Yakobus 4:1 - En Taar Weru a nunuwu' é Tontemboan

¹ Kéitu réén kamu meindo-indoan roma' wo meréndé-réndéran? Ra'ica réén ampa'paan ing kasalé-salé'an sé ra'ica loor imapetokol an owak iow?

Yakobus 4:1 ပူးပေါင်းရင်းမြစ်များ

Matius 15:19

Ampa'paan an até owo lumembo mai waya em bewerot léwo', mengapaté tou, mengasina, mengacabul, mengarombit, mengasairi in towo wo mengaojat.

Yohanes 8:44

Si kikiiten é sétango si amang iow, wo icasalé' miow mengaéma' sapa si casalé' i amang iow. Tumo'tolai indior akar intarépé' sia mapaté sé tou, wo ra'ica kiimna mengaéma' in sususuien wutul, ampa'paan en sususuien wutul ra'ica an aténa. Casalé'na mengatowo ampa'paan in ituo em peri aselina. Sia kotowo wo palemboian waya in towo.

Roma 7:23

taan an owakku awéané' kawasa walina mapetokol wo ing kasalé'anku eng kumiit in ukum i Amang Kasuruan itu. Ang kasomoiana aku rinantéo ing kawasa ing kamesé-meséaan si an untep in owakku.

Roma 7:5

Ampa'paan, indior kita menonoué' makiit ing kasalé'anta sé léwo'. An tutuw itu kita pakakawasané' ing kasalé'an léwo' itu, wo kailekanta en itu suméa' ampa'paan aipatic an ukum Torat, taan eng kasalé-salé'an itu tatap matawoi an owakta akar kita méma' ing kamesé-meséaan si makawali cita am papaté.

Roma 8:7

Wo sé tou pakakawasané' ing kasalé'an in owak in esa, séra menséké'an wo si Amang Kasuruan, ampa'paan séra ra'ica le'tek an ukum i Amang Kasuruan. En ulitna en ukum itu ra'ica kaémaan éra.

Galatia 5:17

Ampa'paan eng kasalé'an léwo' an owak tatapke' mensunduran wo ing kasalé'an i Roh Le'nas. Wo eng kasalé'an i Roh Le'nas mensunduran wo ing kasalé'an léwo' an owak. Sé rua itu mensali'si'anke', akar ra'ica kaémaan iow in andumoro' sé loor sé wutu-wutul icasalé' miow émaan.

Kolose 3:5

Ampa'paano in itu tiya'o waya eng kasalé-salé'an in owak ang katouan iow, tanumai, mabersina, najis, kasalé'an in owak andumoro' in cabul, kasalé'an léwo', longi' am baya-waya si ro'na ipeputé wo i mengaapo' a sé opo-opo'.

2 Timotius 2:23

Tioo ko meindo-indoan roma' andumoro' i roroma' sé ra'ica wutul wo ra'ica patus. Kailekanmu sa meindo-indoan roma' taniitu mengaéma' ing kaperéndéran é tou.

Titus 3:3

Kailekanmu é Titus, indior kita ra'ipé' makailek sapa-sapa. Ampa'paan in itu kita ra'ica le'tek a si Amang Kasuruan, icasélé'kow wo kinatawéranke' mengaéma' in léwo', kita mamuali ata ing kasalé'an ing kayo'baan si asalo maarui in owak in esa, kita menonou mengéma-ngéma'ke' in léwo', kokanat a sé tou walina, bengis, mengkasuutan asi esa wo sé walina.

Titus 3:9

Wo ko ra'ica toro mapaar im papaaren sé ra'ica wana torona wo andumoro' in sisisilen taranak é apo-apo' miow, ra'ica toro meindo-indoan roma'. Wo ko ka'i ra'ica toro meréndéran andumoro' in ukum Torat. Ampa'paan pakasa en itu ra'ica wana torona wo uli-ulit ra'ica wana torona.

Yakobus 1:14

Sa awéan tou katawéran maéma' in léwo', en itu ampa'paan sia kumiit ing kasalé'anna in esa mengaéma' in léwo'.

Yakobus 4:3

Kuma'pa kamu masombayang taan ra'ica imakéré sapa-sapa ampa'paan em paawo-awon iow an sombayang suméa'. Em pinangilek iow itu asaloke' masalé' ka'pun iow e marui in owak iow in esa.

1 Petrus 1:14

Kamu musti le'tek a si Amang Kasuruan meputé si toyaang le'tek a si amangna, wo ra'io toro kawasan ing kasalé'an in owak sé ra'ica wutul sé an owak iow indior an tutuw iow ra'ipé' makatuus si Casuruan.

1 Petrus 2:11

Poo-poow sé icaupusku, icamu anio' sakéi wo imanangkéi ang kayo'baan anio'. Anaé, sina'uenku kamu wosama' tumayang angé asé kasalé-salé'an in owak sé ra'ica loor sé mapetokol an até weresi miow.

2 Petrus 2:18

Séra menganuwu' mapaké i nunuwu' mengaangkai in owak wo ra'ica wana torona. Wo em pasusui éra ka'i andumoro' ing kasalé'an in owak mabersina en tumawér sumawel sé tou sé ra'ipé' uré icumesot an uner é tou sé mengakiit in sususuien ra'ica wutul itu.

2 Petrus 3:3

Kataré-taré si musti kailekan iow tana'i: asé endo-endo matawio kaka'puan ing kayo'baan, mapaturu' oka mai sé tou eng katouan éra pakakawasan ing kasalé'an in owak éra in esa sé ra'ica wutul, séra maai oka suméro' icamu.