Roma 16:10 - En Taar Weru a nunuwu' é Tontemboan

¹⁰ Icuao ka'i mangé en siri'ku a si Apeles. Sia uli-ulit le'tek a si Kristus mandé ka'i meta'up ing keli pangepé'an. Wo icuao ka'i mangé en siri'ku a sé tou am balé i Aristobulus.

Roma 16:10 ပူးပေါင်းရင်းမြစ်များ

Roma 14:18

Anaé, si séi mengaselewir a si Kristus tanu siitu, sia maruio in até i Amang Kasuruan wo ka'i pasiri-siriin é tou walina.

Roma 16:3

Icuao mangé en siri'ku a si Priskila wo a si penanaanna Akwila. Séra in dua kara-karapiku matawoi torona i Kristus Yesus.

Roma 16:7

Icuao ka'i mangé en siri'ku a si Andronikus wo si Yunias sé poo-poowku tou Yahudi kaputéku. Séra in dua maémano a si Yesus Kristus an tutuw aku ra'ipé' maéman. Séra in dua uli-ulit katuusan an uner é ruru'du'an i Apo' Yesus wo sumangkumo a yuntep am bui mewali-wali wo yaku.

Roma 8:11

Sa e Roh i Amang Kasuruan si tumou sumawel si Yesus an uner é tou maté maento' an untep in owak iow, eng kaangéanna en owak iow si ro'na maté itu, touen oka ka'i sumawel i Roh i Amang Kasuruan si tumouo sumawel si Yesus Kristus an uner é tou maté.

1 Korintus 11:19

Wutul musti awéan papetanéan an uner iow, wosama' kaséréan oka sa si séi ai camu sé wutu-wutul le'tek maéman a si Amang Kasuruan.

2 Korintus 12:2

Katuusanku si esa tou maéman a si Kristus, sia tumarépé'anke'mai icaangkai angé asi salé' katelu an sorga sangapulu' epat ngata'un ilumangkoio. Ra'ica kailekanku en owakna wutu-wutul icaangkai angé kuma'pa en itu asalo ipapaturu'an, si Amang Kasuruanke' e makailek.

2 Korintus 2:9

Indior aipaticku en surat ai camu e muji sa kamu wutu-wutul mengakiit sé aituru'kuo.

2 Korintus 5:17

Anaé, si séike' si maesao wo si Kristus, sia wutu-wutul mamualio tou weru. Em peri ing katouan uré ra'io wana ka'i. Pakasa eng katouanna imaweruo waya.

2 Korintus 8:22

Mewali-wali wo si Titus wo si esa poow, yutus ami ka'i si esa poow walina mangé mewali-wali wo iséra. Si poow itu pinenguri-ngurio niuji, wo kinaséréano ami sapaoka sia masalé' sumémbong. Wo intarépé', sia lébé masalé' sumémbong icamu, ampa'paan sia uli-ulit mercaya icamu.

Galatia 1:22

Akar asi témpo itu sé jamaat maéman a si Kristus an Yudea ra'ipé' kawisa isuméré ing gioku.

Filipi 2:22

Taan kailekano miow eng kale'tekan i Timotius kinaujiano. Sia sumémbongo mai a yaku an tutuw imengua-ngua in Abar Kaaruien, tanu si esa toyaang masémbong a si amangna.

1 Timotius 3:10

Wo an tutuw éra ra'ipé' niangkai mamuali maselewir an jamaat, séra ujin owo sumama-sama' é jamaat sapaoka eng katouan éra ra'ica wana tou e ro'na méé kaséaan.

2 Timotius 4:19

Timotius, icuao mio' en siri'ku a si Priska, a si Akwila wo a sé taranak i Onesiforus.

1 Petrus 1:7

Asé pangepé'an ituo e méé tuus sapaoka kamu uli-ulit maéman a si Casuruan. E mas ro'na maléwo' mandé niéma'o tulén tinunu an api. Em paémanen iow lumébé mai im bééna i mas, anaé musti ujin ka'i ing kelian pangepé'an wosama' makaketer akar kamu makéré oka i rarayo wo in sisiri' wo pengasiriin asi endo i Yesus Kristus mai sumawel.