Roma 2:29 - En Taar Weru a nunuwu' é Tontemboan

²⁹ Taan sé wutu-wutul patuulen tou Yahudi, sé tou imamualio Yahudi an untep in aténa. Wo sé wutu-wutul patuulen sunat, ra'ica ampa'paan sinunato kumiit in atoran sé aipatic an ukum Torat, taan ampa'paan en até éra rinobao i Roh i Amang Kasuruan. Sé tou tanu siitu makéré oka i rarayo asi Amang Kasuruan ra'ica a sé tou owo.

Roma 2:29 ပူးပေါင်းရင်းမြစ်များ

Lukas 11:39

Taan icua i Apo' Yesus a si tou Farisi itu, “Kamu sé tou Farisi, ipaturu' miow a sé tou sapaoka kamu mengaéma' in atoran agama miow, taan en até miow imawutao ing kaléwo'an wo mengaandét ing kasiyaan é tou. En itu meputé wo kamu mengawu'as im paelepan wo im pakanan ang kesotnake' taan an untepna kotor keli.

Lukas 17:21

Anaé, ra'ica wana tou e ro'na kumua, ‘Sérénai, Sia am bia'i’ kuma'pa ‘Sérén angé, Sia a mangé mbitu!’ En ulitna, si Amang Kasuruan Kumawasao tanu Kolano an uner iow ang kayo'baan anio'.”

Yohanes 12:43

Ampa'paan si lébé icasalé' éra, irayo é tou wotaré irayo i Amang Kasuruan.

Yohanes 4:23

Taan maai oka en témpona, wo intarépé' an témponao sé tou maapo' oka a si Amang Kasuruan Amangta ang karapi ing kawasa i Roh Le'nas wo iciit in sususuien wutul-Na. Ampa'paan sé tou maapo' ai Sia tanu siitu, pangérén-Na.

Yohanes 5:44

Kamu maéré-éréke' i rarayo asé kakélé miow, wo ra'ica rumaméji mangéré i rarayo asi Amang Kasuruan si wayake' in esa. Sa taniitu, tambisa réén ro'na percayan iow Aku?

Roma 14:17

Ampa'paan sa si Amang Kasuruan mamuali kolano ang katouanta, eng kumataré-taré ra'ica andumoro' ing kakanen kuma'pa in elepen, taan andumoro' tumambisa mamuali tou nianggap wutul i Amang Kasuruan, menonou meelu-eluran wo sé kakélé tou, wo maaru-arui ampa'paan i Roh Le'nas.

Roma 2:27

Wo in taniitu sé tou ra'ica Yahudi mandé séra ra'ica sinunat, taan sa séra mengaéma' in ukum Torat, séra oka en tumuru' ing kameséaan iow tou Yahudi. Ampa'paan kamu, mandé sinunato taan ra'ica mengaéma' in ukum Torat sé aipatico itu.

Roma 3:1

Sé tou Yahudi wo sé tou ra'ica Yahudi puté waya an dior i Amang Kasuruan. Sa taniitu sapa eng kalébéan é tou Yahudi? Wo sapa eng katoronaan kumiit in atoran sunat?

Roma 7:6

Taan intarépé' kita aiwekaro asi atoran in ukum Torat, ampa'paan kita imatéo mewali-wali wo si Kristus akar kita ra'io pakakawasan in ukum si cumawasa icita indior. Ampa'paan ituo kita intarépé' sumelewir a si Amang Kasuruan ang karapi ing katouan weru si aituru' i Roh Le'nas, ra'ica ang karapi ing katouan uré kiit in aipatic an ukum Torat.

1 Korintus 4:5

Ampa'paan in tuo tioo kamu mario-rior en tumantu si esa tou meséa' kuma'pa ra'ica, sa ra'ipé' an témpona. Entoon akar si Apo' Yesus maai sumawel. Sia oka e muka' im pakasa sé pakaenep é tou ang kariréimbengan wo Sia oka ka'i en tumuru' pakasa em pawasa-wasan é tou an até. Asi témpo itu oka ka'i si Amang Kasuruan méé mai i rarayo a sé tou asi esa wo si esa sé patus tumerima i rarayo.

1 Korintus 7:19

Ampa'paan sinunat kuma'pa ra'ica sinunat sé rua itu ra'ica penting. Em penting sia makiit im perénta i Amang Kasuruan.

2 Korintus 10:18

Ampa'paan ra'ica si tou mengatirayo in owakna in esa si wutul am beren i Casuruan, taan si tou ipatirayo-tirayo i Casuruan, siao si wutul am beren-Na.

2 Korintus 3:6

Siao e méma' icami makawoo imamuali maselewir sé makua in esa perjanjian weru a sé tou. Em perjanjian itu ra'ica an ukum sé aipatico indior, taan asi Roh i Amang Kasuruan owo. Ampa'paan en ukum aipatic itu sa ra'ica kiiten, makawali am papaté, taan e Roh i Amang Kasuruan mawéé ing katouan.

Filipi 3:3

Taan icitao sé tou wutu-wutul sinunat, ra'ica iséra. Ampa'paan icitao sé tou mengaapo' a si Amang Kasuruan si pakaakinen i Roh-Na, wo mengatirayo ampa'paan meesa wo si Kristus Yesus, wo ra'ica mengamangén a si sapa sé kaséréan tanumai atoran in sunat.

1 Tesalonika 2:4

Kami tinokéano i Amang Kasuruan eng kumua in Abar Kaaruien andumoro' i Yesus Kristus, ampa'paan kami nianggap-Na patus eng kumua in itu. Ampa'paan in ituo ipakua-kua ami en Abar Kaaruien itu ra'ica asaloke' mengaarui in até é tou taan mengaarui in até i Amang Kasuruan si mengauji in atéta.

1 Petrus 3:4

Taan sa kamu masalé' uli-ulit kaséréan pasung, eng kapasungan iow itu musti kumesot an untep in até owo, tanumai: makaperi ko'kos en até wo elur. Siituo eng kapasungan akar ing kauré-uré wo sosor em bééna an dior i Amang Kasuruan.