Wahyu 14:13 - En Taar Weru a nunuwu' é Tontemboan

¹³ Wo kalingaanku en suara an sorga icumua, “Ipatico en anio': Tumo'tol intarépé' pakakamangen sé tou sé le'tek makiit si Apo' Yesus akar imaté.” Wo e Roh i Amang Kasuruan in esa en cumua in tana'i, “Ulit, séra ro'na mena' asi pinala'lé-la'léan éra wo teriman éra oka en laasa asé im pakasa sé pinengaéma éra.”

Wahyu 14:13 ပူးပေါင်းရင်းမြစ်များ

Matius 3:17

Wo kalingaan en suara an sorga owo makua, “Si anioo si Toyaang-Ku, si caupus-Ku. Siao e mengaarui in até-Ku.”

Lukas 16:25

Taan icua i Abraham, ‘Éi toyaangku, ta'néieno mangé sumama-sama', an tutuw ko menonoué', ico imakéréo waya sé loor taan karu' si Lazarus makéréke' waya sé ra'ica loor. Intarépé' sia makéréo im pangiboran am bia'i wo ico mawendu keli.

Lukas 16:9

Icua-Ku ai camu, pakéno mangé eng kasiyaan ing kayo'baan anio' en tumawang sé tou e makéré karapi, wosama' sa eng kasiyaan iow maka'puo, kamu teriman oka am paento'an an sorga, si ento'an iow akar ing kauré-uré.

Roma 14:8

Sa kita menonou, kita menonou torona i Casuruan. Wo sa kita maté, kita maté torona i Casuruan. Anaé, menonou kuma'pa maté, kita anu i Casuruan.

1 Korintus 15:18

Wo sa si Kristus ra'ica tinou sumawel, tantu sé tou maémano a si Kristus sé imatéo, ra'ica malowir.

1 Korintus 15:20

Taan en ulitna sapaoka si Kristus tinouo sumawel an uner é tou imatéo. Siao eng kumataré-taré tinou sumawel, taniitu ka'i sé tou maéman sé imatéo, touen oka ka'i sumawel.

1 Korintus 15:58

Ampa'paan in ituo é poo-poow sé icaupusku, keteren em paémanen iow wo ra'ica toro marua-rua wasa. Wo mare'de-re'dem an tawoien i Casuruan, ampa'paan kailekano miow sapaoka sé tinawoi iow an dior i Casuruan ra'ica wana si ra'ica wana en torona.

2 Korintus 5:8

ampa'paan in ituo en até ami talesen. Icami lébé masalé' icawekar asi owak ami anio' wo mento' ang karapi i Amang Kasuruan.

Filipi 2:17

Tumo'tolke' mai asi kataré an tutuwku kumua in Abar Kaaruien ai camu, kamu mapercaya a si Apo' Yesus wo isumarakano ing katouan iow e maéma' ing kasalé'an-Na. Anaé, mandé ka'i aku ukumen patén ampa'paan in tawoienku e mengakua in Abar Kaaruien andumoro' i Yesus Kristus ai camu, en itu ra'ica sapa-sapa. Yaku kasake' kumua imakapulu'sama' a si Amang Kasuruan wo maaru-arui oka mewali-wali wo icamu.

1 Tesalonika 4:14

Ampa'paan sa émanenta sapaoka si Apo' Yesus imatéo wo itumou sumawel, émanenta ka'i sapaoka si séike' e maéman ai Sia akar imaté, touen oka sumawel i Amang Kasuruan wo li'usen-Na mangé kumarapi wo si Yesus.

1 Tesalonika 4:16

Sa Sia maayo, awéan oka esa perénta an sorga kumua in taangko', si Kikiiten é malaékat mangko' repet wo en terompét i Amang Kasuruan tuméngé. Asi témpo ituo si Apo' Yesus tumumpa mai a mangé en sorga owo, wo sé tou maéman ai Sia sé matéo, séra en dior touen sumawel.

1 Tesalonika 5:10

Sia imatéo torona icita wosama' sa Sia maai sumawel, mandé ka'i an oras itu kita imatéo kuma'pa kita menonoué', kita ro'na menonou mewali-wali wo Sia.

1 Timotius 5:24

Awéan piraan tou sé kinailekano mengaéma' ing kamesé-meséaan. Mandé ka'i séra ra'ipé' niakim i Casuruan, taan eng kamesé-meséaan éra kailekano waya é tou. Wo sé walina ka'i méma'o ing kamesé-meséaan taan ra'ipé' kinakailekan. Eng kamesé-meséaan éra itu kakailekan oka asi endo mengangai.

