Yakobus 3:15 - En Taar Weru a nunuwu' é Tontemboan

¹⁵ Sa eng kapinteran iow tanuke' siitu, eng kapinteran itu ra'ica asi Amang Kasuruan owo taan asi cayo'baan anio' owo, ang kasalé'an in owak owo wo asé sétang owo.

Yakobus 3:15 ပူးပေါင်းရင်းမြစ်များ

Lukas 16:8

Wo si tou mengaurus in doit péngkor en até itu iparayo i tuangna ampa'paan sia pandéi maéré-éré lalan torona ing kalooranna in esa. Mémang wutul, sé tou makiit ing kasalé'an ing kayo'baan, séra en lébé pandéi maéré-éré lalan torona ing kalooran éra in esa wotaré sé tou makiit ing kasalé'an i Amang Kasuruan.

Yohanes 3:17

Ampa'paan si Amang Kasuruan mutus si Toyaang-Na ang kayo'baan ra'ica mai makim sé tou iméma' ing kamesé-meséaan, taan Sia mai en lumowir sé tou an ukuman ing kamesé-meséaan éra.

Yohanes 8:44

Si kikiiten é sétango si amang iow, wo icasalé' miow mengaéma' sapa si casalé' i amang iow. Tumo'tolai indior akar intarépé' sia mapaté sé tou, wo ra'ica kiimna mengaéma' in sususuien wutul, ampa'paan en sususuien wutul ra'ica an aténa. Casalé'na mengatowo ampa'paan in ituo em peri aselina. Sia kotowo wo palemboian waya in towo.

Kisah Para Rasul 13:10

wo kumua, “Éi toyaang i kikiiten é sétang! Ico wuta in uwak sé membam-balinaan wo ing kaléwo'an. Pakasa sé wutul pasundurenmuke'. Kéitu réén ra'ica yento'mu mengaléwo' im pawasan i Amang Kasuruan si mai lumowir sé tou?

Roma 1:22

Paweroten éra sapaoka séra wuta ing kapinteran, taan en ulitna séra itu imabodoko.

1 Korintus 1:27

Si Amang Kasuruan tumutu' sumisir tou sé paweroten ing kayo'baan tou bodok, e mapalawi' sé tou paweroten ing kayo'baan tou awéan kapinteran. Wo sinisir-Na ka'i sé tou paweroten ing kayo'baan tou ra'ica wana kakawasaan e mapalawi' sé tou sé paweroten ing kayo'baan tou makaanu ing kakawasaan.

1 Korintus 2:14

Si tou ra'- ica pengaakinen i Roh i Amang Kasuruan, ra'ica mengaterima sé ipakua i Roh i Amang Kasuruan, ampa'paan paanggapenna sé ipakua i Roh itu ra'ica wana torona. Wo en itu ra'ica kaangéanna, ampa'paan wayake' si tou makaanu i Roh i Amang Kasuruan e ro'na makaangé andumoro' in itu.

1 Korintus 3:19

Ampa'paan sé paweroten é tou ang kayo'baan kapinteran, en itu paweroten bodok i Amang Kasuruan. Ang Kitap Le'nas aipatic in tana'i, “Awéan sé tou paweroten ing kayo'baan pinter, taan pinaké i Amang Kasuruan eng kapinteran éra itu eng kumala iséra.”

1 Korintus 3:3

ampa'paan akar intarépé' kamu makiité' im pakawerot ing kayo'baan. Icuaku in taniitu, ampa'paan an uner iow awéané' sé kokanat wo meindo-indoan roma'. En itu mamuali tuus sapaoka kamu makiité' im pakawerot ing kayo'baan wo menonou asalo makiit ing kasalé'an in tou.

2 Korintus 1:12

Kami marayo, sapaoka eng katouan ami asi cayo'baan anio', linangkoio ami ang karapi in lekep en até wo rondor en até. Kami menonou tanu siitu wuntulke' im paesaan wo icamu. Siituo eng kasairian in até weresi ami. Niéma' ami en itu, ra'ica ang karapi ing kapinteran é tou, taan ang karapi in upus aitambér i Amang Kasuruan.

2 Korintus 11:3

Taan en caindé'ku em bewerot iow kauwakan akar ra'io ka'i wutu-wutul le'tek a si Kristus, kaputé i Hawa indior ka'i kinatawéran i ula' ampa'paano im pakauwak i ula' itu.

Filipi 3:19

Sé tou menonou tanu siitu ukumen oka i Amang Kasuruan akar ing kauré-uré. Séra menonou asaloke' makiit ing kasalé'an in owak éra in esa. Séra tirayo mengaéma' in sapa sé kalawiin. Séra mawerotke' andumoro' sé ang kayo'baan anio'.

2 Tesalonika 2:9

Wo si tou luméwo-léwo' itu mapaturu' mai maké ing kawasa i kikiiten é sétang wo sia muwak sé tou ang karapi in tumuru' in tuu-tuus kakaya'kaan sé kalinteren wo kala'meren oka mai.

1 Timotius 4:1

Icua i Roh Le'nas ang karapi i mauli-ulit, sa matawio en endo kaka'puan ing kayo'baan, awéan oka tou sé maémano a si Casuruan, ra'io ka'i maéman ai Sia. Sé tou itu makiit oka sé sétang wo masélé'kow in tou wo ka'i mengaéma' oka in sususuien é sétang.

Yakobus 1:17

Pakasa sé loor wo lekep, mai an dangka' owo, asi Amang an sorga. Siao e méma' waya sé mengasendot an langit. Sia ra'ica kawisa mawalina, ra'ica tanu in serap wo sé sumesendot, en sendotna ro'na mawalina.

Yakobus 1:5

Sa awéan esaan ai camu mendam wayapé' im pira eng kapinteran asi Amang Kasuruan owo, aweso taré sia mangilek angé a si Amang Kasuruan. Wo énan-Na oka mai em pinangilek itu. Ampa'paan si Amang Kasuruan mengawéé a sé im pakasa in tou ang karapi ing kasamaan in até, ra'ica mengaimbo'.

Yakobus 3:17

Taan si tou awéan kapinteran asi Amang Kasuruan owo itu, tana'i: Kataré sia menonou ang karapi in até weresi wo masalé' meelu-eluran wo sé tou, sama' a sé tou, téés, wuta ing kaupusan a sé tou wo mengéma-ngéma' andumoro' sé loor, ra'ica marapit wo ra'ica punek.

Yudas 1:19

Séra ituo sé mengaéma' sé tou maéman mengkaréndéran akar i mentanéan. An owak éra ra'ica wana Roh Le'nas wo séra menonou makiitke' ing kasalé'an ing kayo'baan.

Wahyu 12:9

Si naga wangker ituo si ula' matu'a, si patuulen kikiiten é sétang kuma'pa Roh léwo', si mengasélé'kow pakasa in tou ang kayo'baan. Sia itu aiténdél ang kayo'baan mewali-wali wo sé malaékatna.

Wahyu 2:24

Taan awéané' sé tou walina ai camu an Tiatira sé ra'ica makiit in sususuien i Izebel, wo ra'ica masalé' makailek andumoro' si kikiiten é sétang. Wo ra'ica kiim-Ku méé im pamuléngen walina ai camu

Wahyu 9:11

Wo séra awéan kolano si maperénta, siao si malaékat mengatéir ing kepal im papaté. E ngaran i colano itu “Abadon” a nunuwu' é Ibrani, wo “Apolion” a nunuwu' é Yunani.