Roma 8:30 - En Taar Weru a nunuwu' é Tontemboan

³⁰ Wo séra sé aitantuo i Amang Kasuruan asi kataré-taré, séra tinowa-Na. Wo séra sé tinowa-Na, séra itu nianggap-Na wutul. Wo séra sé nianggap-Na wutul, séra ka'i wéan-Na in darayo wo in sisiri'.

Roma 8:30 ပူးပေါင်းရင်းမြစ်များ

Yohanes 17:22

Aiwéé-Kuo ka'i ai séra e rarayo wo in sisiri' si aiwééo i Amang a Yaku, wosama' séra meesa, kaputé Yaku wo si Amang esa.

Yohanes 17:24

O Amang, icasalé'-Ku wosama' sé tou sé aisarakan i Amang a Yaku awéan mewali-wali wo Yaku asi tampa angéan-Ku. Icasalé'-Ku taniitu wosama' ro'na kaséréan éra e rarayo wo en sisiri'-Ku, siituo e rarayo wo en sisiri' si aiwééo i Amang a Yaku ampa'paan si Amang mengaupuso Yaku an tutuw ra'ipé' niéma' eng kayo'baan anio'.

Yohanes 5:24

En ulitna icua-Ku mangé ai camu, si séike' mangé en luminga i nunuwu'-Ku wo mercaya a si Amang Kasuruan si mutusai Yaku, kéréanna oka eng katouan akar ing kauré-uré. Wo sia ra'ica ukumen. Sia aicawekaro am papaté wo tumerima ing katouan akar ing kauré-uré.

Roma 1:6

Kamu ka'i cauntep asé im pakasa é tou itu sé tinowao i Amang Kasuruan mamuali tou i Yesus Kristus.

Roma 11:29

Ampa'paan sa si Amang Kasuruan itumowa tou e mamuali tou-Na wo tambéran-Na in upus, ra'ica kawisa wo roban-Na sé pinusé'-Nao itu.

Roma 8:1

Intarépé', kita sé meesao ang karapi i Kristus Yesus ra'io ka'i ukumen i Amang Kasuruan.

Roma 8:21

sapaoka an témpona sa, pakasa sé niéma' i Amang Kasuruan ang kayo'baan anio' iwekar-Na oka ang kakawasaan si mengapaté, wo kumiit makéré ing kabébasan wo iparayo-rayo wo pasiri-siriin mewali-wali wo sé toyaang-Na.

Roma 8:28

Kailekanta intarépé' sapaoka si Amang Kasuruan mengatu'tul im baya-waya, wosama' méé ing kalooran a sé tou sé menga- upus Sia, sé tinowa-Na iciit im pawasa-wasa-Na.

1 Korintus 1:2

En surat anio' aipaticku ai camu jamaat i Amang Kasuruan ang Korintus sé line'naso i Amang Kasuruan ampa'paan imeesao ang karapi i Kristus Yesus, wo ka'i tinowao i Amang Kasuruan e mamuali tou le'nas mewali-wali wo sé pakasa in tou maéman am pakasa in tampa, sé maapo' a si Yesus Kristus, si Apo'ta im baya.

1 Korintus 1:9

Si Amang Kasuruan le'tek. Tinowa-Nao kamu e meesa ang karapi i Toyaang-Na, si Yesus Kristus Apo'ta.

1 Korintus 2:7

Sé ipakua ami itu kapinteran asi Amang Kasuruan owo. Eng kapinteran itu ra'ipé' kailekan é tou wo aicaenepé', taan en itu tinu'tulo i Amang Kasuruan an tutuw eng kayo'baan anio' ra'ipé' niéma' wosama' kéréanta em bagéan asi rarayo wo in sisiri'-Na.

1 Korintus 6:11

Indior awéan piraan tou an uner iow makaperi tanu siitu ka'i. Taan intarépé' eng kamesé-meséaan iow wineresio i Amang Kasuruan. Kamu niéma'-Nao le'nas wo nianggap-Nao wutul an dior-Na ampa'paan kamu maémano a si Apo' Yesus Kristus wo ka'i ampa'paan ing kawasa i Roh i Amang Kasuruanta.

2 Korintus 4:17

Wo eng kawenduan sé papendamen ami intarépé' ra'ica uter wo ang karoro'anke'. Taan teriman ami oka eng kaaruian si ra'io icakua wo eng kaaruian itu akar ing kauré-uré. Eng kaaruian itu ilumébé mai wo ing kawangko' sa ipeputé wo ing kawenduan si pinendam ami mai.

Galatia 1:15

Taan si Amang Kasuruan sumisiro yaku tumo'tolai aku an untepé' im poot i inangku wo tumowa yaku e mamuali ruru'du'an-Na ampa'paano in upus aitambér-Na.

Galatia 1:6

Yaku mangaya'ka' keli ampa'paan kamu taloso rior tumela'u si Amang Kasuruan kekawus iow maéman a si Kristus. En ulitna kamu tinowa i Amang Kasuruan wosama' kamu makéré ing katouan akar ing kauré-uré, si aitambér i Kristus. Taan kamu icumiitke' in sususuien asi abar walina.

Galatia 5:8

Ra'ica si Amang Kasuruan si lumepéi camu in da'ica kumiit in sususuien wutul, ampa'paan Siao en tumowa icamu eng kumiit si Kristus.

