tātou e tatau ke taumafai pea lava ke ola i te fīlēmū ma fehoahoani tētahi ki tētahi, ke taufai mālolohi ai.

Loma 14:22

Ko nā mea kua talia e koe e uiga ki te mea tēnei, ko he mea lava i te va o koe ma te Atua. Amutia nā tino e hēai lele he fakaatu kāfai e fai e ki lātou nā mea e ki lātou iloa e hako!

Loma 14:3

Nahe faitio te tino e kai ki ho he mea ki te tino e kai oioti ki nā fuālakau fatoaga; nahe fakamahino foki te tino e kai oioti ki nā fuālakau fatoaga ki te tino e kai ki ho he mea; auā kua talia e te Atua te tino tēnā.

Loma 15:14

Oku uho, e mautinoa e au ko koutou e tumu i te lelei, kua ia te koutou te mālamalama, ma kua koutou mafaia oi akoako tētahi ki tētahi.

1 Kolinito 1:5

Auā ko te māfutaga a koutou ma Keliho kua maua ai e koutou te tamaokāiga i ho he mea, e aofia ai nā kupu e tautatala ai koutou ma te mālamalama lautele.

1 Kolinito 10:15

Ko au e tautala vēnei atu ki a te koutou ko koutou ni tino e mālamalama; fakamāhinohino ifo e koutou nā kupu e tautala ai au.

1 Kolinito 10:28

Kae kāfai he tino e lea atu, “Ko te meakai tēnei na ofo atu mo nā tupua,” nahe kē kai la ki ei auā te tino tēnā kua lea atu, ma auā foki lava te lotofuatia —

1 Kolinito 14:20

Te kau uho, koutou nahe vē ni tamaiti i outou manatunatuga; koutou ke vē ni pepe e tuha ai ma nā mea e kino, kae ke vē ni tino mātutua e tuha ai ma nā manatunatuga o koutou.

1 Kolinito 15:34

Toe tuku tonu lelei outou māfaufau, ma ke nahe toe faia e koutou te agahala. Auā e i ei nā tino o koutou e hē ki lātou iloa te Atua. Ko au e lea vēnei atu kae ke lagona ai e koutou te mā.

1 Kolinito 4:10

Ona ko Keliho, e kavea ai ki mātou ma tagata vālelea; kae ko koutou e popoto i te māfutaga ma Keliho! Ko ki mātou e vāivai, kae ko koutou e mālolohi! Ko ki mātou e inohia, kae ko koutou e fakaaloalogia e tagata!

1 Kolinito 4:18

Ko iētahi o koutou kua fia popoto, ona nae hē manatu koutou ko au e āhiāhi atu ki a te koutou.

1 Kolinito 4:6

Ko nā mea uma iēnei oku uho, kua uma te fai e ki māua ma Apolo, ke fakafaigofie ai mo koutou. Kua kavea to mā toka lua ma fakatakitakiga, kae ke mālamalama ai koutou i te uiga o te fakakupuga e vē mai, “Fakamamalu nā tūlāfono moni.” Nahe i ei lele he tino o koutou e fiafia ki tētahi tino, kae inoino ki tētahi.

1 Kolinito 5:2

E vēhea ake la ona fāfifia koutou! E hē tatau nei koutou ke māhiahi? Ko te tino kua ia faia te tēnei mea, e tatau ke tuli kehe ma te koutou maopoopoga.

1 Kolinito 5:6

E hē tatau koutou ke fāfifia. E hē koutou iloa ko te tamākīkī fefete e fefete ai te paluga kātoa?

1 Kolinito 8:2

Ko te meamoni, ko nā tino e manatu e ki lātou iloa he mea, ko hēki ki lātou iloa nā mea e tatau ke ki lātou iloa.

1 Kolinito 8:4

Ko te mea ia, e vē ki te kakai ki nā meakai kua ofo mo nā tupua; e ki tātou iloa ko te tupua e hēai hona ola; e ki tātou iloa e fokotahi oioti lava te Atua.

1 Kolinito 8:7

Kae e hē ko tagata uma te ki lātou iloa te meamoni tēnei. Ko iētahi tino na ola ake lava ma te talitonuga ko nā tupua ni mea e i ei ni ola ma ke pa mai lava nei, kāfai e kakai ki nā meakai vēnei e manatu lava ko nā meakai e mo he tupua; e vāivai to lātou lotofuatia, ma e manatu ko ki lātou e hē mamā i nā meakai.

Efeho 4:16

I lalo o tana taukikilaga, ko nā itūtino kehekehe uma o te tino e nofo tonu ma fetaui lelei, ma ko te tino kātoa e tamau fakatahi e nā hokoga takitahi uma kua hāunia e ia. Ko te mea ia, kāfai nā vāega kehekehe takitahi e gālulue e vē ona fuafuagia, ka vēnā foki oi tuputupu ake te tino kātoa ma fano e mālohi e ala i te alofa.

Kolohe 2:18

Nahe talia e koutou ni faitioga mai he tino e lea e hili atu tona tāua i lo koutou ona ko he fakaaliga fakapitoa na ia kitea, ma e fakatagā lotomaulalo ma tāpuaki pea lava ki nā agelu. Ko nā tino vēnei e manatu fakamaualuga ona ko na lagona fakatetagata,

Fakaaliga 2:14

Kae e i ei ni nai mea e hē fiafia ai au ki a te koutou: E i ei nā tino o koutou e mulimuli ki nā akoakoga a Palaama, tēia na ia akoakoa ia Palaka i nā faiga ke takitaki ai ia tagata o Ihalaelu ki te agahala. Na fakaako e ia nā tino ke kakai ki nā meakai kua uma te fakatō mo nā tupua ta, ma fakamālohi te faiga o nā tuinanauga mātagā ki te tino.

Fakaaliga 2:20

Kae ko tēnei te mea e hē fiafia ai au ki a te koutou: e hēai lele houtou teteke ki te fafine ko Iehapela, tēia e lea ko ia ko he pelofeta e a te Atua. E fakahehē e ia aku kaukauna e ala i ana akoakoga, ke ki lātou faia nā tuinanauga mātagā ki te tino, ma ke kakai ki nā meakai kua uma te fakatō mo nā tupua ta.