Roma 5:15 - En Taar Weru a nunuwu' é Tontemboan

¹⁵ Taan e niéma' éra in dua ra'ica puté, ampa'paan eng kamang aitambér i Amang Kasuruan en lébé wangko' mai sa ipeputé wo ing kasiwakan ing kameséaan i Adam. Eng kameséaan i esa tou méma' keli en tou imaté, taan eng kamang aitambér i Amang Kasuruan méma' keli en tou malowir. Eng kalowiran itu asalo aitambér-Na wo torona é pakasa sé tou ampa'paano i esa tou Siao si Yesus Kristus.

Roma 5:15 ပူးပေါင်းရင်းမြစ်များ

Matius 20:28

En itu meputé wo si niéma' i Toyaang i Tou. Sia maai ang kayo'baan anio' ra'ica maai selewiran é tou taan en sumelewir sé tou wo méé in owak-Na in esa en tumu'bus ing kamesé-meséaan é tou keli.”

Matius 26:28

Ampa'paan si anio' en enda'-Ku, si enda' perjanjian si aituas torona ing kaampungan ing kamesé-meséaan é tou keli.

Yohanes 3:16

Ampa'paan taloso wangko' eng kaupusan i Amang Kasuruan a sé tou ang kayo'baan anio' akar iwéé-Na mai si Toyaang-Na si Esa-esa, wosama' si séike' si maéman ai Sia ra'ica maté taan makéré ing katouan akar ing kauré-uré.

Yohanes 4:10

Isowat i Yesus ai sia, “Sa raké' woo kailekan i inang sapa si casalé' iwéé i Amang Kasuruan wo makailek si séi réén Aku si mangilek woo elepen, tantu si inang mangilek oka a Yaku, wo iwéé-Ku oka a si inang en dano si mawéé ing katouan.”

Kisah Para Rasul 15:11

Taan em butulna, percayanta sapaoka ang karapi in upus aitambér i Apo' Yesus, kita lowiren oka meputé wo sé tou ra'ica Yahudi.”

Roma 5:12

Eng kamesé-meséaan mai ang kayo'baan anio' ampa'paano i esa tou, siao si Adam wo ampa'paan ing kamesé-meséaan ituo akar awéan em papaté. Eng kasiwakana, em papaté itu sangkumen waya é tou, ampa'paan pakasa en tou iméma'o ing kamesé-meséaan.

Roma 6:23

Ampa'paan em buéna i mengéma-ngéma' ing kamesé-meséaan, makéré oka ukuman icatané a si Amang Kasuruan akar ing kauré-uré. Taan eng kamang aitambér i Amang Kasuruan, siituo eng katouan akar ing kauré-uré. Wo eng kamang aitambér-Na itu tinerimata ampa'paan si Kristus Yesus, Apo'ta.

2 Korintus 5:14

Niéma' ami waya en itu ampa'paan en upus i Kristus en icumawasa icami. Wo kailekan ami sa si esa tou maté torona im pakasa é tou, eng kaangéan in itu pakasa in tou imatéo.

2 Korintus 9:15

Mayoo kita kumua i makapulu'sama' a si Amang Kasuruan ampa'paan ra'io icakua en aiwéé-Na itu.

Efesus 2:8

Ampa'paan kamu linowir in upus aitambér i Amang Kasuruan an tutuw iow maéman. Eng kalowiran itu asalo aitambér i Amang Kasuruan, ra'ica wuéna im pakasa sé loor sé pinengaéma' miow.

Ibrani 2:9

Taan kailekanta sapaoka en itu linekepo i Yesus. Ampa'paan Sia niéma'o wawa' toyo' asé malaékat asi témpo ra'ica talos uré, tutuw Sia imamuali tou. Ampa'paan in upus aitambér i Amang Kasuruan, si Yesus mamuali taniitu torona pakasa in tou. Taan intarépé' niéma'o i Amang Kasuruan Sia Kolano iparayo-rayo wo pasiri-siriin an dangka' im baya-waya ampa'paan Sia isumangkumo mai ing kawenduan akar imaté.

1 Yohanes 2:2

Sia imaté mamuali raragés wosama' pakasa eng kamesé-meséaanta ro'na ampungan-Na. Wo ra'ica ing kamesé-meséaantake' en ampungan, taan ka'i eng kamesé-meséaan é pakasa in tou ang kayo'baan anio'.

1 Yohanes 5:11

Eng kasairian itu icumua in tana'i: Si Amang Kasuruan imééo mai ing katouan akar ing kauré-uré ai cita, wo eng katouan akar ing kauré-uré itu kéréanta ampa'paan maéman a si Toyaang-Na.