Wahyu 2:16 - En Taar Weru a nunuwu' é Tontemboan

¹⁶ Ampa'paan in itu mape'diso mio'! Sa kamu ra'ica mape'dis, yaku makala'us oka maai ai camu wo perangen-Ku oka sé tou itu maké in sa'bel makakesot am ba'ba'-Ku.

Wahyu 2:16 ပူးပေါင်းရင်းမြစ်များ

Efesus 6:17

Kamu linowiro i Amang Kasuruan, pakénno mangé eng kalowiran iow itu tanu pengaloindong an do'kos iow. Wo ka'i terimano mangé en Taar i Amang Kasuruan tanu sa'bel si aiwéé i Roh Le'nas en sumundur sé kaséké'.

2 Tesalonika 2:8

An tutuw ituo si tou luméwo-léwo' itu mai mapaturu' in owakna. Taan si tou luméwo-léwo' itu patén oka i Apo' Yesus ang karapi in aseng-Na. Wo an tutuw i Apo' Yesus maai sumawel, teri-terin-Na oka ang karapi in télang an owak-Na.

Wahyu 1:16

Wo eng kama kakan-Na makatimboi sé pitu sumesendot, wo am ba'ba'-Na makakesot esa sa'bel rua en telewa. Eng gio-Na matélang tanuoka si yéndo asi katoora in endo.

Wahyu 16:9

Sé tou rinengis im paso' in api si ra'io icakua, akar ojaten éra e ngaran i Amang Kasuruan si makakawasa ing kawangkuran-kawangkuran itu. Wo séra ra'ica mape'dis wo ka'i ra'ica rumayo wo sumiri' Sia.

Wahyu 19:15

Wo am ba'ba'-Na makesotai esa sa'bel telew si kumala oka pakasa im bangsa. Peréntan-Na oka séra maké im beka' bési wo Sia in esa en tumepes im bua'na in anggor am patepesan ing kae'bowan i Amang Kasuruan Si Makakawasa.

Wahyu 19:21

Wo pakasa sé tou walina pinaté in sa'bel si makesotai am ba'ba'-Na si makalukut an licur i cawayo kulo' itu. Wo pakasa sé burung imawesu mengula-ngulat in sama'na éra.

Wahyu 2:12

“Ipatico mio' a si malaékat si mengatéir in jamaat am Pergamus. Si anioo en taar si ai Sia owo si makatimboi in sa'bel rua en telewa:

Wahyu 2:5

Ampa'paan in itu, ta'néieno am bisa owo en linepokan iow wo mape'diso mangé. Wo émaano mangé tanu sé niéma' miow indior tutuw iow werupé' maéman. Sa kamu ra'ica mape'dis, Yaku maai oka ai camu, wo mindo in totombol patuliran in sosoloan iow an tampana.

Wahyu 22:20

Sia en icumua a yaku andumoro' im pakasa in anio', icua-Na, “Én, Yaku makala'us oka maai!” Ulit, mayoo, é Apo' Yesus!

Wahyu 22:7

Icua i Yesus, “En ulitna, ra'io uré ka'i Aku maai. Pakakama- ngen sé tou sé makiit i nunuwu-nunuwu' asi Amang Kasuruan owo sé an untep ing kitap anio'.”

Wahyu 3:19

Sé tou sé icaupus-Ku, sérao sé romaan-Ku wo samboken-Ku. Ampa'paan in itu maincaya'o mangé sumawel wo mape'diso.