1 Ioane 3:10 - Tokelauan New Testament

¹⁰ Ko tēnei la te mea e kehekehe ai nā fānau a te Atua ma nā fānau a te Tiāpolo: ko nā tino uma e hē ki lātou faia te mea e hako pe hē alolofa ki iētahi tino, e hē ni fānau e a te Atua ki lātou.

1 Ioane 3:10 ပူးပေါင်းရင်းမြစ်များ

Mataio 13:38

ko te fatoaga ko te lalolagi; ko nā fatu haito lelei ko nā tino iēnā e o te Atua; ko nā vao kino ko nā tino iēnā e o Hātani;

Luka 6:35

Kae alolofa ki nā fili o koutou ma fai lelei ei; fōki autou mea e aunoa ma he koutou māfaufau, ke toe maua mai he mea. Ka maua ai e koutou he taui lahi, ma kavea ai koutou ma fānau a te Atua Hilihilikehe. Auā ko te Atua e agalelei ki nā tino kino ma hē loto fakafetai.

Ioane 1:12

Kae ko ki lātou uma na taliagia ia ma talitonu ki ei; na ia tuku atua ki ei te haolotoga, ke kavea ai ki lātou ma fānau a te Atua.

Ioane 11:52

ma e hē nā mo nā tino Iutaia oioti, kae ka vēnā foki ona fakamāopoopo e ia nā tino uma o te Atua e takape i atunuku kehekehe, ke kavea e vē ko he tino e tahi.

Ioane 8:44

Ko koutou ko nā fānau a te koutou tamana, te Tiāpolo, ma e fofou lava koutou ke fai te mea e fofou ia ki ei. Mai te kāmataga, ko ia ko he fahioti tagata ma nae hē fofou lele ki te meamoni, ona e hēai he meamoni e ia te ia. Kāfai e tautala i te pepelo, e fai lava e ia te mea kua māhani ai, auā ko ia ko he tino talapepelo, ma ko te tamana o talapepelo uma.

Ioane 8:47

Ko te tino e hau mai te Atua, e fakalogo ki te kupu a te Atua. Kae ko koutou e hē mai te Atua, ma ko te mea ia e hē fakalogo ai koutou ki te Atua.”

Gāluega 13:10

ma lea vē atu ki ei, “Ko koe ko te ataliki o te Tiāpolo! Ko koe ko te fili o nā mea uma e lelei. Ko koe kua tumu i nā itūkāigā togafiti kino uma, ma e taumafai pea lava koe ke fakaliliu te kupu moni a te Aliki ke fai ma kupu pepelo!

Loma 13:8

Nahe i ei lele he tiute taukave o koutou ki he tino — oioti lava te koutou tiute, ko te alofa o tētahi ki tētahi. Ko te tino e fai e ia te mea tēnei, kua uhitaki ia ki te Tūlāfono.

Efeho 5:1

Ona ko koutou ni fānau fakapelepele e a te Atua, e tatau ai koutou ke taumafai ke vē koutou ko ia.

Kolohe 3:14

Ma ke fakaopoopo ki nā uiga lelei uma iēnei te alofa, tēia e ōpoi fakatahia nā mea uma, ma kātoatoa lelei ai.

1 Timoteo 1:5

Ko te ala o te fakatonuga tēnei kae ke tupu ake ai te alofa e hau mai te loto mamā, te lotofuatia lelei ma te fakatuatua moni.

1 Ioane 2:29

E iloa e koutou ko Keliho e āmiotonu; e tatau la ke koutou iloa ko nā tino uma e faia te mea e tonu, ni fānau ki lātou e a te Atua.

1 Ioane 3:1

Kikila ki te lahi lele o te alofa o te Tamana ki a te ki tātou! Ko te lahi o tona alofa kua takua ai ki tātou ni fānau e a te Atua — ma e moni lava te mea tēnei. Ko te mea ia e hē iloa ai e te lalolagi ki tātou, ona e hē ki lātou iloa te Atua.

1 Ioane 3:2

Te kau uho pele, ko ki tātou ni fānau e a te Atua i te taimi nei, kae ko hēki manino pe vēhea te tūlaga ka pa ki tātou ki ei. Kae e ki tātou iloa, kāfai ia Keliho e haele mai, ko ki tātou ka vē lava ko ia; auā ka ki tātou kiteagia ia i te tūlaga tonu lava e i ei ai ia.

1 Ioane 4:21

Ko te fakatonuga kua tuku mai e Keliho ki a te ki tātou ko tēnei: ko ai lava e alofa ki te Atua e tatau ke alofa foki ki o lātou uho ma o lātou tuafafine.

1 Ioane 4:6

Kae ko ki tātou e o te Atua. Ko nā tino e ki lātou iloa te Atua e fakalogo mai ki a te ki tātou; ko nā tino e hē o te Atua e hē fakalogo mai ki a te ki tātou. Ko te mea la tēnei e ki tātou iloa ai te kehekehega i te va o te Agaga o te meamoni ma te agaga o te meahehē.

1 Ioane 4:8

Ko nā tino e hē alolofa e hē ki lātou iloa te Atua, auā ko te Atua ko te alofa.

1 Ioane 5:19

E iloa e ki tātou ko ki tātou e o te Atua e ui lava ko te lalolagi kātoa e i lalo o te pule a te Tino Kino.

1 Ioane 5:2

Ko tēnei te mea e iloa ai ko ki tātou e alolofa ki nā fānau a te Atua: kāfai ki tātou e alolofa ki te Atua ma uhitaki ki ana fakatonuga.

3 Ioane 1:11

Te uō pele, nahe kē fakatakitaki ki te mea e kino, kae fakatakitaki ki te mea e lelei. Ko te tino e ia faia te mea e lelei e o te Atua ia; ko te tino e ia faia te mea e kino, ko hēki ia kiteagia te Atua.