Yakobus 1:21 - En Taar Weru a nunuwu' é Tontemboan

²¹ Anaé, itiya'o waya sé ra'ica wutul wo ka'i mentoo mengéma-ngéma' ing kaléwo'an' sé taloso keli itu. Terimano mangé en Taar i Casuruan ang karapi ing ko'kos en até. En Taar si ayusew an até miow awéan kawasa en lumowir icamu.

Yakobus 1:21 ပူးပေါင်းရင်းမြစ်များ

Matius 5:5

Pakakamangen sé tou ko'kos en até, ampa'paan séra makaanu oka ing kayo'baan.

Yohanes 6:63

Sé tou ra'ica makawoo méma' in owakna menonou akar ing kauré-uré. Wayake' i Roh i Amang Kasuruan e méma' si tou ro'na menonou akar ing kauré-uré. E nunuwu' sé aicua-Ku itu, nunuwu' i Roh-Na wo sé nunuwu' itu iméma' sé tou menonou oka akar ing kauré-uré.

Yohanes 6:68

Isowat i Simon Petrus ai Sia, “Tuang, asi séi oka en angéan ami? Wayake' si Apo' Yesus e mengakua in Taar andumoro' tumambisa kami menonou akar ing kauré-uré.

Kisah Para Rasul 10:33

Ampa'paan in ituo makala'us ru'du'ku tou mangé sumungkul si tuang. Wo si tuang mayo am bia'i ang karapi in arui en até. Intarépé', kami im baya am bia'io an dior i Amang Kasuruan, lingan amipé' sapa en aiperénta-Na a si tuang.”

Kisah Para Rasul 13:26

Poo-poowku sé icauntep an taranak i Abraham wo ka'i sé tou ra'ica Yahudi sé maapo' a si Amang Kasuruan! En abar ing kalowiran itu aicuao ai cita im baya.

Roma 1:16

Yaku ra'ica malawi' mengakua in Abar Kaaruien andumoro' i Yesus Kristus itu, ampa'paan en Abar itu awéan kaketeran i Amang Kasuruan en lumowir im pakasa sé tou maéman; kataré-taré sé tou Yahudi wo ka'i sé tou walina.

Roma 11:17

Anaé, em piraan pangana asi tuura in zaitun sé pinokolo, am bitu tampéngan im pangana asi tuura in zaitun walina, si ayandé icamu sé tou ra'ica Israel. Wo em panga-pangana walina itu aitampéng wosama' kumiit makéré kakanen asi a'mut in tuura in zaitun aseli si kumeli-keli seringa.

Roma 6:17

Anaé, makapulu'sama' a si Amang Kasuruan! Ampa'paan indior kamu ata ing kamesé-meséaan, taan intarépé' kamu icumiito ang karapi in lekep en até an sususuien sé aisusuio ai camu.

1 Korintus 15:2

Sa kamu tumimboi mauli-ulit a si Abar Kaaruien si aicuakuo itu, kamu linowiro i Amang Kasuruan. Taan sa kamu ra'ica matimboi mauli-ulit asi Abar Kaaruien itu, em paémanen iow ra'ica wana torona.

2 Korintus 7:1

Poo-poow sé icaupusku, pakasa en janji itu aituru' ai cita. Ampa'paan in itu mayo kita meresi in owak asé im pakasa sé mengakotor in owak wo i rohta. Wo mayo kita menonou le'nas torona i Amang Kasuruan ang karapi in lekep wo maindé'o mangé ai Sia.

Efesus 1:13

Taniitu ka'i camu tou ra'ica Yahudi sé lumingao in sususuien wutul i Amang Kasuruan, siituo en Abar Kaaruien si mengawéé ing kalowiran ai camu. Wo an tutuw iow maémano a si Kristus, tinerimao miow e Roh Le'nas si aijanji-Na tanu tuus kamu imamualio tou-Na.

Efesus 4:22

Ampa'paan in ituo tela'uo mio' em peri ing katouan uré. Eng katouan uré tanu siitu ra'ica loor, ampa'paan makiitke' ing kasalé'an in owak sé ra'ica wutul si mengasélé'kow icamu wo luméwo' ing katouan iow.

Efesus 4:25

Ampa'paan kamu mamualio tou weru, ra'io toro ka'i mengatowo. Makuao mangé im butul asi esa wo sé walina, ampa'paan kita im baya puté-puté anggota in owak i Kristus.

