Roma 15:14 - En Taar Weru a nunuwu' é Tontemboan

¹⁴ Poo-poowku an esa paémanen, uli-ulit percayanku sapaoka kamu iméma'o ing keli kalooran. Kamu ka'i kelio eng kakailekan andumoro' in sususuien i Amang Kasuruan, wo makawoo mensin-sina'uan si esa wo si esa.

Roma 15:14 ပူးပေါင်းရင်းမြစ်များ

1 Korintus 1:5

Ampa'paan kamu mamualio anu i Kristus, akar kamu imasiya'o am baya-waya tanu mai sé anio': makawoo maroma' i nunuwu' loor wo kelian eng kailekan andumoro' im paémanen a si Kristus.

1 Korintus 12:8

A si esa tou winéanai kamang aitambér i Roh e manuwu' mapaké ing kapinteran asi Amang Kasuruan owo. Wo a si Roh meputé ka'i, sé tou walina winéanai kamang aitambér i Roh e manuwu' mapaké ing keli eng kakailekan.

1 Korintus 13:2

Mandé ka'i aku tinambéranai ing kamang eng kumua in taar i Amang Kasuruan, makailek im pakasa sé paene-enep, makaanuo waya ing kakailekan, wo makaanu im paémanen lumeke-lekep e ro'na méra ing kuntung, taan sa aku ra'ica mengaupus sé tou walina, yaku uli-ulit ra'ica wana torona.

1 Korintus 8:1

Poo-poowku, intarépé' icasalé'ku icua ai camu andumoro' ing kakanen iparagés a sé opo-opo'. Awéan sé tou makua in tana'i: “Kita im baya sé maéman makaileko andumoro' in itu.” Eng kakailekan tanu siitu mengaéma' icamu makatirayo, taan en upus ro'na méé ing kaketeran a sé tou walina.

1 Korintus 8:10

Em peangé-angénku tana'i: kamu makaanuo ing kakailekan, ang karoro'an i makalukut makan in sama'na an tampa pengaapo'an a sé opo-opo'. Wo kamu kaséréan i esa tou sé ra'ipé' keter em paémanen, ang karoro'an i makalukut makan in sama'na am bitu, en itu iméma'o sia mekiit kuman ing kakanen si ayumpero a sé opo-opo' itu.

1 Korintus 8:7

Mandé ka'i in taniitu, ra'ica pakasa in tou makailek andumoro' in itu. Awéan tou indior mengaapo' a sé opo-opo', taan intarépé' maémano a si Yesus Kristus. Ampa'paan in ituo akar intarépé' séra makapendamé' sapaoka eng kakanen sé airagéso a sé opo-opo' itu, kakanen torona é opo-opo'. Anaé, sa séra kuman ing kakanen itu séra makapendam méma'o ing kamesé-meséaan, ampa'paan em paémanen éra ra'ipé' keter.

2 Korintus 8:7

Kamu siya' am baya-waya: siya' am paémanen, siya' a roroma', siya' ang kakailekan, siya' am pakasa in tawoien, wo siya' ang kaupusan iow ai cami. Ampa'paan in itu, lébé loor ka'i kamu siya' andumoro' i mengawéé ipatawang a sé tou walina.

Efesus 5:9

ampa'paan sa kamu menonou an sendot em pengaémaan iow asalo andumoro' sé loor, sé ra'ica marapit wo sé wutul.

Filipi 1:11

Isombayangku ka'i wosama' pengéma-ngémaan iow sé nianggap wutul i Amang Kasuruan ampa'paan si Yesus Kristus imatawoi ang katouan iow. Wo in taniitu si Amang Kasuruan oka si parayo wo pasiriin.

Filipi 1:7

Mémang patuso aku méé i makapulu'sama' in taniitu andumoro' icamu im baya, ampa'paan icamu im baya an atékuo. Wo ka'i kamu imamualio kara-karapi an tawoien si aitambérai i Amang Kasuruan a yaku. Kamu ra'ica mento' matawang yaku, mandé ka'i yaku am bui kuma'pa an tutuwku mengakua im pembélaan e méé tuus a sé tou sé ra'ica mapercaya in Abar itu, sapaoka en Abar Kaaruien si pakuaku itu wutul.

Kolose 3:16

Wo iwayao e nunuwu' i Kristus kasake' an até miow ang karapi i mawuta-wuta akar kamu si esa wo si esa ro'na mensun-susuian wo mensin-sina'uan ang karapi wuta ing kapinteran asi Amang Kasuruan owo. Wo icantaro mangé e mazmur, kakantaren rarayoan wo kakantaren rohani wo mawéé mangé i makapulu'sama' a si Amang Kasuruan si lumembo mai an até miow.

1 Tesalonika 5:11

Ampa'paan in ituo, mensin-sina'uano mangé kamu wo sé tou walina wo mengkeng-keterano mangé in até an esa paémanen, kaputé im pengaémaan iow akar intarépé'.

1 Tesalonika 5:14

Pangileken ami ka'i ai camu é poo-poow, pengaromaan angé in sama' sé tou ra'ica kiim tumawoi, keteran angé en até é tou toloindé', tawangen angé sé tou patus tawangen wo malese-lesen angé a sé im pakasa é tou.

2 Tesalonika 1:11

Ampa'paan in itu ipenomba-nombayang ami kamu wosama' kamu anggapen i Amang Kasuruanta patus towan-Na, wosama' lekepen-Na eng kasalé'an iow e méma' sé loor ang karapi ing kaketeran-Na wo lekepen-Na ka'i pakasa en tawoien im paémanenmu.

2 Timotius 1:5

Kata'néianku ka'i sapaoka ko wutu-wutul maéman a si Kristus, kaputé wo si nénému Lois wo si inangmu Eunike si rioro maéman a si Kristus.

Filemon 1:21

An tutuwku imatic in surat anio', percayanku sapaoka eng kale'tekanmu émaanmu oka sapa em pinangilekku. Wo percayanku ka'i sapaoka en émaanmu lumébé mai asi pinangilekku.

Ibrani 5:12

En ulitna kamu an témponao woo mamuali guru, taan kamu sangalipé' pasusuian é tou walina en andumoro' im patuuran in Taar i Amang Kasuruan. Kamu susupé' em paelepen, ra'ipé' makawoo tumerima ing kakanen keté.

Ibrani 6:9

Poo-poow sé icaupusku, mandé ka'i repeto eng kepokéi ami ai camu, percayan ami sapaoka kamu tou sé ra'ica tumela'u si Yesus. Kailekan ami sapaoka niéma'o miow sé andumoro' in loor si patus pengaémaan é tou sé linowiro i Amang Kasuruan.

2 Petrus 1:12

Ampa'paano in itu ipena'né-na'néiku ai camu andumoro im pakasa in itu, mandé ka'i kamu makaileko wo mauli-ulito maéma' in sususuien wutul i Casuruan si aisusuio ai camu.

1 Yohanes 2:21

Aipaticku en anio' ai camu, ra'ica ampa'paan kamu ra'ica makailek in sususuien wutul itu, taan ampa'paan kailekan iow en sususuien wutul itu wo ka'i kailekan iow sapaoka ra'ica wana en towo asi sususuien wutul itu.