Yohanes 7:19 - En Taar Weru a nunuwu' é Tontemboan

¹⁹ Ra'ica réén aiwééo i Musa en ukum Torat ai camu? Taan ra'ica wana mandé esake' asé icamu sé mengaéma' in ukum Torat itu. Kéitu réén kamu rumaméji e maté Yaku?”

Yohanes 7:19 ပူးပေါင်းရင်းမြစ်များ

Matius 12:14

Wo sé tou Farisi itu kumesot am balé paapo'an, séra mepaar tumambisa e maté si Yesus.

Matius 21:38

Taan an tutuw i toyaang i makauma itu sérén é matawoi in uma itu wo séra mengkuanan, ‘Siao e makaanu in uma anio' sa. Mayoo paténta sia wo en uma anio' mamuali oka anuta.’

Markus 11:18

An tutuw é kikiiten é imam wo sé makailek wutul in Torat luminga andumoro' ing kamamualian itu, séra rumaméji maté Sia. Taan icaindé' éra Sia ampa'paan en sususuien-Na iméma' pakasa sé tou mangaya-ngaya'ka'.

Markus 3:4

Wo wuéien-Na ai séra, “Si wisa e ro'na émaan asi endo Sabat? Méma' si loor kuma'pa si léwo'? Sumama' in tou kuma'pa maté tou?” Taan séra makapeneske'.

Markus 3:6

An tutuw ituke', sé tou Farisi kumesot am balé paapo'an. Séra makala'us mangé e mepaar wo sé tou makii-kiit si Herodes en tumambisa maté si Yesus.

Yohanes 1:17

Tinerimata en ukum-ukum i Amang Kasuruan ampa'paan i Musa, taan kinatuusanta en upus aitambér i Amang Kasuruan wo en sususuien wutul-Na ampa'paan si Yesus Kristus.

Yohanes 10:39

Kekawus i Yesus kumua in taniitu, séra rumaméji ka'i en tumangka' Sia, taan Sia aicaséipke' en tangkaan éra.

Yohanes 11:53

Tumo'tol asi endo itu sé kikiiten é agama Yahudi meesa en até e maté si Yesus.

Yohanes 5:16

Ampa'paan in itu, sé kikiiten é Yahudi rumaméji mokoi si Yesus, ampa'paan sinama'-Na si tou asi endo Sabat.

Yohanes 5:18

Sé nunuwu' itu méma' sé kikiiten é Yahudi lébé rumaméji e maté Sia, ra'icake' ampa'paan Sia ra'ica kumiit in atoran in endo Sabat, taan ka'i ampa'paan Sia icumua sa si Amang Kasuruan itu Amang-Na in esa, wo in taniitu pengapeputé-Na en owak-Na wo si Amang Kasuruan.

Yohanes 5:45

Tioo mawerot sapaoka tudun-Ku oka kamu an dior i Amang asi endo pengaakiman. Si tumudu icamu itu si nabi Musa, mandé ka'i siao si pengaarapen iow.

Yohanes 7:1

Kekawus in itu, si Yesus méma' im bawayaan-Na lumi'cir in sangkum ing Galilea. Ra'ica kiim-Na maangé an sangkum in Yudea ampa'paan sé kikiiten é agama Yahudi am bitu rumaméji maté Sia.

Yohanes 7:25

Wo awéan piraan tou an Yerusalem sé cumua, “Ra'ica réén Sia anio' si paéré-érén é kikiitenta im patén?

Kisah Para Rasul 7:38

Si Musa anio' si mewali-wali wo sé apo-apo'ta tou Israel an tana' kapayasan. An tutuw ang kuntung Sinai, awéan malaékat mai mepaar wo isia en icua a sé apo-apo'ta, siituo en taar i Amang Kasuruan si tinerimana si méma' icita menonou.

Galatia 3:19

Aiwéé i Amang Kasuruan eng kamang ciit in janji-Na. Sa taniitu, kéitu réén Sia méé in ukum Torat itu? En ukum Torat itu aiwéé-Na wosama' ro'na kakailekan é tou eng kamesé-meséaan éra. Wo en ukum itu asalo mapaké akar maai si taranak i Abraham si aicua an janji-Na a si Abraham itu. En ukum itu aicua é malaékat a si Musa si makawali itu, wo icuana a sé tou Israel.

Galatia 6:13

Séra sé makiit in atoran sunat, ra'ica ka'i paémaan éra waya sé an ukum Torat. Taan icasalé' éra kamu sunaten wosama' séra ro'na tumirayo in owak ampa'paan kamu makiit in atoran sunat.