Yohanes 16:14 - En Taar Weru a nunuwu' é Tontemboan

¹⁴ Siao oka en sumiri' wo rumayo Yaku, ampa'paan sapa sé tinerima-Na a Yaku, siituo en cua-Na oka ai camu.

Yohanes 16:14 ပူးပေါင်းရင်းမြစ်များ

Yohanes 14:21

Si séike' en tumerima im peré-perénta-Ku wo pengaémaanna, sia itu mengaupus Yaku. Si séike' si mengaupus Yaku, sia itu icaupus oka i Amang-Ku, wo sia ka'i icaupus-Ku oka. Wo ituru'-Ku oka ai sia si séi Aku.”

Yohanes 15:26

Taan yutus-Ku oka ai camu si Matawang asi Amang owo. Siao si Roh Le'nas si maali icamu asi sususuien wutul andumoro' i Amang Kasuruan. An tutuw-Na i maai, Sia méé oka ing kasairian andumoro' Yaku.

Yohanes 7:39

An tutuw i Yesus kumua andumoro' in dano itu, eng kaangéanna e Roh i Amang Kasuruan teriman oka é tou maéman. Taan e Roh itu ra'ipé' aiwéé a sé tou maéman, ampa'paan em papaté ra'ipé' pinendam i Yesus wo ra'ipé' niangkai angé an tampa-Na si parayo-rayo wo pasiri-siriin an sorga.

1 Korintus 12:3

Ampa'paano in itu, musti kailekan iow sapaoka si tou paakinen i Roh i Amang Kasuruan, sia ra'ica kawisa kumua in tana'i, “Kinutuko si Yesus!” Taniitu ka'i ra'ica wana mandé esake' tou e ro'na kumua “Si Yesus itu Kasuruan” sa sia ra'ica pakaakinen i Roh Le'nas.

2 Korintus 4:6

Indior si Amang Kasuruan icumua in tana'i, “Asi kariréimbengan mantangai en sendot.” Intarépé' Siao ka'i iméma' in sendot-Na matélang an untep in atéta. Ampa'paano in sendot-Na si an untep in atéta, ro'na kailekanta eng kawangko' i Amang Kasuruan si masendot ang gio i Kristus.

Galatia 5:5

Taan kita maarap nianggap-Na wutul ampa'paan ing kawasa i Roh Le'nas wo ampa'paan im paémanenta a si Kristus.

1 Petrus 2:7

Si Yesus Kristus uli-ulit sosor em bééna torona é tou maéman ai Sia. Taan sé tou ra'ica maéman, tantu icawangkur, tanu si aipatic ang Kitap Le'nas tana'i, “Watu aitiya' é bas, imamualio watu patuuran si kumataré-taré.”

1 Yohanes 3:23

Wo si anio' em perénta-Na: Kita musti maéman a si Toyaang-Na Yesus Kristus wo kita ka'i musti meupu-upusan tanu en aiperénta i Yesus Kristus ai cita.

1 Yohanes 5:20

Kailekanta ka'i sa si Toyaang i Amang Kasuruan imayo wo mééo ing kakailekan ai cita wosama' katuusanta si Amang Kasuruan si Wutul. Wo kita menonou meesao wo si Amang Kasuruan si Wutul itu, ampa'paan kita esa wo si Toyaang-Na Yesus Kristus. Si Yesus itu Kasuruan si Wutul wo Siake' e méma' sé tou ro'na menonou akar ing kauré-uré.

1 Yohanes 5:6

Si Yesus Kristus imayo ang kayo'baan ang karapi in dano ipabaptis-Na wo in enda' im papaté-Na. Sia maai ra'ica ang karapi in danoke', taan ang karapi in dano wo in enda'. Wo e Roh i Casuruan in esa e méé kasairian sapaoka pakasa en itu wutul.

Wahyu 19:10

Wo aku kumundu an dior ing kécéi i malaékat itu en sumiri' sia, taan icuana a yaku, “Tioo ko méma' taniitu a yaku! Ampa'paan yaku asaloke' ata i Amang Kasuruan kaputému wo kaputé é poo-poowmu an esa paémanen sé masairi andumoro' i Yesus. Apoono mangé si Amang Kasuruan, ampa'paan eng kasairian i Yesus ituo e méma' sé tou mengakua in Taar i Amang Kasuruan.”