1 Kolinito 4:14 - Tokelauan New Testament

¹⁴ Ko au e hē tuhi vēnei atu ke fakamahiahi koutou, kae ke fakatonu atu koutou nā fānau e pele ia te au.

1 Kolinito 4:14 ပူးပေါင်းရင်းမြစ်များ

Gāluega 20:31

Koutou la ke mataala, ma ke manatua te lahi o nā loimata na maligi i te pō ma te ao, i te tolu tauhaga nae kō akoakoa ai koutou uma tau tokatahi.

1 Kolinito 15:34

Toe tuku tonu lelei outou māfaufau, ma ke nahe toe faia e koutou te agahala. Auā e i ei nā tino o koutou e hē ki lātou iloa te Atua. Ko au e lea vēnei atu kae ke lagona ai e koutou te mā.

1 Kolinito 4:15

Auā e ui lava e hē mafai taulia te tokalahi o nā takitaki o koutou i te ōlaga faka-Kelihiano, e fokotahi oioti lava te koutou tamana. Kua fai au ma outou tamana, i te māfutaga ma Keliho Iehu, ona na kō kaumaiagia te Tala Lelei ki a te koutou.

1 Kolinito 4:17

Ko te mea ia ka uga atu ai e au ki a te koutou ia Timoteo, toku ataliki pele ma te fakamāoni i te ōlaga faka-Kelihiano. Ka ia fakamanatu atua ki a te koutou nā mea tāua e mulimuli au ki ei i te ōlaga fou fakatahi ma Keliho Iehu, e vē oi akoako atu e au ki nā Ekalehia uma i nā koga kehekehe.

1 Kolinito 6:5

Koutou te hē mamā! E tatau lava ke i ei he tino o koutou e mālamalama, ma ia mafaia oi fai he fakaikuga i he mea e kehekehe ai ni uho Kelihiano.

1 Kolinito 9:15

Kae e hēki kō fakaaogāgia lele nā aiātatau iēnei, ma ko au foki e hē tuhi atu kae ke maua ai e au. E hili atu ai toku oti, i lo te kave kehea e he tino o te mea e fāfia ai au.

2 Kolinito 11:11

Ko au nei e lea vēnei ona ko au e hē alofa atu ki a te koutou? E iloa e te Atua ko au e alofa ki a te koutou!

2 Kolinito 12:19

Ātonu pe ko koutou e vēakē ko ki mātou e fīnau atu mo ki mātou lava. Hēai! Ko ki mātou e tautatala lava e vē ko te mea e fofou ia Keliho ke tautatala ai ki mātou i mua o te Atua, ma ko nā mea uma e ki mātou faia, e mo te atiakega o koutou a mātou uō pele.

2 Kolinito 7:3

Ko taku lea atu vēnei e hē ko he faitioga, auā kua uma lava toku lea atu ko koutou e pele lele i o mātou loto i taimi uma, pe ola ki mātou pe oti.

Kolohe 1:28

Oi e folafola la e ki mātou te fekau e uiga ki a Keliho, ki tagata uma. E lapataki ma akoako e ki mātou e ala i te poto kua ki mātou mauagia, kae ke mafai ai ke kaumai ki lātou tau tokatahi ki mua o te Atua, kua āmio fakatagata matua i te māfutaga ma Keliho.

1 Tehalonia 2:11

E iloa e koutou ko nā faiga a ki mātou nae fai ki a te koutou e vē lava ko nā faiga a he tamana e fai ki tana lava fānau.

1 Tehalonia 5:14

Ko ki mātou e ole atu ki a te koutou, te kau uho, ko koutou ke lapataki mālohi atu ki nā tino e nonofo tauanoa e hēai ni gāluega e faia, fakamākeke atu ki nā tino matamumuli, fehoahoani atu ki nā tino vāivai, ma ke lava te koutou onohai ki tagata tau tokatahi uma.

2 Tehalonia 3:14

Ātonu e i ei ni tino i kinā ka hē fia fakalogo ki te fekau kua kavatu e ki mātou i te tuhi tēnei. Kāfai e i ei ni tino vēnā, ke koutou iloa pe ko ai ki lātou, ma nahe koutou toe fakapipiki ki ei kae ke fai tēnā ma mea e lagona ai e ki lātou te mā.

Filemoni 1:10

Ko au la e talohaga atu ki a te koe e uiga ki a Onehimahi, ko he ataliki ki a te au e ala ia Keliho; auā na kavea au e vē ko he tamana ki a te ia, ka koi i loto au o te falepuipui.

1 Ioane 2:1

Ko au kua tuhi atu ki a te koutou taku fānau, kae ke nahe faia ai e koutou te agahala; kae kāfai he tino e agahala, e i ei te tino e fautua ki te Tamana mo ki tātou — ko Iehu Keliho, tē e āmiotonu.

3 Ioane 1:4

E hēai he mea e hili atu ona fiafia ai au i lo toku fakalogo atu ko taku fānau e ola i te meamoni.