Yakobus 3:17 - En Taar Weru a nunuwu' é Tontemboan

¹⁷ Taan si tou awéan kapinteran asi Amang Kasuruan owo itu, tana'i: Kataré sia menonou ang karapi in até weresi wo masalé' meelu-eluran wo sé tou, sama' a sé tou, téés, wuta ing kaupusan a sé tou wo mengéma-ngéma' andumoro' sé loor, ra'ica marapit wo ra'ica punek.

Yakobus 3:17 ပူးပေါင်းရင်းမြစ်များ

Matius 23:28

Tanu siituo ka'i em peri miow, pakasérén kéndo' tanuoka sé tou maéma' im butul, taan en até miow mawuta-wuta ing kapunekan wo ing kaléwo'an.

Matius 5:8

Pakakamangen sé tou le'nas en aténa, ampa'paan séra suméré oka si Amang Kasuruan.

Matius 5:9

Pakakamangen sé tou sé maali-ali ing kaeluran a sé tou walina, ampa'paan séra tuulen oka toya-toyaang i Amang Kasuruan.

Lukas 21:15

Ampa'paan, émaan-Ku oka kamu pinter manuwu' wosama' kamu ra'ica kasunduran wo ra'ica ro'na icélong é kaséké' miow.

Lukas 6:36

Mengaupus angé kamu a sé tou walina kaputé si Amang iow an sorga taupus a sé pakasa sé tou.”

Yohanes 1:14

Wo en Taar itu mamualio tou wo Sia mento' an unerta. Wo sinérétao eng kawangko'-Na itu, si tinerima-Nao asi Amang owo ampa'paan Sia Toyaang-Na in Esa-esa. Ampa'paan en Taar si mamualio tou itu, kinailekantao andumoro' in upus aitambér i Amang Kasuruan wo in sususuien wutul-Na.

Yohanes 1:47

An tutuw i Yesus suméré si Natanael maai ai Sia, icua i Yesus, “Sérén, siao si wutu-wutul tou Israel. Si tou anio' ra'ica mengauwak sé tou walina.”

Kisah Para Rasul 11:24

Si Barnabas itu tou sama', kinawasa i Roh Le'nas wo ka'i wutu-wutul maéman a si Casuruan. Ampa'paano in itu kelian tou sé iluminga in sina'una mamuali maéman a si Apo' Yesus.

Kisah Para Rasul 9:36

An Yope, awéan si esa wéwéné makangaran Tabita, a nunuwu' é Yunani sia patuulen Dorkas. Sia mengéma-ngéma' andumoro' sé loor wo pengatawangenna sé tou lengéi.

Roma 12:18

Sa woo ro'na, rumaméjio mangé kamu menonou elur ang karapi é pakasa sé tou.

Roma 12:9

Mengaupus angé sé kakélé tou ang karapi in lekep en até. Tumayango mangé ang kaléwo-léwo'an, wo mengéma-ngéma'o mangé sé loor.

Roma 15:14

Poo-poowku an esa paémanen, uli-ulit percayanku sapaoka kamu iméma'o ing keli kalooran. Kamu ka'i kelio eng kakailekan andumoro' in sususuien i Amang Kasuruan, wo makawoo mensin-sina'uan si esa wo si esa.

1 Korintus 12:8

A si esa tou winéanai kamang aitambér i Roh e manuwu' mapaké ing kapinteran asi Amang Kasuruan owo. Wo a si Roh meputé ka'i, sé tou walina winéanai kamang aitambér i Roh e manuwu' mapaké ing keli eng kakailekan.

2 Korintus 10:1

Awéan ai camu makua sapaoka aku toloindé' en tumegor sa ang karapi miow, taan branike' tumegor sa mentayangan wo icamu. Ampa'paan in ituo ita'néiku ai camu ang karapi i ngaran i Kristus si ko'kos en até wo sama' en até,

2 Korintus 6:6

Mandé ka'i in taniitu, kami menonou ang karapi in até weresi, makailek sé andumoro' in Taar i Amang Kasuruan, talesen, sama' en até. Em paturu' ami sapaoka kami ata i Amang Kasuruan. Wo kami ka'i mamangén a si tatawang i Roh Le'nas wo mengaupus sé tou ang karapi in lekep en até,

2 Korintus 7:11

Anaé, intarépé' séréno sapa sé imamuali ai camu ampa'paano ing kawenduan si casalé' i Amang Kasuruan itu. En itu, iméma' icamu lébé mauli-ulit kumiit ing kasalé'an i Amang Kasuruan; wo kamu rumaméji méé tuus sapaoka kamu ra'ica meséa'; kamu masuut wo maindé' mengaéma' ing kamesé-meséaan; kamu lébé lumelo wo makaincaya' méma' sapa sé loor wo ra'ica marapit ; wo kamu méé ukuman a sé tou meséa'. Anaé, kamu itumuru'o in tuus, kamu ra'ica meséa' am pakasa in itu.

2 Korintus 9:10

Si Amang Kasuruan en tumu'tul in lulumbo torona i menganguma wo tumu'tul ing kakanen eng kanenta. Taniitu ka'i tu'tulen-Na wo émaan-Na oka makeli en lulumbo miow, wosama' kamu tatap mengéma-ngéma' im butul.

Efesus 5:9

ampa'paan sa kamu menonou an sendot em pengaémaan iow asalo andumoro' sé loor, sé ra'ica marapit wo sé wutul.

Filipi 1:11

Isombayangku ka'i wosama' pengéma-ngémaan iow sé nianggap wutul i Amang Kasuruan ampa'paan si Yesus Kristus imatawoi ang katouan iow. Wo in taniitu si Amang Kasuruan oka si parayo wo pasiriin.