Efesus 1:11

Si Amang Kasuruan en tumu'tul im baya-waya kumiit ing kasalé'an wo im pinusé'-Na in esa. Wo ra'ipé' niéma'-Na eng kayo'baan kita sinisir-Nao, wosama' ro'na terimanta sapa sé aijanji-Nao iwéé ai cita ampa'paan kita imeesao ang karapi i Kristus.

Efesus 1:5

Si Amang Kasuruan mengaupus icita, ampa'paan in ituo tumo'tolke' mai indior aitantu-Nao kita mamuali toya-toyaang-Na ampa'paan i Yesus Kristus. Wo siituo en aitantu-Na kumiit ing kasalé'an-Na.

Efesus 2:6

Wo ampa'paan kita meesao wo si Kristus Yesus, kita tinou sumawel i Amang Kasuruan wo ailukut-Na an tampa pasiri-siriin mewali-wali wo si Kristus e merénta ang kerapi-Na an sorga.

Efesus 3:11

En itu niéma' i Amang Kasuruan kumiit si pinawasa-Nao tumo'tolke' mai indior. Wo si Kristus Yesus Apo'ta en lumekep im basa-Na itu.

Efesus 4:4

Kita sé maémano a si Kristus imamualio esa owak wo makaanu esa Roh, wo ka'i makaanu esa paarapen. Em paarapen itu aiwéé i Amang Kasuruan an tutuwta tinowa-Na e maéman.

Kolose 3:4

Si Kristuso em palemboian ing katouan iow. Wo sa Sia maai sumawel ang kayo'baan ang karapi i rarayo wo in sisiri'-Na, kamu ka'i kaséréan oka wo pekiit irayo wo in siriin mewali-wali wo Sia.

1 Tesalonika 2:12

Wo pangileken ami ai camu wosama' menonou angé makiit ing kasalé'an i Amang Kasuruan. Siao en itumowa icamu e muntep ang Kakolanoan-Na wo makéré i rarayo wo in sisiri'-Na.

2 Timotius 2:11

Ulito e nunuwu' anio', “Sa kita imatéo ang karapi-Na kita ka'i menonou oka ang karapi-Na.

Ibrani 9:15

Ampa'paan in ituo, pinaalio mai i Kristus em perjanjian weru, wosama' sé tou sé tinowao i Amang Kasuruan makéré oka bagéan si akar ing kauré-uré asi janji-Na. Sé tou ro'na makéré im bagéan si akar ing kauré-uré ampa'paan si Kristus imatéo wo tumu'bus ing kamesé-meséaan sé pinengaéma' éra an tutuw im perjanjian kataré pengapakéné'.

1 Petrus 2:9

Taan kamu anio' bangsa sé sinisiro i Amang Kasuruan, imam sé maselewir a si Amang Kasuruan si Colanota, bangsa sé line'nas-Nao wo ka'i mamuali anu-Na. Kamu im baya imamuali tanu siitu wosama' ro'na ipakua-kua miow a sé tou andumoro' sé kakaya'kaan sé niéma'o i Amang Kasuruan. Siao en tumowa icamu kumesot ang kariréimbengan wo muntep asi sendot-Na wangko'.

1 Petrus 3:9

Wo tioo sé léwo' suliin iow in léwo', kuma'pa ipawa'ba' é tou suliin iow ka'i i mengawa'ba'. Mekiupuso mangé a si Amang Kasuruan wosama' séra wéan-Na mai ing kamang, ampa'paan kamu tinowa i Amang Kasuruan e méé ing kamang a sé tou walina wo in taniitu kamu ka'i makéré ing kamang.

1 Petrus 5:10

Taan eng kawenduan si pendamen iow itu ra'ica uré. Kekawus in itu, émaan oka i Amang Kasuruan em paémanen iow makaleke-lekep wo émaan-Na oka en até miow makaketer wo émaan-Na ka'i kamu mauli-ulit maéman ai Sia. Ampa'paan Sia itu Amang Kasuruan si palemboian waya ing kamang aitambér wo itumowao icamu maéman a si Kristus, wosama' kamu kumiit mendam i rarayo wo en sisiri'-Na akar ing kauré-uré.

2 Petrus 1:10

Ampa'paan in ituo é poo-poowku, kamu musti rumaméji tumuru' sapaoka kamu uli-ulit tinowa wo sinisir i Amang Kasuruan kumiit ai Sia. Sa émaan iow pakasa en itu, em paémanen iow a si Kristus makaketer wo ra'ica kawisa kamu lumepok ang kamesé-meséaan.

Wahyu 17:14

Séra merang oka en sumundur si Toyaang i Domba, taan si Toyaang i Domba ra'- ica kinakalaan éra, ampa'paan Sia Tuang am pakasa é tuang, wo Kolano am pakasa é kolano. Si Toyaang i Domba itu mewali-wali wo sé tou sé tinowao, sé sinisiro wo sé le'tek ai Sia, muntung oka.

Wahyu 19:9

Wo icua i malaékat a yaku, “Ipatico mio' in tana'i: ‘Pakakamangen sé tou nienot am pésta kawéng i Toyaang i Domba.’ ” Wo icua ka'i i malaékat itu a yaku, “Si aicuaku anio' wutul, e nunuwuun anio' nunuwuun i Amang Kasuruan.”