Wahyu 4:8 - En Taar Weru a nunuwu' é Tontemboan

⁸ Sé epat mahluk itu maka- anu mekélé enem en tétéléw, en an untep wo ang kesot in tétéléw mawuta-wuta im beren. Endo wo em bengi sé mahluk itu ra'ica maento-ento' i makantar, “Le'nas, le'nas, le'nas si Amang Kasuruan Si Makakawasa, Si awéano indior, intarépé', wo si maai oka sa.”

Wahyu 4:8 ပူးပေါင်းရင်းမြစ်များ

Kisah Para Rasul 20:31

Ampa'paan in ituo, mareti-retio mangé kamu. Musti pena'né-na'néi iow sapaoka ang kauré in telu ngata'un aku mewali-wali wo icamu, endo wo em bengi kamu pengasina'uenku si esa wo si esa akar en danona im berenku menii-niis.

2 Korintus 6:18

Wo Aku mamuali oka Amangmu, wo kamu mamuali oka toya-toyaang-Ku, taniituo en aicua i Amang Kasuruan si Makakawasa.”

1 Tesalonika 2:9

Poo-poow, tantu kata'néiané' miow tambisa kami rumaméji menawo-nawoi endo wo em bengi en tumanggong ing kaperluan ang katouan ami in esa, wosama' kami ra'ica méé pamuléngen an esaan angé ai camu an tutuw ami makua in Abar Kaaruien i Amang Kasuruan ai camu.

1 Timotius 4:16

Ampa'paan ituo, téirano mangé sumama-sama' en owakmu wo ka'i téirano mangé sumama-sama' en sususuien wutul itu. Ico musti le'tek mengaéma' im pakasa in itu. Sa émaanmu waya en itu, ico lowiren i Amang Kasuruan ang karapi é tou sé mengalinga ai co.

2 Timotius 4:2

icuamuo mangé en Taar i Casuruan a sé tou, loor kuma'pa ra'ica loor en orasna, ko musti tu'tul e mengua-ngua in Taar itu. Sina'ueno mangé sé tou mengaéma' ing kameséaan, romaan angé séra ang karapi wuta ing katalesenan an tutuw ko mengasusui iséra.

Ibrani 13:8

Si Yesus Kristus kasake' puté, indior, intarépé' wo akar ing kauré-uré.

Wahyu 1:4

Siri' i Yohanes a sé pitu jamaat an Asia Teké'. Pekiupusenku a si Amang Kasuruan wo a sé pitu roh an dior im palukutan pasiri-siriin-Na en tumambérai in upus wo ing kaeluran ai camu. Si Amang Kasuruan itu awéano indior, intarépé', wo si maai oka sa.

Wahyu 1:8

Si Amang Kasuruan icumua in tana'i, “Yaku anio' Alfa wo Omega, si awéano indior, si awéan intarépé' wo si maai sa, wo Yaku ka'i Si Makakawasa.”

Wahyu 11:17

Icua éra, “Icua ami imakapulu'sama' ai Co Amang Kasuruan si Makakawasa, si awéano indior akar intarépé', ampa'paan Ico makéo ing kawasa wangko' wo tumo'tolo maperénta tanu Kolano.

Wahyu 14:11

Wo en tembur in api e mokoi iséra itu memulu-mulut akar ing kauré-uré, wo séra pengoko-ngokoien endo wo em bengi. Séra ituo sé tou makuru en sumiri' si binatang wo im patongna itu wo sé itumerima in tuus i ngaranna.”

Wahyu 14:3

An dior im palukutan pasiri-siriin wo an dior é epat mahluk wo sé matu'a itu, sé sangaatus epat ngapulu' epat ngariwu tou makantar esa kakantaren weru. Ra'ica wana esaan tou ka'i e ro'na majar ing kakantaren itu, aluar iséra. Séra ituo sé tou sé tinu'buso i Amang Kasuruan ang kayo'baan anio'.

Wahyu 15:3

Séra makantar ing kakantaren i Musa si ata i Amang Kasuruan wo kakantaren i Toyaang i Domba. Eng kakantaren itu tana'i, “O Amang Kasuruan Si Makakawasa, uli-ulit wangko' wo kakaya'kaan pakasa sé niéma'-Mu! O Kolano pakasa im bangsa. Pakasa sé niéma'-Mu uli-ulit ra'ica marapit wo wutul.

