Yohanes 12:16 - En Taar Weru a nunuwu' é Tontemboan

¹⁶ An tutuw i Yesus muntep an Yerusalem makalukut am bawo i celedai wo'bas, sé murit-Na ra'ipé' makailek ing kaangéan im pakasa eng kamamualian itu. Taan kekawus i Yesus tinou sumawel am papaté wo iparayo-rayo wo pasiri-siriin, kata'néiano éra pakasa sé imamualio a si Yesus itu wo kinailekano éra e nats itu aipatico ang Kitap Le'nas.

Yohanes 12:16 ပူးပေါင်းရင်းမြစ်များ

Markus 16:19

Makanuwu' mako si Apo' Yesus a sé murit-Na, Sia icaangkai angé an sorga wo lumukut ang kakan i Amang Kasuruan.

Markus 9:32

Ra'ica kaangéan éra sé airoma'-Na itu, taan séra kenengke' i mamuéi ai Sia.

Lukas 18:34

Pakasa sé aicua i Yesus itu ra'ica kaangéan é murit-Na, eng kaangéan i nunuwu'-Na itu ipakaenepé' ai séra. Wo ra'ica kailekan éra si Yesus icumua andumoro' in sapa.

Lukas 24:25

Wo icua i Yesus ai séra in dua, “Kamu anio' taloso bodok. Taloso ngenger en até miow e mercaya pakasa sé aicuao é nabi ang Kitap Le'nas.

Lukas 24:45

Wo émaan-Na em pakawerot éra mawuka' akar ro'na kailekan éra sapa sé aipatic ang Kitap Le'nas.

Lukas 9:45

Taan ra'ica kaangéan é murit i Yesus sapa en aicua-Na itu. En aicua i Yesus itu icaenepé' wosama' en itu ra'ica kailekan é murit-Na. Wo séra kenengke' mamuéi andumoro' in itu a si Yesus.

Yohanes 12:23

Wo icua i Yesus ai séra, “Maayo en témpona si Toyaang i Tou iparayo-rayo wo pasiri-siriin.

Yohanes 14:26

Taan si Matawang si yutus oka mai i Amang-Ku ai camu en sumawel Yaku, Siao si Roh Le'nas. Sa Sia maai, isusui-Na oka em baya-waya ai camu wo ita'néi-Na ai camu im baya sé aicua-Kuo ai camu.

Yohanes 17:5

Wo intarépé', o Amang, émaano mai Aku iparayo-rayo wo pasiri-siriin an dior-Mu, ang karapi i rarayo wo en sisiri' si a Yakuo mewali-wali wo si Amang an tutuw eng kayo'baan anio' ra'ipé' niéma'.

Yohanes 2:22

Ampa'paano in itu, an tutuw i Yesus tinou sumawel an uner é tou imaté, kata'néiano é murit-Na sapaoka en itu sumangkumo aicuana-Na. Wo percayan érao ka'i sapa sé aipatic ang Kitap Le'nas wo e nunuwu' sé aicuao i Yesus.

Yohanes 7:39

An tutuw i Yesus kumua andumoro' in dano itu, eng kaangéanna e Roh i Amang Kasuruan teriman oka é tou maéman. Taan e Roh itu ra'ipé' aiwéé a sé tou maéman, ampa'paan em papaté ra'ipé' pinendam i Yesus wo ra'ipé' niangkai angé an tampa-Na si parayo-rayo wo pasiri-siriin an sorga.

Kisah Para Rasul 2:33

Intarépé', si Yesus niangkaio mangé i Amang Kasuruan ang kakan-Na an tampa pasiri-siriin wo tumerimao i Roh Le'nas si aijanji-Nao indior. E Roh Le'nas itu, iwéé-Nao ka'i ai cami, si sinéré wo liningao miow am bia'i.

Kisah Para Rasul 2:36

Ampa'paano in itu pakasa sé tou Israel musti wutu-wutul makailek sapaoka si Yesus si aipaku miow ang kayu salip itu, Siao si niangkai i Amang Kasuruan mamuali Kasuruan wo Kristus.”

Kisah Para Rasul 3:13

Si Amang Kasuruan si pengaapo'an é apo-apo'ta Abraham, Ishak wo si Yakub, Siao e méma' si Yesus ata-Na itu iparayo-rayo wo pasiri-siriin. Si Yesus ituo si aisarakan iow wo aicélong iow an dior i Pilatus em patén, mandé ka'i si Pilatus e musé'o e mekar woo Sia.

Ibrani 12:2

Am papekowaan anio', mayoo kiitenta ang karapi im beren si asalo makatéinteng angé a si Yesus, ampa'paan Siao si maakin im paémanenta a si Amang Kasuruan wo si makawali im paémanenta makaleke-lekep. Sia talesen pengaokoien akar maté ang kayu salip, ra'ica pandungen-Na em pengaroros ampa'paan kailekan-Na sapaoka makasangkum ako im pakasa in itu awéan kaaruian si aitu'tulo ai Sia. Intarépé' Sia makalukut ang kakan im palukutan pasiri-siriin i Amang Kasuruan.

Ibrani 8:1

Si penting keli asé im pakasa sé pepaarenta anio', sapaoka kita makaanu Imam Wangko' si ra'io cakua si makalukut ang kakan im palukutan pasiri-siriin i Amang Kasuruan si Mangko-wangko' an sorga.