Yohanes 9:39 - En Taar Weru a nunuwu' é Tontemboan

³⁹ Wo icua i Yesus, “Yaku mai ang kayo'baan e makim, wosama' si séike' sé ra'ica maséré, ro'nao oka suméré, wo si séike' sé ro'na maséré, sia mawola oka.”

Yohanes 9:39 ပူးပေါင်းရင်းမြစ်များ

Matius 11:5

Si tou wola maséréo, si tou késo' mawaya'o, si tou sumakit kusta masama'o, si tou wengel malingao, si tou imatéo tinou sumawel, wo en Abar Kaaruien i Amang Kasuruan ipakua-kuao a sé tou lengéi.

Matius 15:14

Wayao mio' sé tou itu. Séra tou wola sé maakin sé tou wola. Sa sé tou wola maakin sé tou wola, séra in dua tantu lumepok oka an lo'beng.”

Matius 6:23

Sa em beren iow makewuro, imariréimbengo waya en owak iow.

Lukas 1:79

en sumendot in até é tou sé menonoué' ang kariréimbengan wo sé tou menonoué' ang kaindé'an. Wo mai-Na oka akinen kita kumiit in lalan maangé asi katouan wuta ing kaeluran.”

Lukas 13:30

En ulitna, awéan sé tou sumomo-somoi mamuali oka tou kumataré-taré wo awéan sé tou kumataré-taré mamuali oka tou sumomo-somoi.”

Lukas 2:34

Wo si Simeon sumombayang mangilek a si Amang Kasuruan wosama' méé mai ing kamang ai séra. Wo icuana a si Maria inang i Toyaang itu, “Maria, si Toyaang anio' aitantuo i Amang Kasuruan e mai mukum sé kelian tou Israel sé ra'ica maéman a si Casuruan wo mai lumowir kelian tou Israel sé maéman ai Sia. Wo si Toyaang anio' mamuali oka tuus tanu popokéi i Amang Kasuruan a sé tou iméma' ing kamesé-meséaan. Taan Sia icélong oka é tou keli.

Lukas 4:18

“E Roh i Amang Kasuruan a Yakuo ampa'paan Aku sinisir-Nao eng kumua in Abar Kaaruien a sé tou lengéi, wo Yaku ka'i ayutuso i Amang Kasuruan eng kumua a sé tou tana'i: sé tou ayuntep am bui iwekar-Na oka, sé tou wola émaan-Na oka ro'na maséré, sé tou paoko-okoien émaan-Na oka icawekar,

Lukas 7:21

Asi témpo itu, si Yesus sumama' sé tou keli sé membam-balinaan en sakit si méma' iséra mawendu wo musér ka'i sé roh léwo'. Sia ka'i iméma' kelian sé tou wola ro'na maséré.

Yohanes 12:31

Intarépé' an témponao si Amang Kasuruan makim sé tou ang kayo'baan anio', wo si kikiiten é sétang si makakawasa ang kayo'baan anio' iténdél oka ang kesot.

Yohanes 12:46

Yaku mayo ang kayo'baan anio' e mamuali sendot a sé tou, wosama' sé tou maéman a Yaku ra'ica mento' ang kariréimbengan.

Yohanes 3:17

Ampa'paan si Amang Kasuruan mutus si Toyaang-Na ang kayo'baan ra'ica mai makim sé tou iméma' ing kamesé-meséaan, taan Sia mai en lumowir sé tou an ukuman ing kamesé-meséaan éra.

Yohanes 3:19

Si anioo e mangémai si Amang Kasuruan mukum sé tou ang kayo'baan anio': En sendot mayo ang kayo'baan, taan sé tou masalé'ke' ing kariréimbengan, ra'ica masalé' in sendot itu, ampa'paan séra masalé-salé'ke' mengaéma' ing kaléwo-léwo'an.

Yohanes 8:12

Kekawus in itu, icua i Yesus sumawel a sé tou keli in tana'i, “Yakuo en sendot ing kayo'baan. Si séi eng kumiit Yaku, sia itu ra'io menonou ang kariréimbengan, taan sia menonou an sendot si méma' isia menonou akar ing kauré-uré.”

Yohanes 8:15

Yaku akimen iow kumiit ing kanaramen é tou. Taan Aku mandé esake' en tou ra'ica wana en akimen-Ku.

Yohanes 9:25

Isowat i tou itu, “Ra'ica kailekanku sa Sia awéan kamesé-meséaan kuma'pa ra'ica. Taan eng kailekanku sapaoka indior aku wola taan intarépé' ro'nao maséré.”

Kisah Para Rasul 26:18

e mangé muka' im bewerot éra wosama' séra ra'io ka'i menonou ang kariréimbengan taan menonou ang kasendotan, wo ka'i séra ra'io pakakawasan i kikiiten é sétang taan pakakawasan i Amang Kasuruan. Wo in taniitu ampa'paan séra maéman a Yaku, eng kamesé-meséaan éra makéré oka kaampungan wo makéré oka ka'i bagéan si aitantuo i Amang Kasuruan a sé tou sé line'nas-Na.’

2 Korintus 2:16

Sa tou sé ra'ica tumerima in Abar Kaaruien andumoro' i Yesus Kristus wo maangé am papaté, icami anio' tanuoka wou im buruk. Taan sa tou sé tumerima in Abar Kaaruien itu wo lowiren, kami tanuoka im bou manam si makawali ing katouan. Anaé, si séi e ro'na méma' in tawoien anio'?

Efesus 5:14

Ampa'paan in ituo awéan en aipatic in tana'i, “Éi camu sé makatekelé', tumooro, wo tumouo mai sumawel am papaté wo si Kristus tumélang oka mai camu.”

2 Tesalonika 2:10

Sia itu maké i membam- balinaan em pakauwak léwo' sé tou akar i maka'pu. Sé tou itu ang karoro'ano im pepaté-patén ampa'paan séra ra'ica masalé' luminga in sususuien wutul asi Amang Kasuruan owo in andumoro' i Apo' Yesus wo ra'ica kiim lowiren.

1 Petrus 2:9

Taan kamu anio' bangsa sé sinisiro i Amang Kasuruan, imam sé maselewir a si Amang Kasuruan si Colanota, bangsa sé line'nas-Nao wo ka'i mamuali anu-Na. Kamu im baya imamuali tanu siitu wosama' ro'na ipakua-kua miow a sé tou andumoro' sé kakaya'kaan sé niéma'o i Amang Kasuruan. Siao en tumowa icamu kumesot ang kariréimbengan wo muntep asi sendot-Na wangko'.

1 Yohanes 2:11

Taan séi si masuut si poowna, sia itu ang kariréimbengan, ampa'paan sia menonoué' ang kariréimbengan. Wo ra'ica kailekanna am bisa en angéanna ampa'paan e riréimbeng itu tanu iméma'o isia mawola.