Yohanes 5:30 - En Taar Weru a nunuwu' é Tontemboan

³⁰ Icua ka'i i Yesus, “Yaku ra'ica toro méma' sapa-sapa sa asalo kumiit ing kasalé'an-Ku in esa. Yaku mengaakim kumiit in sapa en lininga-Ku asi Amang-Ku owo. Wo Yaku maakim ra'ica marapit ampa'paan ra'ica kumiit ing kasalé'an-Ku in esa taan kumiit ing kasalé'an i Amang si mutusai Yaku.

Yohanes 5:30 ပူးပေါင်းရင်းမြစ်များ

Matius 26:39

Kumawus in itu si Yesus maya' mangé toyo', Sia kumundu wo sumombayang, “O Amang-Ku, sa woo ro'na, angkaien woo mai eng kawenduan anio' a Yaku. Taan ra'ica iciit ing kasalé'an-Ku e mamuali, iciito ing kasalé'an i Amang.”

Yohanes 14:10

Ra'ica réén percayanmu, Yaku imeesao ang karapi i Amang, wo si Amang esa wo Yaku? Sapa sé aicua-Ku ai camu ra'ica nunuwu'-Ku in esa, taan si Amang meesao wo Yaku si méma' in tawo-tawoien-Na.

Yohanes 17:4

Si Amang iparayo wo pasiriin-Ku ang kayo'baan anio', ampa'paan pinakatawoi-Kuo waya sé airu'du' i Amang in émaan-Ku.

Yohanes 18:11

Taan icua i Yesus a si Petrus, “Iwaléo mio' sumawel en sa'belmu itu. Aitantuo i Amang-Ku wosama' sangkumen-Ku eng kawenduan. Tioo pakala-kalaanmu Aku mendam ing kawenduan itu.”

Yohanes 4:34

Icua i Yesus ai séra, “Eng kakanen-Ku mengaéma' ing kasalé'an i Amang Kasuruan si mutusai Aku wo lumekep in tawoien si aiwéé-Na a Yaku.

Yohanes 5:19

Wo isowat i Yesus ai séra in tana'i, “En ulitna icua-Ku mangé ai camu, Yaku Toyaang i Amang Kasuruan ra'ica toro méma' in sapa-sapa sa asaloke' kumiit ing kasalé'an-Ku in esa. E niéma'-Ku asaloke' sapa sé sinéré-Ku niéma' i Amang-Ku. Ampa'paan sapa sé niéma' i Amang, siituo en émaan i Toyaang.

Yohanes 6:38

Ampa'paan Aku tumumpao mai an sorga owo ra'ica méma' ing kasalé'an-Ku in esa taan méma' ing kasalé'an i Amang Kasuruan si mutuso mai Aku.

Yohanes 8:28

Ampa'paan in itu, icua i Yesus ai séra, “An tutuw airangka' miow Aku Toyaang i Tou ang kayu salip, kakailekan oka miow Yakuo Sia si ipakua-Ku ai camu itu. Wo kakailekan iow oka ka'i Yaku ra'ica maéma' in sapa-sapa kumiit ing kasalé'an-Ku in esa, taan Yaku asaloke' kumua sapa sé aisusui i Amang-Ku.

Yohanes 8:42

Icua i Yesus ai séra, “Sa si Amang Kasuruan itu Amang iow, tantu kamu maupus oka Yaku, ampa'paan Yaku mai asi Amang Kasuruan owo wo intarépé' Aku am bia'i. Ra'ica kasalé'an-Ku in esa e mai, taan Sia e mutusai Yaku.

Yohanes 8:50

Yaku ra'ica maéré-éré in siriin é tou. Taan awéan si Esa si masalé' Yaku in siriin. Siao ka'i e mamuali akim.

Roma 15:3

Ampa'paan si Kristus ka'i ra'ica mangéré-ngéré ing kaaruian in owak-Na in esa. Ang Kitap Le'nas aipatic in tana'i, “Nunuwu' iparoros é tou an tutuw séra mengaroros si Amang Kasuruan, intarépé' itumenao a Yaku.”

Roma 2:2

Kailekanta sa si Amang Kasuruan méé in ukuman a sé tou sé mengaéma' ing kameséaan, em pinusé'-Na itu wutul.

Roma 2:5

Taan kamu anio' keté ngaas wo ra'ica kiim mape'dis. Ampa'paano in itu, icamuo in esa e méma' in ukuman iow makaute-uter asi endo kaka'puan ing kayo'baan sa. Asi endo itu oka si Amang Kasuruan tumuru' ing kae'bowan-Na wo mukum waya sé tou ang karapi in da'ica mengarapit.