Yakobus 2:18 - En Taar Weru a nunuwu' é Tontemboan

¹⁸ Taan awéan wona' tou makua, “Ico awéan em paémanen, taan aku awéan em pengaémaan.” Taan icuaku oka ai sia, “Tambisa réén ko ro'na tumuru' im paémanenmu sa ra'ica maéma' im butul a sé tou walina? Ituru'ku oka em paémanenku ang karapi maéma' im butul.”

Yakobus 2:18 ပူးပေါင်းရင်းမြစ်များ

Roma 14:23

Taan si tou marua-ruapé' wasa asi kakanen wo kuman ing kakanen itu, sia meséa'o an dior i Amang Kasuruan, ampa'paan ra'ica niéma'na kumiit im paémanenna. Sapake' mangé e niéma' i tou wo ra'ica kumiit im paémanenna, eng kaangéanna iméma'o ing kamesé-meséaan.

Roma 3:28

Anaé tana'i: Sé tou nianggap wutul i Amang Kasuruan ampa'paan séra maéman a si Yesus, ra'ica ampa'paan mengaéma' in ukum Torat.

Roma 4:6

En sususuien itu tanu si aicua i colano Daud indior. Aicuana, pakakamangen sé tou nianggap wutul i Amang Kasuruan ampa'paan im paémanenna, ra'ica ampa'paan im pengaémaanna. En aicuana tana'i,

Roma 8:1

Intarépé', kita sé meesao ang karapi i Kristus Yesus ra'io ka'i ukumen i Amang Kasuruan.

Roma 9:19

Intarépé' tantu awéan tou e mamuéi a yaku, “Sa si Amang Kasuruan en tumantu si séi em béan-Na ing kaupusan wo si séi si keté ro'kos, kéitu réén Sia méépé' kaséaan a sé tou keté ro'kos? Ampa'paan ra'ica wana tou e ro'na kumélong ing kasalé'an-Na!”

1 Korintus 13:2

Mandé ka'i aku tinambéranai ing kamang eng kumua in taar i Amang Kasuruan, makailek im pakasa sé paene-enep, makaanuo waya ing kakailekan, wo makaanu im paémanen lumeke-lekep e ro'na méra ing kuntung, taan sa aku ra'ica mengaupus sé tou walina, yaku uli-ulit ra'ica wana torona.

2 Korintus 5:17

Anaé, si séike' si maesao wo si Kristus, sia wutu-wutul mamualio tou weru. Em peri ing katouan uré ra'io wana ka'i. Pakasa eng katouanna imaweruo waya.

2 Korintus 7:1

Poo-poow sé icaupusku, pakasa en janji itu aituru' ai cita. Ampa'paan in itu mayo kita meresi in owak asé im pakasa sé mengakotor in owak wo i rohta. Wo mayo kita menonou le'nas torona i Amang Kasuruan ang karapi in lekep wo maindé'o mangé ai Sia.

Galatia 5:6

Ampa'paan torona é tou sé meesao wo si Kristus Yesus, sia sinunat kuma'pa ra'ica sinunat en itu ra'ica penting. Em penting am bia'i em paémanen si aituru' ang karapi in upus a sé tou walina.

1 Timotius 1:5

Sina'uku waya en anio' ai co wosama' sé tou meupu-upusan. Wo en upus itu musti lumembomai an até le'nas wo an até weresi owo wo am paémanen imauli-ulit.

Titus 2:7

Wo ko é Titus, em perimu musti mengaéma' in loor wosama' ko ro'na mamuali paandéan é tou. Sa ko sumusui, mengasusui angé ang karapi i makakii-kiit wo rondor en até.

Ibrani 11:31

Ampa'paan si Rahab si wéwéné sundal itu awéan paémanen, sia ra'ica mekiit pinaté kaputé é tou ang kotana sé ra'ica le'tek a si Amang Kasuruan, ampa'paan sinungkulna am baléna kerapi in elur sé mawere-weren é Israel.

Ibrani 11:33

Ampa'paan séra im baya awéan paémanen, akar awéan en icumala sé kakolanoan, awéan sé maperénta ang karapi ra'ica marapit, awéan sé makéré sapa si aijanjio i Casuruan, wo awéan ka'i sé kumetep im ba'ba' é singa,

Ibrani 11:6

Si tou ra'ica maéman a si Amang Kasuruan, sia ra'ica kawisa mako maarui in até-Na. Si tou mai a si Amang Kasuruan sia musti maéman sapaoka si Amang Kasuruan itu awéan, wo sia musti maéman ka'i sapaoka si Amang Kasuruan méé mai in laasa a sé tou sé uli-ulit mengaéré Sia.

Yakobus 2:14

Poo-poowku! Sa si tou kumua sia maéman a si Casuruan, taan ra'ica pengaémaanna en airu'du' i Casuruan, em paémanenna itu ra'ica wana torona. Ro'na réén em paémanen tanu siitu en lumowir sia?

Yakobus 3:13

Sa an esaan ai camu awéan kapinteran asi Amang Kasuruan owo wo keli eng kakailekan, musti ituru'na ang karapi i menonou in loor. Sia musti méma' in loor ang karapi ing kako'kosan in até si mai ang kapinteran i Casuruan owo.