1 Timotius 5:25

Taniitu ka'i awéan tou si méma'o in loor en itu uli-ulit kinakailekano. Taan awéan ka'i sé mengaéma' in loor taan ra'ica kinailekan, kakailekan oka asi endo mengangai.

Wahyu 1:11

En téngéna tana'i, “Ipatico mio' an esa kitap pakasa sé sinérému. Kekawus in itu, icirimmu mangé a sé pitu jamaat anio': jamaat an Efesus, an Smirna, am Pergamus, an Tiatira, an Sardis, an Filadelfia wo an Laodikia.”

Wahyu 10:4

Makanuwu' mai sé pitu erut itu, casalé'ku woo e matic sapa sé pinali- ngaku. Taan kalingaanku en suara an sorga icumua in tana'i, “Ségélen owo sapa en aicua é pitu erut itu wo ra'ipé' toro ipaticmu.”

Wahyu 11:15

Wo si malaékat kapitu sumengo in terompét, wo awéan suara si maangko' an untep in sorga makua, “Eng kakolanoan ing kayo'baan mamualio Kakolanoan i Casuruanta wo Kakolanoan i Kristus. Sia merénta oka akar ing kauré-uré.”

Wahyu 11:19

Kekawus in itu, mawuka'o mai em Balé Le'nas i Amang Kasuruan an sorga, wo kaséréano em piti im perjanjian-Na an untep im Balé Le'nas itu. Wo mamuali mai eng kilat wo en téngéna in erut wo em pangéro' wo en uran éis repet keli.

Wahyu 16:17

Kekawus in itu tuas i malaékat kapitu sé an untep im paelepanna an langit, wo kalingaan en suara taangko' am palukutan pasiri-siriin owo si am Balé Le'nas, makua in tana'i “Kumawuso waya.”

Wahyu 19:9

Wo icua i malaékat a yaku, “Ipatico mio' in tana'i: ‘Pakakamangen sé tou nienot am pésta kawéng i Toyaang i Domba.’ ” Wo icua ka'i i malaékat itu a yaku, “Si aicuaku anio' wutul, e nunuwuun anio' nunuwuun i Amang Kasuruan.”

Wahyu 2:1

Wo icua i Toyaang i Tou a yaku, “Patico mio' a si malaékat si mengatéir in jamaat an Efesus: Si anioo en taar si ai Sia owo si makatimboi sé pitu sumesendot ang kama kakan-Na wo si mawaya' am paawuun é pitu totombol patuliran in sosoloan si niéma a mas owo.

Wahyu 2:7

Si séi si makalunteng, lébé loor sia luminga sapa en aicua i Roh a sé jamaat. Si séi si muntung wéan-Ku oka sia kaloasan eng kuman im bua'na in tuura ing katouan si an untep in Taman Firdaus i Amang Kasuruan.”

Wahyu 20:6

Pakakamangen wo line'naso sé tou sé kataré-taré tinou sumawel! Em papaté karua ra'io kumawasa iséra. Taan séra mamuali oka imam-imam sé mengaselewir a si Amang Kasuruan wo a si Kristus, wo séra ka'i merénta oka mewali-wali wo Sia sangariwu ngata'un eng kauréna.

Wahyu 21:5

Wo Sia si makalukut am palukutan pasiri-siriin itu kumua, “Séréno, Yaku ang karoro'an imaéma' im baya-waya maweru!” Wo icua-Na ka'i, “Ipatico mio' waya en itu, ampa'paan sé nunuwuun anio' ro'na percayan wo wutul.”

Wahyu 22:17

Wo e Roh i Amang Kasuruan wo si pengantén wéwéné itu kumua, “Mayoo!” Wo si séike' sé luminga in anio', sia ka'i musti kumua, “Mayoo!” Si séi e maré'om, mayoo! Wo si séi e masalé', mayoo mindo in dano katouan si asaloke' aitambér.

Wahyu 6:11

Wo sé mu'kur itu winéan mekélé esa karai lambot kulo' wo séra kinuanan i mento'pé' toyo' ka'i akar eng kakeli éra malekep. Ampa'paan awéané' sé kara-karapi éra maselewir wo sé poo-poow éra esa paémanen sé patén oka tanu iséra.