Wahyu 16:14 - En Taar Weru a nunuwu' é Tontemboan

¹⁴ Séra ituo sé roh é sétang sé mengaéma' in tuu-tuus kakaya'kaan. Wo séra mangé meta'up asé im pakasa é kolano am pakasa ing kayo'baan wo lumi'us iséra e mangé merang asi endo si Amang Kasuruan si Makakawasa makim sé tou.

Wahyu 16:14 ပူးပေါင်းရင်းမြစ်များ

Matius 24:14

Wo en Abar Kaaruien andumoro' ing Kakolanoan in Sorga ipakua-kua oka am bisa-wisa asi kayo'baan anio', e mamuali kasairian a sé pakasa é tou. Kumawus in itu maayo en endo kaka'puan ing kayo'baan.”

Matius 24:24

Ampa'paan sé kristus ra'ica wutul wo sé nabi ra'ica wutul mapaturu' oka. Émaan éra oka en tuu-tuus wo kakaya'kaan sé ra'io icakua en sumélé'kow sé tou, sa woo ro'na ka'i, isélé'kow éra sé tou sinisiro i Amang Kasuruan.

Markus 13:22

Ampa'paan sé mesias ra'ica wutul wo sé nabi ra'ica wutul maai oka sa. Émaan éra oka en tuu-tuus wo eng kakaya'kaan-kakaya'kaan en sumélé'kow sé tou sinisir i Amang Kasuruan.

Lukas 2:1

Ra'ipé' uré eng ketou i Yohanes, si Kaisar Agustus méé esa perénta rumu'du' pakasa sé touna ang kakolanoan i Romawi en dumaftar i ngaran éra.

Yohanes 8:44

Si kikiiten é sétango si amang iow, wo icasalé' miow mengaéma' sapa si casalé' i amang iow. Tumo'tolai indior akar intarépé' sia mapaté sé tou, wo ra'ica kiimna mengaéma' in sususuien wutul, ampa'paan en sususuien wutul ra'ica an aténa. Casalé'na mengatowo ampa'paan in ituo em peri aselina. Sia kotowo wo palemboian waya in towo.

Roma 1:8

Kataré-taré aku kumua i makapulu'sama' a si Amang Kasuruanku ang karapi i ngaran i Yesus Kristus, ampa'paan kamu uli-ulit maéman akar keli en tou am bisa-wisa ang kayo'baan makaileko in andumoro' im paémanen iow.

2 Tesalonika 2:9

Wo si tou luméwo-léwo' itu mapaturu' mai maké ing kawasa i kikiiten é sétang wo sia muwak sé tou ang karapi in tumuru' in tuu-tuus kakaya'kaan sé kalinteren wo kala'meren oka mai.

1 Timotius 4:1

Icua i Roh Le'nas ang karapi i mauli-ulit, sa matawio en endo kaka'puan ing kayo'baan, awéan oka tou sé maémano a si Casuruan, ra'io ka'i maéman ai Sia. Sé tou itu makiit oka sé sétang wo masélé'kow in tou wo ka'i mengaéma' oka in sususuien é sétang.

Yakobus 3:15

Sa eng kapinteran iow tanuke' siitu, eng kapinteran itu ra'ica asi Amang Kasuruan owo taan asi cayo'baan anio' owo, ang kasalé'an in owak owo wo asé sétang owo.

1 Yohanes 5:19

Kailekanta sa kita anio' asi Amang Kasuruan owo, wo pakasa sé ang kayo'baan anio' pakakawasaan i kikiiten é sétang.

Wahyu 12:9

Si naga wangker ituo si ula' matu'a, si patuulen kikiiten é sétang kuma'pa Roh léwo', si mengasélé'kow pakasa in tou ang kayo'baan. Sia itu aiténdél ang kayo'baan mewali-wali wo sé malaékatna.

Wahyu 13:3

Wo esaan asé ro'kos i binatang itu kaséréan awéan kalat im péla' si misioka makawali sia am papaté. Taan em péla' itu imasama'o. Pakasa en tou ang kayo'baan mangaya-ngaya'ka' wo kiiten éra si binatang itu.

Wahyu 16:16

Wo li'usen é telu roh léwo' itu sé kolano an esa tampa, en tampa itu a nunuwu' é Ibrani patuulen Harmagedon.

Wahyu 16:7

Wo kalingaanku awéan suara asi pawetaan i raragés makua, “O Kasuruan, Amang Kasuruan Si Makakawasa. En ukuman si aiwéé-Mu wutul wo ra'ica marapit!”

Wahyu 17:14

Séra merang oka en sumundur si Toyaang i Domba, taan si Toyaang i Domba ra'- ica kinakalaan éra, ampa'paan Sia Tuang am pakasa é tuang, wo Kolano am pakasa é kolano. Si Toyaang i Domba itu mewali-wali wo sé tou sé tinowao, sé sinisiro wo sé le'tek ai Sia, muntung oka.

Wahyu 20:8

Wo mangéna oka isélé'kow sé bangsa sé am pakasa ing kayo'baan, sérao sé patuulen ‘Gog’ wo ‘Magog’. Wo séra li'usen oka i kikiiten é sétang e mangé merang. Eng kakeli éra tanu in dangi'ngis an tembir in ta'sic.

Wahyu 3:10

Kiniitano miow em peré-perénta-Ku ang karapi in talesen. Ampa'paan in itu loindongen-Ku oka kamu asi oras im pangepé'an si maai oka ang kayo'baan e mangepé' iséra sé maento' ang kayo'baan.

Wahyu 6:17

Ampa'paan imayo en endo si kaindéén, si endo i Amang Kasuruan wo si Toyaang i Domba makim pakasa in tou. Si séi réén e ro'na makatang?”