Roma 8:17 - En Taar Weru a nunuwu' é Tontemboan

¹⁷ Wo sa kita toya-toyaang i Amang Kasuruan, kita awéan hak e makéré im bagéan asé im pakasa sé aitu'tulo i Amang Kasuruan torona é toyaang-Na. Wo terimanta oka en itu mewali-wali wo si Kristus. Wo sa kita mawendu meputé in sinangkumai i Kristus, kita ka'i tumerima oka i rarayo wo in sisiri' kaputé i Kristus.

Roma 8:17 ပူးပေါင်းရင်းမြစ်များ

Matius 16:24

Wo icua i Yesus a sé murit-Na, “Si séike' e masalé' kumiit Yaku, sia musti sumangkal in owakna, muléng in salipna wo kumiit Yaku.

Matius 25:21

Wo icua i tuangna, ‘Wutu-wutul loor e niéma'mu itu. Ico ata loor wo le'tek a yaku. Ampa'paan ko ro'na tinokéan andumoro' sé teké', tokéanku oka ka'i ko andumoro' sé tawoien wangker. Muntepo mai ko wo mayo maaru-arui ang karapiku!’

Lukas 12:32

“Mandé kamu wayake' im pira, taan tioo kamu maindé'! Ampa'paan si Amang iow an sorga masalé' sumungkul icamu mamuali tou ang Kakolanoan-Na.

Lukas 24:26

Ra'ica réén kailekan iow sapaoka si Kristus musti sumangkum owo waya ing kawenduan itu, kumawus in itu Sia tumerima i rarayo wo in sisiri'?”

Yohanes 17:24

O Amang, icasalé'-Ku wosama' sé tou sé aisarakan i Amang a Yaku awéan mewali-wali wo Yaku asi tampa angéan-Ku. Icasalé'-Ku taniitu wosama' ro'na kaséréan éra e rarayo wo en sisiri'-Ku, siituo e rarayo wo en sisiri' si aiwééo i Amang a Yaku ampa'paan si Amang mengaupuso Yaku an tutuw ra'ipé' niéma' eng kayo'baan anio'.

Kisah Para Rasul 14:22

An tampa-tampa itu, si Paulus wo si Barnabas kumeter in até é tou maéman wo sumina'u iséra wosama' le'tek am paémanen. Wo icua i Paulus wo si Barnabas, “Sa kita masalé' mamuali tou i Amang Kasuruan si Kumawasa tanu Kolano, kita musti meta'up ing keli kawenduan.”

Kisah Para Rasul 20:32

Intarépé', isarakanku kamu a si Amang Kasuruan wosama' kamu téiran-Na. Wo musti ka'i pena'né-na'néien iow en Abar Kaaruien andumoro' in upus tatambér-Na ai camu. En abar itu e méé ing kaketeran am paémanen iow wo ka'i si méé oka ing kamang si aijanji-Nao iwéé a sé pakasa sé tou si niéma'-Nao le'nas.

Kisah Para Rasul 26:18

e mangé muka' im bewerot éra wosama' séra ra'io ka'i menonou ang kariréimbengan taan menonou ang kasendotan, wo ka'i séra ra'io pakakawasan i kikiiten é sétang taan pakakawasan i Amang Kasuruan. Wo in taniitu ampa'paan séra maéman a Yaku, eng kamesé-meséaan éra makéré oka kaampungan wo makéré oka ka'i bagéan si aitantuo i Amang Kasuruan a sé tou sé line'nas-Na.’

Roma 5:17

Anaé, ampa'paan ing kamesé-meséaan i esa tou siao si Adam, akar pakasa sé tou patus maté. Taan e niéma' i esa tou Siao si Yesus Kristus, uli-ulit en lébé wangko' mai. Ampa'paano Sia, sé tou tinambéranai i Amang Kasuruan in upus-Na lumepe-lepet wo nianggap-Na wutul an dior-Na. Séra sé maéman a si Yesus Kristus itu, menonou oka akar ing kauré-uré wo kumawasa ing kayo'baan ampa'paano Sia.

Roma 8:3

En ukum Torat ra'ica kawisa lumowir icita, ampa'paan kita makiit in ukum Torat si ra'ica kaémaanta. Taan niéma'o i Amang Kasuruan si ra'ica kaémaan in ukum Torat. Sia mutuso mai si Toyaang-Na in esa ang kayo'baan anio' mamuali tou tanu iméma'o ing kamesé-meséaan wo imaté e mekar sé tou iméma' ing kamesé-meséaan. Wo ampa'paan im papaté i Toyaang-Na itu, kinala-Nao eng kawasa ing kamesé-meséaanta in tou.

1 Korintus 2:9

Ang Kitap Le'nas awéan aipatic in tana'i, “Sapa sé ra'ipé' sumangkum ako sinéré é tou, sé ra'ipé' sumangkum ako lininga, sé ra'ipé' sumangkum ako lumembo mai an até, siituo en tinu'tul i Amang Kasuruan a sé tou mengaupus Sia.”

