Roma 13:11 - En Taar Weru a nunuwu' é Tontemboan

¹¹ Anaé, musti émaan iow sapa sé aicuakuo ai camu, ampa'paan kailekan iow sapaoka en orasna ra'io uré. Kamu ayandéku kaputé é tou makatekelé', ampa'paan in ituo tumooro. Ampa'paan eng kalowiran makatawio ai cita intarépé', sa en oras itu ipeputé an tutuw kita werupé' maéman.

Roma 13:11 ပူးပေါင်းရင်းမြစ်များ

Matius 16:3

wo asi mamoondo, sa en langit mariréimbengo, icua miow, ‘muran oka réén.’ En tuus sé kaséréan an langit ro'na kakailekan iow en itu mamuali, taan en tuu-tuus in jaman ra'ica kailekan iow.

Lukas 21:28

Sa pakasa en itu tumo'tolo mamuali, tu'tuleno mangé en atému wo maya'o mangé wuta im paarapen ampa'paan en témpona i Amang Kasuruan mai lumowir icamu makatawio.”

1 Korintus 10:11

Pakasa sé mamuali ai séra itu, mééo tuus ai cita. Wo pakasa en itu aipatic e méé tata'néi ai cita. Ampa'paan kita intarépé' menonou an oras imatawio ing kaka'puan ing kayo'baan.

1 Korintus 15:34

Anaé, mawutu-wutulo mangé mape'dis wo ra'io toro ka'i mengéma-ngéma' ing kamesé-meséaan. Ampa'paan an uner iow awéan sé ra'ipé' makatuus si Amang Kasuruan. Icuaku en anio' wosama' kamu malawi' wo mape'dis.

Efesus 5:14

Ampa'paan in ituo awéan en aipatic in tana'i, “Éi camu sé makatekelé', tumooro, wo tumouo mai sumawel am papaté wo si Kristus tumélang oka mai camu.”

Yakobus 5:8

Taniituo ka'i kamu, malese-leseno mangé wo kete-ketereno mangé en até miow ampa'paan ra'io uré en orasna si Apo' Yesus maai sumawel.

1 Petrus 4:7

En endo kaka'puan ing kayo'baan makatawio. Ampa'paano in itu, musti kawasan iow en owak asé kaléwo-léwo'an wo elur em bewerot wosama' kamu ro'na sumombayang.

2 Petrus 3:11

Anaé, sa em pakasa pakateri-terin oka tanu siitu, tumambisa réén kamu musti menonou intarépé'? Tantu musti menonou le'nas wo le'tek a si Amang Kasuruan.

2 Petrus 3:9

Awéan tou mawerot si Amang Kasuruan mauré-urépé' lumekep in janji-Na sapaoka si Kristus maai sumawel, taan en ulitna Sia talesen mengento-ngento' icamu mape'dis ampa'paan ra'ica icasalé'-Na sa awéan esake' ai camu meta'up im papaté. Taan en icasalé'-Na wosama' pakasa in tou ra'io mengéma-ngéma' ing kamesé-meséaan wo maréng sumawel méma' ing kasalé'an-Na.

1 Yohanes 2:18

Toya-toyaangku, asi oras anio' makatawio en endo kaka'puan ing kayo'baan. Wo sumangkumo lininga miow sapaoka maai oka si kaséké' i Kristus, wo intarépé' kelio sé kaséké' i Kristus mapaturu'o mai. Wo in taniitu kakailekantao sa si endo kaka'puan ing kayo'baan makatawio.

Wahyu 1:3

Pakakamangen sia si maca i nunuwuun i Amang Kasuruan anio' wo séra sé luminga wo mengaéma' sé aipatic an surat anio', ampa'paan pakasa en itu ra'io uré ka'i mamuali.

Wahyu 22:10

Wo icuana ka'i a yaku, “Tioo ségélen sé nunuwuun i Amang Kasuruan sé aipatic ang kitap anio', ampa'paan pakasa en itu ra'io uré ka'i mamuali.

Wahyu 22:12

Icua i Yesus ka'i, “En ulitna, ra'io uré ka'i Aku maai e maali in laasa-Ku en sumuli' a si esa wo si esa tou kiit im pinengaéma' éra.

Wahyu 22:20

Sia en icumua a yaku andumoro' im pakasa in anio', icua-Na, “Én, Yaku makala'us oka maai!” Ulit, mayoo, é Apo' Yesus!