Wahyu 15:7

Wo esaan asé epat mahluk itu méé mekélé esa paelepan mas a sé pitu malaékat. Sé pitu paelepan itu wuta in anggor kae'bowan i Amang Kasuruan si menonou akar ing kauré-uré.

Wahyu 16:14

Séra ituo sé roh é sétang sé mengaéma' in tuu-tuus kakaya'kaan. Wo séra mangé meta'up asé im pakasa é kolano am pakasa ing kayo'baan wo lumi'us iséra e mangé merang asi endo si Amang Kasuruan si Makakawasa makim sé tou.

Wahyu 16:7

Wo kalingaanku awéan suara asi pawetaan i raragés makua, “O Kasuruan, Amang Kasuruan Si Makakawasa. En ukuman si aiwéé-Mu wutul wo ra'ica marapit!”

Wahyu 19:15

Wo am ba'ba'-Na makesotai esa sa'bel telew si kumala oka pakasa im bangsa. Peréntan-Na oka séra maké im beka' bési wo Sia in esa en tumepes im bua'na in anggor am patepesan ing kae'bowan i Amang Kasuruan Si Makakawasa.

Wahyu 19:4

Wo sé rua ngapulu' epat matu'a wo sé epat mahluk itu kumundu wo kumuru en sumiri' a si Amang Kasuruan si makalukut am palukutan pasiri-siriin. Wo icua éra, “Ulit! Irayoo mangé si Amang Kasuruan.”

Wahyu 21:22

Ra'io kaséréanku mai em Balé Le'nas an untep ing kota itu, ampa'paan em Balé Le'nas ituo si Amang Kasuruan in esa, si Casuruan Si Makakawasa wo ka'i si Toyaang i Domba itu.

Wahyu 3:7

“Ipatico mio' a si malaékat si mengatéir in jamaat an Filadelfia. Si anioo en taar Si Le'nas, Si Wutul, Si makakulu ing kukusi' i Daud. Sa em papalen winukaan-Nao, ra'ica wana e ro'na malen. Wo sa kinusi'an-Nao, ra'ica wana e ro'na muka'.

Wahyu 4:4

Wo an li'cir im palukutan pasiri-siriin itu awéan ka'i rua ngapulu' epat palukutan pasiri-siriin walina. Wo asé palukutan pasiri-siriin itu, makalukut rua ngapulu' epat matu'a sé mekarai ing kulo' wo an do'kos éra awéan mahkota mas.

Wahyu 4:6

An dior im palukutan pasiri-siriin itu awéan ta'sic kaca eng kaweresina tanuoka ing kristal. Wo em palukutan pasiri-siriin itu pakali'ciren é epat mahluk, en owak éra wuta im beren an dior wo an somoi.

Wahyu 4:9

Wo susur é epat mahluk itu kumantar ing kakantaren rarayoan, siri' wo méé makapulu'sama' ai Sia si makalukut asi palukutan pasiri-siriin wo si menonou akar ing kauré-uré itu,

Wahyu 5:6

Wo sérénku awéan esa Toyaang i Domba tanu sumangkumo pinaté, makatulung an uner im palukutan pasiri-siriin wo sé epat mahluk wo an uner é matu'a itu. Sia makaanu pitu sungé wo pitu weren. Sé pitu weren ituo sé pitu Roh i Amang Kasuruan sé ayutus am pakasa ing kayo'baan.

Wahyu 6:1

Wo kaséréanku si Toyaang i Domba muka' in ségél kataré asé pitu ségél. Wo kalingaanku esa asé epat mahluk itu maangko', tanuoka in erut maténgé. Icuana, “Mayoo!”

Wahyu 6:6

Wo palinganku tanu awéan suara an uner é epat mahluk itu makua in tana'i, “Sanga liter sléi em bééna esa dinar, wo telu liter gandum em bééna esa dinar. Taan tioo peléwoon en solo wo en anggor itu.”

Wahyu 7:11

Kekawus in itu, pakasa sé malaékat tumulung wo lumi'cir im palukutan pasiri-siriin ang karapi é matu'a wo sé epat mahluk itu. Sé malaékat itu kumundu an dior im palukutan pasiri-siriin, wo kumuru en sumiri' a si Amang Kasuruan.

Wahyu 7:15

Ampa'paan in ituo, séra makatulung an dior im palukutan pasiri-siriin i Amang Kasuruan wo sumelewir Sia endo wo em bengi an untep im Balé Le'nas. Wo Sia si makalukut asi palukutan pasiri-siriin itu mewali-wali oka ang karapi éra en lumoindong iséra.