Yohanes 18:28 - En Taar Weru a nunuwu' é Tontemboan

²⁸ Asi Woondona mai imamoondopé' keli, iwali éra si Yesus am balé owo i Kayafas, wo mangé an istana i gubernur Romawi. Taan sé kikiiten é tou Yahudi itu ra'ica mekiit muntep an untep in istana itu ampa'paan paweroten é tou Yahudi najis em balé é tou ra'ica Yahudi. Ra'ica kiim éra numajis in owak éra, ampa'paan asi endo itu séra musti kuman ing kakanen Paska.

Yohanes 18:28 ပူးပေါင်းရင်းမြစ်များ

Matius 27:27

Kumawus in itu, si Yesus iwali é suraro i Pilatus an istana i gubernur. Wo towan éra waya sé suraro mali'us lumi'cir si Yesus.

Markus 15:16

Kumawus in itu, iwali mangé é suraro si Yesus ang kintal in istana paento'an i gubernur. Wo towan éra pakasa sé kara-karapi éra suraro e mai mali'us am bitu.

Lukas 22:66

An tutuw imandoo, mali'uso mai sé matu'a é tou Yahudi, sé kikiiten é imam wo sé makailek wutul in Torat. Wo si Yesus iwali éra en sidangen a Mahkamah Agama éra.

Yohanes 11:55

An tutuw itu matawio en endo wangko' Paska é tou Yahudi, keli tou Yahudi an tampa-tampa walina owo mangé an Yerusalem. Piraanné' ngando, ra'ipé' tumo'tol em pésta Paska séra imayo an Yerusalem eng kumiit in atoran agama e meresi in owak.

Yohanes 18:13

Iwali éra Sia kataré-taré a si Hanas, ampa'paan sia itu émpo i Kayafas si asi ta'un itu imamuali imam wangko'.

Yohanes 18:15

Si Simon Petrus wo si esa murit walina ka'i mengii-ngiit an somoi i Yesus. Si murit walina anio' makatuus si imam wangko', anaé sia muntep mewali-wali wo si Yesus ang kintal im balé i imam wangko' itu.

Yohanes 18:33

Wo si Pilatus muntep sumawel an untep in istana gubernur, wo towanna si Yesus wo wuéienna, “Icoo réén si colano é tou Yahudi?”

Yohanes 18:39

Taan iciit ing kanaramen iow, pengawekarku esa tou susur in endo wangko' Paska. Intarépé' icasalé' réén iow sa iwekarku si Colano miow tou Yahudi anio'?”

Yohanes 19:11

Isowat i Yesus, “Ico ra'ica makaanu kawasa sapa-sapa a Yaku sa eng kawasa itu ra'ica aiwéé mai ai co an dangka' owo. Ampa'paan in itu si tou sumarakan Yaku ai co, eng kamesé-meséaanna lébé uter wo eng kamesé-meséaanmu.”

Yohanes 19:14

Si endo itu, tumena asi endo matu'tul in endo wangko' Paska, wo jam duablaso wona' ing katoora yéndo. Wo icua i Pilatus a sé tou Yahudi itu, “Séréno mai, Si anioo si colano miow!”

Yohanes 19:9

Wo sia muntep sumawel an istana itu, wo kumua a si Yesus, “Am bisa owo réén Ko mai?” Taan ra'ica wana sapa-sapa en aisowat i Yesus ai sia.

Kisah Para Rasul 10:28

Wo icua i Petrus, “Kailekano miow eng kanaramen ami tou Yahudi, kami ra'ica toro mengkemuan wo sé tou ra'ica Yahudi tanu icamu, wo ka'i ra'ica toro mangé am balé miow ampa'paan pakasa en itu najis ai cami. Taan aicuao i Amang Kasuruan a yaku sapaoka ra'ica wana tou najis an dior-Na.

Kisah Para Rasul 10:32

Anaé, ru'du'o tou mangé an Yope en sumungkul si Simon si patuulen ka'i Petrus. Sia lumosér am bale i Simon en tawoienna mengaweresi ing kuli'na é binatang en émaan barang-barang. Em baléna an tembir in ta'sic.’

Kisah Para Rasul 11:3

Icua éra, “Kéitu réén ko imangé am balé é tou ra'ica Yahudi wo ka'i cuman mewali-wali wo iséra?”

Kisah Para Rasul 3:13

Si Amang Kasuruan si pengaapo'an é apo-apo'ta Abraham, Ishak wo si Yakub, Siao e méma' si Yesus ata-Na itu iparayo-rayo wo pasiri-siriin. Si Yesus ituo si aisarakan iow wo aicélong iow an dior i Pilatus em patén, mandé ka'i si Pilatus e musé'o e mekar woo Sia.

Kisah Para Rasul 4:27

En aicua i Daud wutul imamualio ang kota anio'. Ampa'paan si Herodes, si Pontius Pilatus, sé tou ra'ica Yahudi, wo sé tou Israel imali'uso en sumundur si Yesus, si Ata Le'nas i Casuruan, Siao si Mesias.