Yohanes 15:20 - En Taar Weru a nunuwu' é Tontemboan

²⁰ Ta'néieno mangé sapa sé aicua-Kuo ai camu: Si esa ata ra'ica lumébémai wo si tuangna. Sa séra imokoio Yaku, séra ka'i mokoi oka icamu. Sa émaan éra en taar-Ku, émaan éra oka ka'i sé aicua miow.

Yohanes 15:20 ပူးပေါင်းရင်းမြစ်များ

Matius 10:24

Kailekan iow ra'ica wana murit en lumébémai wo si guruna. Wo ra'ica wana ata en lumébémai wo si tuangna.

Markus 10:39

Isowat éra, “Kawooan ami é Guru!” Isowat i Yesus ai séra, “Wutul, kamu melep oka a si paelepan si musti elepen-Ku wo baptisen ang karapi im baptisan si musti teriman-Ku.

Lukas 2:34

Wo si Simeon sumombayang mangilek a si Amang Kasuruan wosama' méé mai ing kamang ai séra. Wo icuana a si Maria inang i Toyaang itu, “Maria, si Toyaang anio' aitantuo i Amang Kasuruan e mai mukum sé kelian tou Israel sé ra'ica maéman a si Casuruan wo mai lumowir kelian tou Israel sé maéman ai Sia. Wo si Toyaang anio' mamuali oka tuus tanu popokéi i Amang Kasuruan a sé tou iméma' ing kamesé-meséaan. Taan Sia icélong oka é tou keli.

Lukas 6:40

Taniitu ka'i ra'ica wana murit en lum mai wo si guruna. Taan sa si murit itu itumamato an sicola, sia imeputéo wo si guruna.

Yohanes 10:31

An tutuw é tou Yahudi luminga si Yesus icumua in taniitu, séra mitong ka'i watu em basa éra mangkil woo Sia.

Yohanes 11:57

Séra mengkung-kuanan taniitu, ampa'paan sé kikiiten é imam wo sé tou Farisi imééo perénta sa awéan tou e makailek am bisa si Yesus, mai cua ai séra wosama' Sia ro'na tangkaan éra.

Yohanes 13:16

En ulitna icua-Ku mangé ai camu, si esa ata ra'ica lumébémai wo si tuangna, kuma'pa si esa tou ayutus ra'ica lumébémai wo si tou si mutus sia.

Yohanes 5:16

Ampa'paan in itu, sé kikiiten é Yahudi rumaméji mokoi si Yesus, ampa'paan sinama'-Na si tou asi endo Sabat.

Yohanes 7:32

Kalingaan é tou Farisi, keli tou mengkeng-kewitan andumoro' si Yesus. Ampa'paan in ituo, iru'du' é kikiiten é imam wo sé tou Farisi sé matéir am Balé Le'nas en tumangka' si Yesus.

Yohanes 8:51

En ulitna icua-Ku mangé ai camu, si séike' e makiit in aicua-Ku sia ra'ica maté akar ing kauré-uré.”

Yohanes 8:52

Wo icua é kikiiten é agama Yahudi ai Sia, “Intarépé' kailekan ami sa Ico anio' rinasuk i sétang! Si Abraham imatéo wo sé nabi ka'i imatéo, taan pakua-Mu si séike' e makiit i nunuwu'-Mu, sia ra'ica maté akar ing kauré-uré.

Yohanes 8:59

An tutuw é tou Yahudi luminga en aicua i Yesus itu, séra mitong watu e mangkil Sia, taan si Yesus ra'io ka'i kaséréanai wo itela'u-Na em Balé Le'nas.

Kisah Para Rasul 14:22

An tampa-tampa itu, si Paulus wo si Barnabas kumeter in até é tou maéman wo sumina'u iséra wosama' le'tek am paémanen. Wo icua i Paulus wo si Barnabas, “Sa kita masalé' mamuali tou i Amang Kasuruan si Kumawasa tanu Kolano, kita musti meta'up ing keli kawenduan.”

1 Korintus 4:12

Kami matawoi ang karapi ing keter ami in esa torona ing katouan ami. Sa awéan tou mangawa'ba' icami, pekiupusen ami a si Amang Kasuruan eng kumamangai séra. Sa awéan tou maokoi icami, sarun ami ang karapi in talesen wo ra'ica suliin ami.

2 Korintus 4:9

Kelian sé maokoi icami, taan ra'ica aiwaya-Na kami oka in esa. Kami makakeli papangkuren akar icare'ba, taan icami ra'ica maté.

1 Tesalonika 2:15

Sé tou Yahudi sé mengaokoi itu ra'ica mengaéma' ing kasalé'an i Amang Kasuruan. Indior pinaté éra sé nabi wo si Apo' Yesus wo kami okoien éra ka'i wo yusér éra. Wo pakasa en tou nianggap érao kaséké'.

2 Timotius 3:12

Mémang pakasa in tou maéman a si Kristus Yesus wo kumiit ing kasalé'an-Na meta'up oka in okoi.