Roma 5:18 - En Taar Weru a nunuwu' é Tontemboan

¹⁸ Anaé, eng kamesé-meséaan i esa tou eng kasiwakana pakasa en tou meséa' wo patus ukumen. Taniitu ka'i, ampa'paan im paémaan wutul i esa Tou, pakasa en tou nianggap wutul i Amang Kasuruan an dior-Na akar séra makéré ing katouan weru.

Roma 5:18 ပူးပေါင်းရင်းမြစ်များ

Yohanes 1:7

Sia mai eng kumua andumoro' in sendot itu a sé im pakasa é tou wosama' lingan éra eng kasairianna wo mercaya in sendot itu.

Yohanes 12:32

Wo an tutuw-Ku airangka' ang kayu salip ang kayo'baan anio', émaan-Ku oka pakasa en tou maai a Yaku.”

Yohanes 3:26

Wo sé muritna itu mai a si Yohanes wo kumua andumoro' si Yesus, “Tuang Guru, kata'néiané' i guru si Tou si sumangkumo mewali-wali wo si guru an lewet in doyongan Yordan? Si Tou itu si aicua i guru tanu Mesias. Intarépé' Sia ka'i mengabaptis sé tou wo kelio tou sé mangé ai Sia.”

Kisah Para Rasul 13:39

Anaé, si séi si maéman a si Yesus, nianggap wutul i Amang Kasuruan.

Roma 3:25

Sia ayutuso mai i Amang Kasuruan ang kayo'baan wosama' makéré ukuman; maté wo en enda'-Na makatiti-titis. Niéma'-Na in taniitu wosama' em papaté i Yesus itu méma' sé tou ro'na icawekar ang kamesé-meséaan sa séra maéman ai Sia wo séra nianggap wutul i Amang Kasuruan. Si Amang Kasuruan méma' in taniitu en tumuru' sapaoka Sia ra'ica marapit. Ampa'paan indior Sia talesen makaséré sé tou mengéma-ngéma' ing kamesé-meséaan akar séra ra'ica ukumen-Na.

Roma 4:25

Sia itu aisarakano a sé tou wo pinaté éra en tumu'bus ing kamesé-meséaanta. Taan Sia tinou sumawel i Amang Kasuruan wosama' kita ro'na makéré ing kaampungan wo kita nianggap wutul i Amang Kasuruan.

Roma 5:12

Eng kamesé-meséaan mai ang kayo'baan anio' ampa'paano i esa tou, siao si Adam wo ampa'paan ing kamesé-meséaan ituo akar awéan em papaté. Eng kasiwakana, em papaté itu sangkumen waya é tou, ampa'paan pakasa en tou iméma'o ing kamesé-meséaan.

Roma 5:15

Taan e niéma' éra in dua ra'ica puté, ampa'paan eng kamang aitambér i Amang Kasuruan en lébé wangko' mai sa ipeputé wo ing kasiwakan ing kameséaan i Adam. Eng kameséaan i esa tou méma' keli en tou imaté, taan eng kamang aitambér i Amang Kasuruan méma' keli en tou malowir. Eng kalowiran itu asalo aitambér-Na wo torona é pakasa sé tou ampa'paano i esa tou Siao si Yesus Kristus.

Roma 5:19

Anaé, ampa'paano si esa tou ra'ica le'tek a si Amang Kasuruan, pakasa en tou imamualio tou ang kamesé-meséaan, taniitu ka'i ampa'paano i esa Tou si le'tek a si Amang Kasuruan, pakasa en tou nianggap wutul i Amang Kasuruan an dior-Na.

Roma 6:14

Anaé, kamu ra'io toro pakakawasané' ing kamesé-meséaan, ampa'paan kamu ra'io menonou makiit in ukum Torat, taan kamu menonou asi upus aitambér i Amang Kasuruan.

1 Korintus 15:22

Em papaté sangkumen waya é tou ampa'paan awéan paesaan wo si Adam. Taniitu ka'i pakasa in tou touen oka sumawel ampa'paan awéan paesaan wo si Kristus.

Ibrani 2:9

Taan kailekanta sapaoka en itu linekepo i Yesus. Ampa'paan Sia niéma'o wawa' toyo' asé malaékat asi témpo ra'ica talos uré, tutuw Sia imamuali tou. Ampa'paan in upus aitambér i Amang Kasuruan, si Yesus mamuali taniitu torona pakasa in tou. Taan intarépé' niéma'o i Amang Kasuruan Sia Kolano iparayo-rayo wo pasiri-siriin an dangka' im baya-waya ampa'paan Sia isumangkumo mai ing kawenduan akar imaté.

2 Petrus 1:1

En surat anio' a yaku owo, Simon Petrus. Yaku anio' ata wo ruru'du'an i Yesus Kristus. Ipaticku en surat anio' ai camu sé maémano a si Yesus Kristus kaputé ami. Si Yesus Kristus itu Amang Kasuruan wo Lumolowirta. Sia iméma' icamu maéman ampa'paan si pengaémaan-Na wutul wo ra'ica marapit.

1 Yohanes 2:20

Taan tinerimao miow e Roh Le'nas asi Yesus Kristus owo, ampa'paan in itu kamu im baya makaileko in sususuien wutul.