Efesus 5:4

Tioo ka'i awéan ai camu makua sé nunuwu' kotor, sé nunuwu' ra'ica wana torona kuma'pa sé nunuwu' ra'ica masoma. En itu ra'ica patus pengakua miow. Taan aweso taré kamu mengakuao mangé i makapulu'sama' a si Amang Kasuruan.

1 Tesalonika 1:5

Kailekan ami en itu ampa'paan asi makasa kami mangé ai camu an Tesalonika e mangé kumua in Abar Kaaruien andumoro' i Yesus Kristus. An tutuw itu kami ra'ica asaloke' maké i nunuwu' ami, taan ang karapi ing kawasa i Casuruan wo ang karapi i Roh Le'nas si méma' icamu uli-ulit mercaya in Abar Kaaruien andumoro' i Yesus Kristus itu. Wo sinéréo ka'i miow em peri ami. Anaé, kailekano miow sapaoka en Abar Kaaruien itu wutul.

1 Tesalonika 2:13

An tutuw ipakua ami en taar i Amang Kasuruan, tinerimao miow en itu tanu nunuwu' i Casuruan ra'ica nunuwu' é tou. Wo en aisowat iow itu wutul, ampa'paan en taar i Amang Kasuruan itu ang karoro'ano i matawoi ang katouan iow sé maéman a si Apo' Yesus. Ampa'paan in ituo kami mengua-ngua i makapulu'sama' ai Sia.

Titus 2:11

Ampa'paan si Amang Kasuruan itumambéro mai in upus-Na en lumowir waya sé tou.

Ibrani 12:1

Tumo'tolke' mai indior, keli en tou sé imamuali sairi im paémanen éra torona icita. Kita pakali'ciren é tou keli itu tanuoka ing kambung makali'cir icita. Ampa'paan in ituo mayoo tiya'ta waya em pamuléngen wo ing kamesé-meséaan si makaléngkété' ai cita, wo kasake' talesen am pekowaan si pakasarunta.

Ibrani 2:3

Sa taniitu, tambisa réén kita? Kita ra'ica toro icawekar an ukuman, sa ra'ica wéanta rékén en abar andumoro' ing kalowiran si lébé pentingai wo in taar itu. Ampa'paan si Apo' Yesus in esa eng kataré-taré makua in abar andumoro' ing kalowiran itu, wo sé tou kataré-taré iluminga in itu, aicuao éra en abar itu ai cita akar kakailekanta sapaoka en abar itu wutul.

Ibrani 4:2

Ampa'paan en Abar Kaaruien itu ipakua-kuao ai cita, meputé sé aicuao a sé apo-apo'ta indior. En abar sé lininga é apo-apo'ta itu ra'ica wana torona ai séra, ampa'paan ra'ica percayan éra.

Yakobus 4:8

Rumaméjio mangé rumuru a si Amang Kasuruan, wo kamu rurun-Na oka mai. Wu'asanno mio' eng kama miow, éi kamu sé tou iméma' ing kamesé-meséaan! Le'naseno mangé en até miow, éi kamu sé marua-rua até.

Yakobus 5:20

Ta'néien iow en anio': Si tou e makin sumawel si tou meséa' tumela'u in lalan sélé'kow, niéma'nao e mu'kur i tou itu lowiren oka am papaté wo niéma'nao eng kamesé-meséaan i tou itu niampungan.

1 Petrus 1:22

Kamu lume'naso in owak iow ang karapi in le'tek mengaéma' in sususuien wutul i Amang Kasuruan, akar kamu makawoo mengaupus sé poo-poow an esa paémanen ang karapi i mauli-ulit. Anaé sina'uenku kamu wosama' kamu meupu-upusan ang karapi in lekep en até.

1 Petrus 1:9

Maaru-aruio mangé kamu ampa'paan en angéan im paémanen iow itu tinerimao miow, siituo eng kalowiran i mu'kur iow an ukuman ing kamesé-meséaan.

1 Petrus 2:1

Ampa'paan in ituo kamu ra'io toro mengéma-ngéma' pakasa ing kaléwo'an, pakasa sé mengauwak, pakasa sé punek, menii-niim ing kasuutan wo mengaléwo' i ngaran é tou walina.

1 Petrus 2:11

Poo-poow sé icaupusku, icamu anio' sakéi wo imanangkéi ang kayo'baan anio'. Anaé, sina'uenku kamu wosama' tumayang angé asé kasalé-salé'an in owak sé ra'ica loor sé mapetokol an até weresi miow.