Roma 3:25 - En Taar Weru a nunuwu' é Tontemboan

²⁵ Sia ayutuso mai i Amang Kasuruan ang kayo'baan wosama' makéré ukuman; maté wo en enda'-Na makatiti-titis. Niéma'-Na in taniitu wosama' em papaté i Yesus itu méma' sé tou ro'na icawekar ang kamesé-meséaan sa séra maéman ai Sia wo séra nianggap wutul i Amang Kasuruan. Si Amang Kasuruan méma' in taniitu en tumuru' sapaoka Sia ra'ica marapit. Ampa'paan indior Sia talesen makaséré sé tou mengéma-ngéma' ing kamesé-meséaan akar séra ra'ica ukumen-Na.

Roma 3:25 ပူးပေါင်းရင်းမြစ်များ

Yohanes 6:47

En ulitna icua-Ku mangé ai camu, si séike' si maéman a Yaku, sia itu ro'na menonou akar ing kauré-uré.

Kisah Para Rasul 14:16

Indior aiwaya i Amang Kasuruan pakasa sé bangsa menonou makiit in lalan éra i esa wo i esa.

Kisah Para Rasul 15:18

si cumuao im basa-Na itu indioré'wo.’ ”

Kisah Para Rasul 17:30

Indior ra'ipé' kailekan é tou tambisa en lalan kumiit si Amang Kasuruan, wo pakasa en itu ra'io ka'i ta'néien-Na. Taan intarépé' pinerénta-Nao wosama' am bisa-wisake' pakasa en tou musti mape'dis ang kaléwo-léwo'an.

Kisah Para Rasul 2:23

Si Yesus anio' aisarakano i Amang Kasuruan ai camu kiit im basa-Na. Wo Sia aisalip wo pinatéo miow ang karapi in sumarakan Sia a sé tou sé ra'ica makiit in ukum.

Kisah Para Rasul 3:18

Ang karapi i mulur taniitu imamualio en aicua i Amang Kasuruan indior imaké sé nabi, sapaoka si Mesias si ayutus-Na musti mendam ing keli kawenduan.

Kisah Para Rasul 4:28

E niéma' éra itu, aitantuo i Casuruan indioré'wo ciit ing kawasa wo ing kasalé'an-Na.

Roma 2:4

Si Amang Kasuruan itu en até-Na sama', talesen wo wuta ing kaupusan. Taan tioo paepesen iow im beren em pakasa in itu wo mawerot ra'io sangali mape'dis! Ra'ica réén kailekan iow sapaoka ituru' i Amang Kasuruan eng kasamaan in até-Na itu wosama' kamu mape'dis ang kamesé-meséaan?

Roma 3:26

Si Yesus maté en sumawel icita ampa'paan ing kamesé-meséaan, siitu en tuusna sapaoka si Amang Kasuruan ra'ica marapit. Wo in taniitu aituru'-Nao sapaoka Sia wutul; wo pakasa é tou maéman a si Yesus, nianggap i Amang Kasuruan wutul an dior-Na.

Roma 5:1

Intarépé' kita nianggapo wutul i Amang Kasuruan ampa'paan im paémanenta. Wo kita meelurano sumawel wo si Amang Kasuruan ampa'paano i Apo'ta Yesus Kristus.

Roma 5:11

Wo ra'ica siituke'! Kita ka'i maaru-arui ampa'paan ing kasamaan i Amang Kasuruan si aituru' i Apo'ta Yesus Kristus, akar kita intarépé' menonou meelurano sumawel wo Sia.

Roma 5:18

Anaé, eng kamesé-meséaan i esa tou eng kasiwakana pakasa en tou meséa' wo patus ukumen. Taniitu ka'i, ampa'paan im paémaan wutul i esa Tou, pakasa en tou nianggap wutul i Amang Kasuruan an dior-Na akar séra makéré ing katouan weru.

Roma 5:9

Lébé-lébépé' ka'i intarépé' an tutuwta nianggapo wutul i Amang Kasuruan ampa'paano in enda' i Kristus, tantu kita lowiren oka asi kae'bowan-Na.

1 Korintus 5:7

Ampa'paan in ituo itiya'o mio' si ragi uré itu, si ragi ing kamesé-meséaan iow, wosama' kamu mamuali tanuoka in adonan weru, ampa'paan kamu ulit tanuoka in adonan ra'ica rinagian. Ampa'paan si Kristus, si ana' i domba Paska pinaté tanu raragésan en tumu'bus ing kameséaanta.

2 Korintus 5:21

Si Kristus ra'ica wana kamesé-meséaan, taan niéma' i Amang Kasuruan si Kristus e muléng ing kamesé-meséaanta, wosama' icita mamuali tou wutul an dior i Amang Kasuruan ampa'paan i Kristus.

Efesus 1:7

Ampa'paano in enda' i Yesus Kristus wo ampa'paan kita meesao ang karapi-Na, icita tinu'buso, eng kaangéanna kita niampungano ang kamesé-meséaanta. Wo siituo en upus wangko' si aitambér i Amang Kasuruan ai cita.

