Wahyu 22:6 - En Taar Weru a nunuwu' é Tontemboan

⁶ Kekawus in itu, si malaékat itu kumua a yaku, “Sé aicuaku anio' ro'na percayan wo wutul. Wo si Amang Kasuruan si mééo i Roh-Na a sé nabi, ayutus-Nao si malaékat en tumuru' a sé ata-Na sapa sé ra'io uré mamuali sa.”

Wahyu 22:6 ပူးပေါင်းရင်းမြစ်များ

Matius 13:41

Iru'du' oka i Toyaang i Tou sé malaékat-Na wo li'usen éra oka ang Kakolanoan-Na pakasa sé imangémai sé tou mengaéma' ing kamesé-meséaan wo pakasa en tou sé mengaéma' ing kaléwo'an.

Lukas 1:70

Tanu si aitaaro i Amang Kasuruan indior, sé ipakua-kuao é nabi-Na sé le'nas.

Lukas 16:16

Eng kitap-kitap sé aipatic i Musa wo eng kitap-kitap sé aipatic é nabi walina, tatap pengapakéné' akar an jaman i Yohanes Mabaptis menonoué'. Wo tumo'tolai an jaman itu en Abar Kaaruien andumoro' ing Kakolanoan i Amang Kasuruan tumo'tolo ipakua-kua wo sé tou uli-ulit rumaméji mamuali tou-Na ang Kakolanoan-Na.

Kisah Para Rasul 12:11

An tutuw i Petrus makaileko mai in tou andumoro' in sapa e mamuali, wo icuana, “Intarépé', wutu-wutul kailekanku sa si Amang Kasuruan irumu'du'o si malaékat-Na en lumowir yaku ang kakawasaan i Herodes wo am pawasa-wasan léwo' é tou Yahudi.”

Kisah Para Rasul 3:18

Ang karapi i mulur taniitu imamualio en aicua i Amang Kasuruan indior imaké sé nabi, sapaoka si Mesias si ayutus-Na musti mendam ing keli kawenduan.

Roma 1:2

En Abar Kaaruien itu aijanjio i Amang Kasuruan indior wo aipatico é nabi-Na ang kitap-kitap Le'nas.

1 Korintus 14:32

Sé tou winéanai kamang tatambér mamuali nabi, séra ro'na kumawasa in owak wo kumawasa sé iparoma' éra.

1 Korintus 7:29

Poo-poow sé maéman, em paangé-angénku tana'i: Kita ra'io kelian en témpo! Anaé, tumo'tol intarépé' sé tuama makapenanaano, musti méma' tanuoka kéndo' ra'ica wana penanaan.

2 Tesalonika 1:7

Émaan-Na oka ka'i kamu wo icami cawekar an okoi wo ang kawenduan an tutuw si Apo' Yesus tumumpa mai a mangé en sorga owo. En itu mamuali an tutuw i Apo' Yesus mapaturu' in owak-Na mewali-wali wo sé malaékat-Na si wuta ing kawasa.

Ibrani 12:9

Kita awéan amang ang kayo'baan. Kita patepianna wo sia pasiriinta. Wopé'taré si Amang Kasuruan, Amangta an sorga, Amang é pakasa é roh. Kita musti lume'te-le'tek angé ai Sia wosama' kita ro'na menonou akar ing kauré-uré.

2 Petrus 1:21

Ampa'paan e nunuwu' asi Amang Kasuruan owo itu ra'ica isumangkum ako ipakua-kua kumiit ing kasalé'an in tou, taan ampa'paano in tawoien i Roh Le'nas si cumawasa a sé tou, akar séra ro'na kumua i nunuwu' i Amang Kasuruan itu.

2 Petrus 3:2

Icasalé'ku kata'néian iow en taar sé aicuao é nabi le'nas indior wo ka'i mena'né-na'néi em perénta i Apo' Yesus si Lumolowirta, sé aicuao é ruru'du'an-Na ai camu.

Wahyu 1:1

An untep ing kitap anio' aipatic andumoro' sé kamamualian sé makala'us mamuali. Sé kamamualian itu aituru'o i Amang Kasuruan a si Yesus Kristus wosama' ro'na ituru' i Yesus a sé ata-Na. Kekawus in itu yutus i Yesus si malaékat-Na e maai a si ata-Na Yohanes en sumisil sé kamamualian itu.

Wahyu 18:20

Maaru-aruio mangé éi sorga, éi tou le'nas, sé ruru'du'an wo sé nabi! Ampa'paan sia niukumo i Amang Kasuruan, tanu in susuli' a sé kaléwo-léwo'an sé niéma'na ai camu.”

Wahyu 19:9

Wo icua i malaékat a yaku, “Ipatico mio' in tana'i: ‘Pakakamangen sé tou nienot am pésta kawéng i Toyaang i Domba.’ ” Wo icua ka'i i malaékat itu a yaku, “Si aicuaku anio' wutul, e nunuwuun anio' nunuwuun i Amang Kasuruan.”

Wahyu 21:5

Wo Sia si makalukut am palukutan pasiri-siriin itu kumua, “Séréno, Yaku ang karoro'an imaéma' im baya-waya maweru!” Wo icua-Na ka'i, “Ipatico mio' waya en itu, ampa'paan sé nunuwuun anio' ro'na percayan wo wutul.”

Wahyu 21:9

Kekawus in itu, mai si esaan asé pitu malaékat si makatimboi im pitu paelepan si mawuta-wuta im pitu kawangkuran sosomoi. Icuana a yaku, “Mayoo am bia'i, ituru'ku oka ai co si pengantén wéwéné, penanaan i Toyaang i Domba.”

Wahyu 22:1

Wo ituru' ka'i i malaékat a yaku en doyongan in dano ing katouan, en danona léno kaputé ing kristal. Wo en doyongan itu makesotai asi palukutan pasiri-siriin i Amang Kasuruan wo asi palukutan pasiri-siriin i Toyaang i Domba,

Wahyu 22:16

Icua ka'i i Yesus, “Yaku, si Yesus imutuso si malaékat-Ku e méé ing kasairian andumoro' pakasa im perkara anio' ai camu torona é jamaat. Yakuo en sééna, si taranak i Daud, si lolouren si sumendo-sendot.”

Wahyu 22:7

Icua i Yesus, “En ulitna, ra'io uré ka'i Aku maai. Pakakama- ngen sé tou sé makiit i nunuwu-nunuwu' asi Amang Kasuruan owo sé an untep ing kitap anio'.”

Wahyu 4:1

Kekawus in itu, yaku pinapaturu'an esa papalen si makawuka' an sorga. Wo kalingaanku ka'i en suara si sumangkumo liningaku, en suara itu tanuoka in téngéna in terompét si makua, “Sumosoro mai! Ituru'-Ku oka ai co sapa e mamuali sa.”