2 Korintus 1:5

Keliano eng kawenduan sé pinendam ami mai tanu ing kawenduan si pinendamai i Kristus. Wo ampa'paano i Kristus kami makéré im pangiboran sé kumeli-keli.

2 Korintus 1:7

Kamu uli-ulit percayan ami, ampa'paan kailekan ami sapaoka kamu mendamo mai ing kawenduan tanu im pinendam ami mai, anaé kamu tantu makéré oka pangiboran kaputé im pangiboran si sinangkum ami.

Galatia 3:29

Wo sa kamu anu i Kristus, kamu ka'i taranak i Abraham wo teriman oka miow sapa si aijanjio i Amang Kasuruan a si Abraham.

Galatia 4:7

Ampa'paan in itu kamu ra'io ka'i ata taan mamualio toyaang. Anaé, ampa'paan kamu toyaang-Na, kamu makéré oka im bagéan si aitu'tulo i Amang Kasuruan a sé toyaang-Na kiit ing kasamaan-Na.

Efesus 3:6

Wo si anioo em pawasa-wasan-Na sé icaenep itu: Sé tou ra'ica Yahudi kumiit makéré im bagéan asi Amang Kasuruan owo ampa'paan séra maéman in Abar Kaaruien andumoro' i Yesus Kristus. Wo séra imamualio esa owak, wo mekiit makéré ing kama-kamang sé aijanjio i Amang Kasuruan ampa'paan i Kristus Yesus.

Filipi 1:29

Ampa'paan kamu tinambérano mai ing kamang i Amang Kasuruan ra'ica asaloke' maéman a si Kristus taan ka'i imawendu ampa'paan maéman ai Sia.

Filipi 3:10

Intarépé' en icasalé'ku asalo makatuus si Kristus Yesus wo ing kawasa si tumou Sia am papaté. Wo icasalé'ku imendam ing kawenduan si sinangkum-Nao wo mamuali tanu Sia si mawendu akar imaté,

Kolose 1:24

Intarépé' aku arui ampa'paan ro'na mendamai ing kawenduan torona ing kalooran iow. Wo eng kawenduan anio' musti pendamen in owakku tanu in lumekep ing kawenduan si musti wuléngen woo i Kristus torona in owak-Na siituo sé jamaat-Na.

Titus 3:7

Aitambér-Nao mai en upus-Na wosama' kita anggapen-Na wutul an dior-Na wo ro'na makéré ing katouan akar ing kauré-uré, kiit im paara-arapenta.

Ibrani 1:14

Sa taniitu, si séi réén sé malaékat itu? Séra sé roh mengaéma' sapa sé airu'du' i Amang Kasuruan, sé ayutus-Na en tumawang sé tou sé makéré oka ing kalowiran.

Ibrani 1:2

Taan asé endo kaka'puan ing kayo'baan anio', si Amang Kasuruan maroma' ai cita mengapaké si Toyaang-Na in esa. Wo ampa'paano i Toyaang-Na anio', eng kayo'baan wo pakasa sé an untepna émaan i Amang Kasuruan. Wo aitantu-Nao sapaoka si Toyaang-Na awéan kaloasan makaanu im pakasa sé niéma'-Na itu.

Ibrani 6:17

Si Amang Kasuruan kumeter in janji-Na a sé tou ang karapi in sumpa wosama' séra sé tumerima in janji-Na itu ro'na mercaya sapaoka Sia ra'ica rumoba im pawasa-wasan-Na.

Yakobus 2:5

Poo-poow sé icaupusku! Lingano mai en icuaku anio': Sinisiro i Amang Kasuruan sé tou sé paweroten ing kayo'baan anio' lengéi, wosama' séra masiya' am paémanen éra wo makaanu im bagéan ang kakolanoan-Na tanu si aijanji-Nao a sé pakasa in tou sé mengaupus Sia.

1 Petrus 1:4

Kita maarap makéré oka bagéan si aitu'tulo i Amang Kasuruan a sé tou-Na. Em bagéan ituo sé kamang ipakaéma' i Amang Kasuruan a mangé en sorga. Wo sé kamang itu ra'ica mengaléwo', ra'ica mengawuruk wo ra'ica mawalina.

1 Petrus 4:13

Taan maaru-aruio mangé, ampa'paan kamu kumiito imendam ing kawenduan tanu si pinendamai i Kristus, wosama' an tutuw i Kristus maai sumawel ang karapi i rarayo wo in sisiri'-Na, kamu ro'na masalé-salé' wo maaru-arui.

Wahyu 21:7

Si séi e muntung, kéréanna oka waya en anio'. Wo Yaku mamuali oka Amang Kasuruanna, wo sia mamuali oka toyaang-Ku.

Wahyu 3:21

Si tou muntung ilukut-Ku oka sia ang karapi-Ku asi palukutan pasiri-siriin-Ku, meputé wo Yaku si muntungo wo lumukut mewali-wali wo si Amang-Ku asi palukutan pasiri-siriin-Na.