Efesus 2:13

Mandé ka'i kamu indior tayango asi Amang Kasuruan, taan intarépé' rumuruo ang karapi-Na ampa'paan in enda' i Kristus.

1 Timotius 1:15

Sé nunuwu' anio' ulit wo ro'na teriman wo percayanmu. En aicua tana'i: Si Kristus Yesus mai ang kayo'baan en lumowir sé tou ang kamesé-meséaan. Wo a sé im pakasa in tou sé sumangkumo mengaéma' ing kamesé-meséaan, yakuo si kumeli-keli mengaéma' ing kamesé-meséaan.

Ibrani 10:4

Ampa'paan en enda' i sapi tuama wo en enda' i mémbé' tuama uli-ulit ra'ica ro'na misi ing kamesé-meséaan é tou.

Ibrani 11:14

Sé tou imangaku in taniitu tantu séra ang karoro'an i mangéré in ento'an tanu roong éra in esa.

Ibrani 11:17

Ampa'paan si Abraham awéan paémanen, airagésna si toyaangna Ishak tanu raragés an tutuw sia niuji i Amang Kasuruan. Iragés i Abraham si toyaangna in esa itu, mandé ka'i tinerimanao en janji-janji i Amang Kasuruan,

Ibrani 11:7

Ampa'paan si Nuh awéan paémanen, sia kinuanan i Amang Kasuruan sapa sé mamuali oka sa, sé ra'ipé' sumangkum ako sinéréna, wo ang karapi ing katale'tekanna émaanna esa kapal wangker en lumowir sé pamaléna asi sonop wangko'. Wo in taniitu ituru'na sapaoka sé tou ang kayo'baan patus ukumen, wo sia in esa tinerima i Amang Kasuruan tanu tou nianggap wutul ampa'paan im paémanenna.

Ibrani 9:28

Taniituo ka'i si Kristus, si makaesake' imaté mamuali iparagés en tumu'bus ing kamesé-meséaan é tou. Kekawus in itu Sia maai karua, ra'io en tumu'bus ing kamesé-meséaan é tou keli, taan e méé ing kalowiran a sé tou sé maento-ento' Sia.

Ibrani 9:5

Am bawo ing kekelew im piti perjanjian itu awéan rua patong malaékat makatétéléw si patuulen kerup, tanu tuus sapaoka si Amang Kasuruan iparayo wo pasiriin awéan am bitu. En tétéléw é rua kerup itu makawélar icumungkung ing kekelew im piti, siituo en tampa i Amang Kasuruan mengawéé ing kaampungan ing kamesé-meséaan é tou. Taan intarépé' ra'ica wana témpo en sumisil lébé lambot andumoro' im pakasa in itu.

1 Yohanes 1:10

Sa icuata sapaoka kita ra'ica kawisa mako méma' ing kamesé-meséaan, en itu meputéo icuata Sia itu kotowo wo en Taar-Na ra'ica an atéta.

1 Yohanes 2:2

Sia imaté mamuali raragés wosama' pakasa eng kamesé-meséaanta ro'na ampungan-Na. Wo ra'ica ing kamesé-meséaantake' en ampungan, taan ka'i eng kamesé-meséaan é pakasa in tou ang kayo'baan anio'.

1 Yohanes 4:10

Si anioo en upus itu: Ra'ica icita si ririor imaupus si Amang Kasuruan, taan Siao si ririor mengaupus icita. Ampa'paan ituo ayutus-Na mai si Toyaang-Na wosama' eng kamesé-meséaanta kaampungan ampa'paan i Toyaang-Na itu.

Wahyu 1:5

Wo en upus aitambér wo eng kaeluran itu ka'i mai asi Yesus Kristus owo. Siao en sairi le'tek, wo eng kataré-taré itumou sumawel an uner é tou imaté, wo ka'i e makakawasa a sé kolano asi cayo'baan anio'. Sia mengaupus icita, wo mekar ing kamesé-meséaanta ang karapi in enda'-Na.

Wahyu 13:8

Pakasa é tou sé menonou ang kayo'baan kumuru en sumiri' oka a si binatang itu. Sérao sé tou tumo'tolke' mai eng kayo'baan anio' niéma' e ngaran éra ra'ica aipatic ang kitap ing katouan i Toyaang i Domba si pinatéo.

Wahyu 20:15

Wo pakasa sé tou e ngaran éra ra'ica aipatic an untep ing kitap katouan itu, iténdél an untep in ta'sic api itu.

Wahyu 5:9

Wo séra kumantar esa kakantaren weru tana'i: “Icoo em patus tumerima ing gulungan kitap itu, wo muka' in ségél-ségélna. Ampa'paan Ko sumangkumo pinaté, wo ang karapi in enda'-Mu, tinu'bus-Muo séra torona i Amang Kasuruan, séra itu mai am pakasa in suku, i nunuwu', i negara wo im bangsa.