Wo rérot oka sé tou keli mai mali'us lumi'cir Sia. Ampa'paan in itu Sia sumaké an londéi wo lumukut am bitu, taan sé tou keli itu makatulung an tembir in lour.
Taan mangéke' taré ipenisi-nisil i tou itu am bisa-wisa sapa e imamuali ai sia, akar si Yesus ra'io toro ka'i mapaturu-turu' in owak an untep ing kota. Sia asalo oka maento' an tampa-tampa lulu in tou ang kesot ing kota. Mandé ka'i in taniitu, sé tou am bisa-wisa menga-ngaike' a si Yesus.
Taan an tutuw é murit-Na maangém, keli en tou makaséré iséra wo kinailekano é tou em paangéan éra. Anaé, sé tou an doo-roong am bitu kumesot. Wo séra kumiit in lalan katanaan, séra en dior angé icateka' am paangéan i Yesus wo sé murit-Na.
Ampa'paan in itu, sé kikiiten é imam wo sé tou Farisi tumowa sé Mahkamah Agama mali'us e mepaar, “Sapa réén e musti émaanta? Ampa'paan, si Tou itu méma'o ing keli kakaya'kaan.
Niéma' i Yesus eng kakaya'kaan-Na kataré itu ang Kana an sangkum ing Galilea. Am bitu aituru'-Na eng kawangko'-Na, ampa'paan in ituo sé murit-Na mercaya ai Sia.
Wo ang karoro'an i Yesus an Yerusalem ang kauréke' in endo wangko' Paska, keli tou maéman ai Sia ampa'paan séra isuméréo in tuu-tuus kakaya'kaan sé niéma'-Na.
Asi sangawengi sia mai an tampa i Yesus, wo icuana ai Sia, “Guru, kailekan ami si Guru ayutus i Amang Kasuruan en sumusui ai cami. Ampa'paan, ra'ica wana tou e ro'na méma' sé kakaya'kaan kaputé sé niéma' i Guru, sa si Amang Kasuruan ra'ica mewali-wali wo isia.”
An tutuw é tou itu isuméré in tuus kakaya'kaan niéma' i Yesus, icua éra, “Sia anio' wutu-wutul Nabi i Amang Kasuruan si aijanjio maai ang kayo'baan anio'!”
Asi woondona mai, kelian tou makaento'pé' an lewet in lour mangéré si Yesus. Pinangéré éra Sia ampa'paan kailekan éra kaawii awéan esa londéi an tembir in lour sinakéan é murit i Yesus, taan Sia in esa ra'ica isumaké asi londéi itu.
Wo isowat i Yesus ai séra, “En ulitna icua-Ku mangé ai camu, pinangéré miow Aku ra'ica ampa'paan sinéréo miow en tuu-tuus kakaya'kaan si niéma'-Ku wo makailek sa si séi réén Aku, taan pinangéré miow Aku ampa'paan kamu icumano i roti itu akar mawesu.
Wo icua éra ai Sia, “Sa taniitu, sapa en tuus si ro'na ipapaturu' ai cami wosama' kami ro'na mercaya sa si Guru itu asi Amang Kasuruan owo. Wo tuus sapa en émaan oka i Guru?