Roma 6:19 - En Taar Weru a nunuwu' é Tontemboan

¹⁹ Em pakawerot iow tanu tou ra'ica rior makailek, anaé aku maké in andéan ata, wosama' kamu rior makailek sapa em peangé-angénku. Indior kamu sumarakano waya ing katouan iow mamuali ata ing kasamekan wo ing kaléwo-léwo'an akar kamu mengéma-ngéma' in léwo'. Taniituo ka'i intarépé', musti isarakan iow waya eng katouan iow mamuali ata mengaéma' im butul akar makawali icamu ang katouan le'nas.

Roma 6:19 ပူးပေါင်းရင်းမြစ်များ

Matius 4:23

Wo si Yesus mangé ka'i lumi'cir im pakasa ing Galilea wo masusui am balé-walé paapo'an é agama Yahudi. Sia kumua in Abar Kaaruien andumoro' ing Kakolanoan i Amang Kasuruan. Wo samaan-Na waya sé tou am pakasa in sakit wo sé tou ra'ica lekep en owak.

Roma 15:1

Kita sé ketero em paémanen, musti talesen a sé tou sé ra'ipé' keter em paémanen. Tioo kita mangéré-ngéréke' ing kaaruianta in esa.

Roma 3:5

An tutuw kita mengaéma' sé ra'ica wutul, em peri wutul i Amang Kasuruan kaséré-séréan. Wo sapa en icuata sa kita icae'bow-Na ampa'paan kita mengaéma' sé ra'ica wutul? Icuata réén Sia marapitke'? En itu pakawerotke' é tou.

Roma 6:13

Wo tioo isarakan iow sé an owak iow mamuali pakakas eng kawasan ing kamesé-meséaan e méma' ing kaléwo-léwo'an. Taan isarakano mio' en owak iow a si Amang Kasuruan ampa'paan kamu ra'io pakakawasaan im papaté wo menonou ang katouan weru. Wo isarakano mio' pakasa sé an owak iow a si Amang Kasuruan em pakén torona méma' in sususuien wutul-Na.

Roma 7:23

taan an owakku awéané' kawasa walina mapetokol wo ing kasalé'anku eng kumiit in ukum i Amang Kasuruan itu. Ang kasomoiana aku rinantéo ing kawasa ing kamesé-meséaan si an untep in owakku.

Roma 8:26

Taniitu ka'i kita, kita tawangen i Roh i Amang Kasuruan an tutuw kita ra'ica keter. Ampa'paan ra'ica kailekanta tumambisa en ulitna kita masombayang. Taan e Roh itu in esa masombayang a si Amang Kasuruan torona icita, ang karapi imangimbulu sé ra'- ica icaroma' i nunuwu' é tou.

1 Korintus 5:6

Mandé ka'i awéan tou maéma' ing kamesé-meséaan an jamaat iow taan kamu marayopé' in owak. En itu ra'ica patus. Tantu kailekano miow si andéan anio': E ragi sangatekic ro'na méma' pakasa in adonan roti ruméis. Eng kaangéanna tana'i: mandé ka'i esake' tou an uner iow méma' ing kaléwo'an, sia itu ro'na tumawér pakasa in tou maéman walina akar kumiit méma' ing kaléwo'an.

1 Korintus 6:11

Indior awéan piraan tou an uner iow makaperi tanu siitu ka'i. Taan intarépé' eng kamesé-meséaan iow wineresio i Amang Kasuruan. Kamu niéma'-Nao le'nas wo nianggap-Nao wutul an dior-Na ampa'paan kamu maémano a si Apo' Yesus Kristus wo ka'i ampa'paan ing kawasa i Roh i Amang Kasuruanta.

1 Korintus 9:8

Sé aicuaku itu, ra'ica asalo kumiit im pakawerot é tou, taan aisusui ang Kitap Le'nas ka'i tanu siitu.

Galatia 3:15

Poo-poow, wéanku oka esa paandéan asi kanaramen é tou ang katouan susur in endo. Sa awéan tou méma' esa perjanjian, wo em perjanjian itu pinusé'o, ra'io toro batalen kuma'pa awesan i esa tou sapake' a si perjanjian itu.

Ibrani 12:15

Mareti-retio mangé oréoka awéan esaan ai camu kumélong in upus aitambér i Amang Kasuruan. Ampa'paan sa awéan tou tanu siitu, sia mamuali tanu in tinanem racung an uner iow akar méma' ing kasusaan wo en racungna luméwo' sé tou keli.

Ibrani 4:15

Ampa'paan si Imam Wangko'ta itu ra'ica imam wangko' sé ra'ica ro'na kumiit mendam ing kalembianta. Ampa'paan sinangkum-Nao mai waya em pangepé'an an tutuw Sia ang kayo'baan, meputé sé pasangkumenta intarépé'. Taan Sia ra'ica kawisa mako méma' ing kamesé-meséaan.