Roma 2:1 - En Taar Weru a nunuwu' é Tontemboan

¹ Éi poo-poow, kailekan iow sapaoka sé tou mengaéma' ing kaléwo'an ukumen oka i Amang Kasuruan. Anaé, si séi réén kamu akar akimen iow sé tou walina? Kamu in esa ka'i ra'ica icawekar ang kameséaan! Ampa'paan sa kamu maakim sé tou walina taan kamu in esa maéma' ing kameséaan tanu iséra, eng kaangéanna kamu imakimo ka'i in owak iow in esa.

Roma 2:1 ပူးပေါင်းရင်းမြစ်များ

Lukas 12:14

Taan icua i Yesus ai sia, “Éi poow, si séi réén e mangkai Yaku mamuali akim kuma'pa mengawéténg im budel si aitela'u é matu'a miow?”

Lukas 19:22

Wo icua i tuangna a si ata itu, ‘Éi ata léwo'! Akimenku ko iciit in aicuamu in esa. Kailekanmuo em periku keté, mengaindo si ra'ica anuku wo mengaupu' si ra'ica ayusewku.’

Lukas 6:37

“Tioo kamu mengaakim sé tou walina wosama' kamu ra'- ica akimen. Wo tioo kamu mengaukum sé tou walina, wosama' kamu ra'ica ukumen i Amang Kasuruan. Wéanio' kaampungan a sé tou walina wosama' kamu ampungan i Amang Kasuruan.

Roma 14:22

Sa percayan iow em pengaémaan iow itu ra'ica meséa', émaano mangé en itu an diorke' i Amang Kasuruan wo torona in owak iow in esa. Pakakamangen sé tou ra'ica mendam i meséa' an tutuw sia méma' sapa si anggapenna wutul.

Roma 2:2

Kailekanta sa si Amang Kasuruan méé in ukuman a sé tou sé mengaéma' ing kameséaan, em pinusé'-Na itu wutul.

Roma 2:3

Wo kamu é poo-poow, ipatudu miow sé tou walina sapaoka séra patus in ukumen, tioo mawerot kamu ro'na icawekar an ukuman i Amang Kasuruan ampa'paan kamu in esa mengaéma' sé andumoro im pengaémaan éra.

Roma 3:9

Anaé tana'i, kailekanta sapaoka kita tou Yahudi ra'ica wana eng kalébéan sa ipeputé wo sé tou walina. Ampa'paan tarépé' kita tumuduo sé tou Yahudi wo ka'i sé tou ra'ica Yahudi, sapaoka séra im baya kinawasao ing kamesé-meséaan.

Roma 9:20

Taan kita ra'ica toro kumua in taniitu, kita anio' touke'. Wo kita in tou ra'ica wana hak eng kumua a si Amang Kasuruan sapaoka Sia meséa'. Ro'na réén eng kuré' kumua a si mengaéma' ing kuré, “Kéitu réén aku niéma'mu tana'i?”

1 Korintus 4:5

Ampa'paan in tuo tioo kamu mario-rior en tumantu si esa tou meséa' kuma'pa ra'ica, sa ra'ipé' an témpona. Entoon akar si Apo' Yesus maai sumawel. Sia oka e muka' im pakasa sé pakaenep é tou ang kariréimbengan wo Sia oka ka'i en tumuru' pakasa em pawasa-wasan é tou an até. Asi témpo itu oka ka'i si Amang Kasuruan méé mai i rarayo a sé tou asi esa wo si esa sé patus tumerima i rarayo.

1 Korintus 7:16

Éi kamu wéwéné-wéwéné maémano a si Kristus, ra'ipé' réén kailekan iow sapa e mamuali sa. Icamuo wona' e méma' sé penanaan iow ro'na lowiren. Taniitu ka'i kamu é tuama sé maémano a si Kristus, ra'ipé' réén kakailekan iow sapa e mamuali sa. Icamuo wona' e méma' sé penanaan iow ro'na lowiren.

Yakobus 2:20

Éi camu sé tou bodok! Masalé' réén pangakun iow intarépé' sapaoka em paémanenmu ra'ica wana torona sa ra'ica pengaémaan?

Yakobus 4:11

Poo-poowku, tioo kamu si esa wo si esa mengawuruk i ngaran é tou. Si séi e muruk i ngaran i poowna esa paémanen kuma'pa tumudu meséa', en itu meputé imuruko wo imééo séa' in ukum i Amang Kasuruan. Wo in taniitu kamu ra'ica masalé' kumiit in ukum i Amang Kasuruan itu, taan imamualio akim si mengaséa' in ukum itu.