Roma 12:7 - En Taar Weru a nunuwu' é Tontemboan

⁷ Sa eng kamang aitambér i Amang Kasuruan ai cita en sumelewir sé tou, kita ka'i musti mauli-ulit en sumelewir sé tou. Wo sa eng kamang aitambér i Amang Kasuruan ai cita en sumusui sé tou, kita musti mauli-ulit sumusui sé tou.

Roma 12:7 ပူးပေါင်းရင်းမြစ်များ

Matius 28:19

Ampa'paano in itu, mangém am pakasa im bangsa, wo émaano mangé séra mamuali murit-Ku. Baptiseno mangé séra ang karapi ngaran i Amang, i Toyaang wo i Roh Le'nas.

Yohanes 3:2

Asi sangawengi sia mai an tampa i Yesus, wo icuana ai Sia, “Guru, kailekan ami si Guru ayutus i Amang Kasuruan en sumusui ai cami. Ampa'paan, ra'ica wana tou e ro'na méma' sé kakaya'kaan kaputé sé niéma' i Guru, sa si Amang Kasuruan ra'ica mewali-wali wo isia.”

Kisah Para Rasul 13:1

An jamaat Antiokhia, awéan piraan nabi wo awéan ka'i sé masusui in Taar i Amang Kasuruan. Séra itu si Barnabas, si Simeon si pengatuulen Wuring, si Lukius si tou Kirene, Menahem si pinewangko' mewali-wali wo si colano Herodes, wo ka'i si Saulus.

Kisah Para Rasul 20:20

Taan aku kasake' tumawang icamu wosama' em paémanen iow mengawe-ngawes. Pakasa aicuakuo wo aisusuikuo ai camu an dior é tou keli wo ka'i am balé-walé.

Kisah Para Rasul 20:28

Ampa'paan in ituo, musti téiran iow sumama-sama' en owak iow in esa wo sé jamaat si aiwéé i Roh Le'nas en téiran iow. Téiran iow sé jamaat i Amang Kasuruan tanu si gembala matéir sé domba-Na. Sé jamaat itu mamuali anu i Amang Kasuruan ampa'paan linowir-Na séra in enda'-Na in esa.

Kisah Para Rasul 6:1

Sé tou mengakiit in sususuien i Yesus makaaweso eng kakeli. An tutuw itu sé tou Yahudi sé manuwu' i nunuwu' é Yunani mangingimbulu a sé tou Yahudi sé menganuwu' i nunuwu' é Ibrani. Ampa'paan sé wéwéné balu é tou Yahudi menganuwu' i nunuwu' é Yunani itu, ra'io pawéan rékén é tou an tutuw mengaéké ing kaperluan mengendo-ngendo.

1 Korintus 12:28

An jamaat, awéan piraan tou sé aitantuo i Amang Kasuruan mamuali: kataré ruru'du'an, karua nabi, katelu guru. Wo ka'i winéanai kamang tatambér e maéma' sé kakaya'kaan, in sumama' sé tou, tumawang sé tou sé perlu tawangen, mamuali kikiiten wo ka'i maroma' a membam-balinaan nunuwu' i roh.

1 Korintus 12:5

Wo membam-balinaan em pakaselewir a si Casuruan, taan si Casuruan paselewiran wayake' in esa.

1 Korintus 14:26

Anaé é poo-poow, sapa eng kaangéan im pakasa in itu? An tutuw iow mali'us mewali-wali i maapo', awéan sé tou makantar ing kakantaren marayo si Amang Kasuruan, awéan sé tou masusui, awéan sé tou makua i nunuwu' i Amang Kasuruan, awéan sé tou maroma' mapaké i nunuwu' i roh, wo awéan ka'i sé matutur ing kaangéan i nunuwu' i roh itu. Musti émaan iow pakasa en itu en sumusui wo torona ing kalooran iow im baya.

Galatia 6:6

Si tou tumerima in sususuien andumoro' in Taar i Amang Kasuruan, pakasa sé loor musti iwéténg a si tou si iméé in sususuien itu en tumawang ing kaperluan éra.

Efesus 4:11

Wo Siao en tumambérai ing kamang a sé tou. Awéan tou sé aitantu-Na mamuali ruru'du'an, mamuali nabi, mamuali tou mengakua in Abar Kaaruien andumoro' i Yesus Kristus, mamuali gembala é jamaat wo ka'i guru.

Kolose 4:17

Wo icuao mangé a si Arkhipus, “Tawoieno mangé en tawoien si aiwéé mai i Casuruan ai co akar ing kumawus.”

1 Timotius 2:7

Siituo imangémai aku sinisir i Amang Kasuruan mamuali ruru'du'an-Na e mangé a sé tou ra'ica Yahudi eng kumua in abar andumoro' im paémanen wutul. Pakasa sé aicuaku anio' ulit! Yaku ra'ica matowo.

1 Timotius 3:2

Si mengatilik an jamaat, sia itu musti ra'ica wana tou e ro'na méé kaséaan, si wéwéné penanaanna waya in esa, makawoo tumang in owak, mengapaké ing kapinteran asi Casuruan owo, makaperi sumoma, tansaléén mengaterima sé tou am baléna, pinter masusui sé tou,

1 Timotius 4:16

Ampa'paan ituo, téirano mangé sumama-sama' en owakmu wo ka'i téirano mangé sumama-sama' en sususuien wutul itu. Ico musti le'tek mengaéma' im pakasa in itu. Sa émaanmu waya en itu, ico lowiren i Amang Kasuruan ang karapi é tou sé mengalinga ai co.

1 Timotius 5:17

Sé penatua an jamaat sé mengaéma' in tawoienna ang karapi in loor, séra itu patus pasiri-siriin makarua lumepet. Wopé'ka'i sé re'dem makua in Taar i Casuruan wo masusui a sé jamaat.

2 Timotius 2:2

Liningamuo en sususuien si aisusuikuo an dior é tou keli. Musti isusuimu en itu a sé tou walina sé ro'na percayanmu wo sé pandéi masusui. Wo in taniitu séra ro'na sumusui sé tou walina.

2 Timotius 2:24

Taan si tou matawoi torona i Casuruan tanu ico ra'ica toro meindo-indoan roma' taniitu. Aweso taré si tou itu musti sama' a sé pakasa in tou, pandéi masusui wo ka'i talesen a sé pakasa in tou.

2 Timotius 4:2

icuamuo mangé en Taar i Casuruan a sé tou, loor kuma'pa ra'ica loor en orasna, ko musti tu'tul e mengua-ngua in Taar itu. Sina'ueno mangé sé tou mengaéma' ing kameséaan, romaan angé séra ang karapi wuta ing katalesenan an tutuw ko mengasusui iséra.