Filipi 4:8

Anaé, é poo-poow, icuaku mangé ai camu, pakasa sé paanggapen wutul i Amang Kasuruan, pakasa e rarayo wo in sisiri', pakasa sé ra'ica marapit, pakasa sé le'nas, pakasa sé loor, pakasa sé manam pengalingan, pakasa sé patus paangkaian im bawangko' wo patus iparayo, weroteno mangé sumama-sama' en itu.

Kolose 1:10

Wo in taniitu kamu patus menonou an dior-Na wo maarui in até-Na am baya-waya wo ro'na méé im buéna loor am pakasa im pengaémaan wo makaawes makatuus si Amang Kasuruan.

1 Tesalonika 2:7

Taan ituru'o ami eng kasama-samaan ami ai camu an tutuwta mewali-wali, tanu si inang maurus si toyaangna.

1 Timotius 5:21

Timotius, iwééku en tawoien anio' ai co an dior i Amang Kasuruan wo si Kristus Yesus wo sé malaékat sé sinisir-Nao. Pangilekenku ai co wosama' émaano waya sé aicuaku anio' an jamaat wo ra'ica marapit.

2 Timotius 2:24

Taan si tou matawoi torona i Casuruan tanu ico ra'ica toro meindo-indoan roma' taniitu. Aweso taré si tou itu musti sama' a sé pakasa in tou, pandéi masusui wo ka'i talesen a sé pakasa in tou.

Titus 1:15

A sé tou le'nas an dior i Casuruan, sapake' waya en émaanna le'nas. Taan sé tou najis wo sé ra'ica maéman a si Casuruan, em pawasan wo em pengaémaan éra ra'ica loor ampa'paan en até wo em bewerot éra najis.

Titus 3:2

Musti ita'néimu mangé ai séra, ra'ica toro mengawuruk i ngaran é tou walina wo ra'ica toro meindo-indoan roma'. Aweso taré em peri éra musti loor wo ka'i ko'kos en até a sé im pakasa in tou.

Ibrani 12:11

Wutul, an tutuw kita tinepian, en atéta ra'ica mendam in arui asaloke' mendam in susa. Taan an tutuw in tinepian in taniitu kita maroba oka, akar em perita maloor wo eng katouanta maelur.

Ibrani 12:14

Rumaméjio menonou meelu-eluran ang karapi é pakasa in tou, wo rumaméji ka'i menonou le'nas. Ampa'paan sa si tou ra'ica menonou le'nas, sia ra'ica suméré si Amang Kasuruan sa.

Yakobus 1:17

Pakasa sé loor wo lekep, mai an dangka' owo, asi Amang an sorga. Siao e méma' waya sé mengasendot an langit. Sia ra'ica kawisa mawalina, ra'ica tanu in serap wo sé sumesendot, en sendotna ro'na mawalina.

Yakobus 1:5

Sa awéan esaan ai camu mendam wayapé' im pira eng kapinteran asi Amang Kasuruan owo, aweso taré sia mangilek angé a si Amang Kasuruan. Wo énan-Na oka mai em pinangilek itu. Ampa'paan si Amang Kasuruan mengawéé a sé im pakasa in tou ang karapi ing kasamaan in até, ra'ica mengaimbo'.

Yakobus 2:13

Sa an témponao si Casuruan mai makim sé tou, Sia ra'ica kawisa tumuru' ing kaupusan a sé tou sé ra'ica wana kaupusan a sé tou walina. Taan sé tou mengaupus sé tou walina, séra ra'ica makéré in ukumen asi endo pengaakiman.

Yakobus 2:4

E niéma' miow itu mamualio tuus sapaoka ra'ica pengapeputén iow masiri' in tou wo tanu mamualio akim ang karapi i mawasa in léwo'.

Yakobus 3:15

Sa eng kapinteran iow tanuke' siitu, eng kapinteran itu ra'ica asi Amang Kasuruan owo taan asi cayo'baan anio' owo, ang kasalé'an in owak owo wo asé sétang owo.

Yakobus 4:8

Rumaméjio mangé rumuru a si Amang Kasuruan, wo kamu rurun-Na oka mai. Wu'asanno mio' eng kama miow, éi kamu sé tou iméma' ing kamesé-meséaan! Le'naseno mangé en até miow, éi kamu sé marua-rua até.

1 Petrus 1:22

Kamu lume'naso in owak iow ang karapi in le'tek mengaéma' in sususuien wutul i Amang Kasuruan, akar kamu makawoo mengaupus sé poo-poow an esa paémanen ang karapi i mauli-ulit. Anaé sina'uenku kamu wosama' kamu meupu-upusan ang karapi in lekep en até.

1 Petrus 2:1

Ampa'paan in ituo kamu ra'io toro mengéma-ngéma' pakasa ing kaléwo'an, pakasa sé mengauwak, pakasa sé punek, menii-niim ing kasuutan wo mengaléwo' i ngaran é tou walina.

1 Petrus 2:18

Éi camu ata-ata! Kamu musti male'te-le'tek angé ang karapi wuta in siri' a sé tuangmu wo tawoieno mangé sapa sé airu'du'na. Émaano mangé en itu ra'icake' a si tuang sama' wo ko'kos en até taan ka'i a si tuang si luméwo-léwo'.

1 Yohanes 3:18

Toya-toyaangku, tioo kita ma- upus asaloke' am ba'ba' kuma'pa asaloke' a nunuwu', taan mayoo kita meupu-upusan ang karapi im pengaémaan wo lekep en até.

1 Yohanes 3:3

Sé tou maarap tanu siitu ai Sia, musti téiranna sumama-sama' eng katouanna wosama' le'nas meputé wo si Kristus itu le'nas.