Wahyu 5:12 - En Taar Weru a nunuwu' é Tontemboan

¹² Séra im baya mewali-wali makantar in taangko' keli. Em pakantar éra tana'i, “Si Toyaang i Domba si sumangkumo pinaté itu em patus tumerima ing kawasa, ing kasiyaan, ing kapinteran, ing kaketeran, in siri', im parayo-rayo wo pasiri-siriin wo rarayoan.”

Wahyu 5:12 ပူးပေါင်းရင်းမြစ်များ

Matius 28:18

Susuten i Yesus séra wo icua-Na “Tinerima-Kuo waya eng kawasa an sorga wo ang kayo'baan.

Yohanes 1:29

Asi woondona mai sérén i Yohanes si Yesus mai ai sia wo icuana a sé tou, “Sérén, si anioo si Toyaang i Domba i Amang Kasuruan si mai misi ing kamesé-meséaan é tou ang kayo'baan.

Yohanes 17:2

Ampa'paan si Amang mééo mai ing kawasa a Yaku e merénta waya sé tou, wosama' Aku ro'na méé ing katouan akar ing kauré-uré ai séra sé aisarakano i Amang a Yaku.

2 Korintus 8:9

Ampa'paan kailekano miow en upus aitambér i Apo'ta Yesus Kristus ai camu: Mandé ka'i Sia siya', taan torona ing kapentingan iow, niéma'-Na en owak-Na malengéi, wosama' kamu masiya'.

1 Timotius 1:17

Irayoo si Amang Kasuruan! Siao si Colanota akar ing kauré-uré. Sia awéan akar ing kauré-uré, Sia ra'ica kaséréan wo Sia wayake' in esa. Sia itu parayo-rayo wo pasiri-siriin akar ing kauré-uré. Ulit.

Wahyu 1:6

Wo niéma'-Na kita mamuali tou-Na ang Kakolanoan-Na, wo mamuali imam-imam sé maselewir a si Amang Kasuruan, Amang-Na. A si Yesus Kristuske' e rarayo wo en sisiri', wo eng kakawasaan akar ing kauré-uré. Ulit.

Wahyu 13:8

Pakasa é tou sé menonou ang kayo'baan kumuru en sumiri' oka a si binatang itu. Sérao sé tou tumo'tolke' mai eng kayo'baan anio' niéma' e ngaran éra ra'ica aipatic ang kitap ing katouan i Toyaang i Domba si pinatéo.

Wahyu 15:3

Séra makantar ing kakantaren i Musa si ata i Amang Kasuruan wo kakantaren i Toyaang i Domba. Eng kakantaren itu tana'i, “O Amang Kasuruan Si Makakawasa, uli-ulit wangko' wo kakaya'kaan pakasa sé niéma'-Mu! O Kolano pakasa im bangsa. Pakasa sé niéma'-Mu uli-ulit ra'ica marapit wo wutul.

Wahyu 19:1

Kekawus in itu, palinganku tanu awéan suara é tou keli merega-rega an sorga. Séra makua in tana'i, “Irayoo si Amang Kasuruan! Si Amang Kasuruanta, Siao si Casuruan si lumowir, Sia ka'i Kasuruan si parayo-rayo wo pasiri-siriin wo makakawasa.

Wahyu 4:11

“O, Kasuruan! O, Amang Kasuruan ami! Wayake' Ico em patus makéré in darayo, wo in sisiri' wo ing kawasa. Ampa'paan si Casuruan méma'o im baya-waya, wo ampa'paano ing kasalé'an-Mu pakasa en itu niéma'o wo awéan.”

Wahyu 5:13

Wo kalingaanku pakasa sé mahluk an sorga, ang kayo'baan, an darem ing kayo'baan wo an ta'sic, séra mewali-wali kumua, “Toronake' Sia si makalukut am palukutan pasiri-siriin wo torona i Toyaang i Domba, e rarayo wo in sisiri' wo iparayo-rayo wo pasiri-siriin wo ing kawasa akar ing kauré-uré.”

Wahyu 5:6

Wo sérénku awéan esa Toyaang i Domba tanu sumangkumo pinaté, makatulung an uner im palukutan pasiri-siriin wo sé epat mahluk wo an uner é matu'a itu. Sia makaanu pitu sungé wo pitu weren. Sé pitu weren ituo sé pitu Roh i Amang Kasuruan sé ayutus am pakasa ing kayo'baan.

Wahyu 5:8

An tutuw Sia mindo ing gulungan kitap itu, sé epat mahluk wo sé rua ngapulu' epat matu'a kumundu an dior i Toyaang i Domba itu. Sé mahluk wo sé matu'a itu makatimboi mekélé esa kecapi wo mekélé esa paelepan mas si wuta ing kamenyan. Siituo en sombayang é tou le'nas.

Wahyu 5:9

Wo séra kumantar esa kakantaren weru tana'i: “Icoo em patus tumerima ing gulungan kitap itu, wo muka' in ségél-ségélna. Ampa'paan Ko sumangkumo pinaté, wo ang karapi in enda'-Mu, tinu'bus-Muo séra torona i Amang Kasuruan, séra itu mai am pakasa in suku, i nunuwu', i negara wo im bangsa.

Wahyu 6:1

Wo kaséréanku si Toyaang i Domba muka' in ségél kataré asé pitu ségél. Wo kalingaanku esa asé epat mahluk itu maangko', tanuoka in erut maténgé. Icuana, “Mayoo!”

Wahyu 7:12

Wo icua éra, “Ulit! Irayoo mangé si Amang Kasuruan! Toronake' Sia e rarayo wo en sisiri', eng kapinteran, wo i makapulu'sama', siri', kakawasaan, wo kaketeran akar ing kauré-uré! Ulit.”