Roma 12:6 - En Taar Weru a nunuwu' é Tontemboan

⁶ Taniituo ka'i kita makaanu membam-balinaan kamang si aitambér i Amang Kasuruan iciit in upus aitambér-Na ai cita. Sa eng kamang aitambér-Na ai cita itu e makua i nunuwu'-Na a sé tou, musti icuata en Taar-Na itu kiit im paémanenta ai Sia.

Roma 12:6 ပူးပေါင်းရင်းမြစ်များ

Matius 23:34

Ampa'paan in ituo yutus-Ku oka mai ai camu sé nabi, sé tou pandéi wo sé makailek wutul in Torat. Taan awéan ai séra itu patén iow oka wo sé walina isalip iow. Sé walina ka'i okoien iow oka am balé-walé paapo'an iow wo awéan ka'i sé paangi-angiten iow asi kota esa akar asi kota walina.

Matius 25:22

Kumawus in itu, muntepai si ata tinokéan rua talenta, icuana, ‘Tuang, yaku tinokéan i tuang rua talenta. Sérénai, en untungku ka'i rua talenta.’

Lukas 11:49

Ampa'paan in ituo, indior maké ing kapinteran-Na si Amang Kasuruan kumua in tana'i, “Yutus-Ku oka sé nabi wo sé ruru'du'an-Ku mangé a sé tou Israel. Sé sangaperua ai séra okoien oka wo sé sangaperua ka'i patén oka.”

Kisah Para Rasul 13:1

An jamaat Antiokhia, awéan piraan nabi wo awéan ka'i sé masusui in Taar i Amang Kasuruan. Séra itu si Barnabas, si Simeon si pengatuulen Wuring, si Lukius si tou Kirene, Menahem si pinewangko' mewali-wali wo si colano Herodes, wo ka'i si Saulus.

Kisah Para Rasul 15:32

Si Yudas wo si Silas itu nabi, niéma' éra sé tou maéman an Antiokhia maibor wo ka'i kumeter in até éra.

Kisah Para Rasul 2:17

‘Asi endo-endo kaka'puan, itumpa-Ku oka e Roh-Ku a sé pakasa in tou. Sé toyaang iow tuama wo wéwéné kumua oka i nunuwuun-Ku a sé tou. Sé mangalitou wo mangala'un makéré oka papaturu'an wo sé matu'a makéré oka pangipin.

Kisah Para Rasul 21:9

Sia makatoyaang epat mangala'un. Sé toyaangna itu tinambéranai kamang i Amang Kasuruan e mengakua i nunuwu'-Na.

Roma 1:11

Ampa'paan icasalé'ku keli meta'up wo icamu wo méé ing kamang si pasusui i Roh i Amang Kasuruan a yaku, wosama' em paémanen iow makakete-keter.

Roma 12:3

Ampa'paano si Amang Kasuruan itumambéro mai in upus-Na a yaku e mamuali ruru'du'an-Na, ampa'paan in ituo sina'uenku kamu im baya tana'i: Tioo kamu mengawerot andumoro' sé ilumébé mai asi patus paweroten iow. Taan weroteno mangé eng kawooan in owak iow sé isumoma, iciit im paémanen si aiwéé i Amang Kasuruan ai camu asi esa wo si esa.

1 Korintus 12:18

Taan si esa wo si esa sé an owak winéano i Amang Kasuruan tampa an owak, kumiit ing kasalé'an-Na.

1 Korintus 13:2

Mandé ka'i aku tinambéranai ing kamang eng kumua in taar i Amang Kasuruan, makailek im pakasa sé paene-enep, makaanuo waya ing kakailekan, wo makaanu im paémanen lumeke-lekep e ro'na méra ing kuntung, taan sa aku ra'ica mengaupus sé tou walina, yaku uli-ulit ra'ica wana torona.

1 Korintus 14:1

Poo-poow, musti raméjin iow mengaupus a sé tou walina. Musti raméjin iow ka'i makéré ing kamang tatambér asi Roh Le'nas owo, eng kataré-taré kamang tatambér makua in taar i Amang Kasuruan.

1 Korintus 14:24

Taan sa kamu im baya sé an jamaat ang karoro'an makua in taar i Amang Kasuruan wo muntepai sé tou ra'ica maéman kuma'pa ra'ica makailek andumoro' ing kamang tatambér i Amang Kasuruan wo linganna waya sé ipakua miow, niéma'tao si tou itu manesel ing kamesé-meséaan an aténa wo pawerotenna sia patus makéré ukuman.

1 Korintus 14:29

Taniitu ka'i wo sé nabi, lébé loor wayake' in dua kuma'pa telu tou ai séra eng kumua in taar i Amang Kasuruan wo sé tou walina oka manilai sapa em ipakua éra itu.

1 Korintus 3:5

Sa kumiit icamu, si séi réén si Apolos itu? Wo si séi réén si Paulus itu? Kami in dua asalo tou maselewir a si Amang Kasuruan. Kami sé makawalio icamu e maéman a si Kristus wo kami si esa wo si esa asalo maéma' in tawoien si airu'du' i Amang Kasuruan ai cami.

1 Korintus 7:7

En ulitna lébé icasalé'ku woo pakasa en tou meputé wo yaku. Taan si Amang Kasuruan itumambéro mai ing kamang a sé tou esa wo si esa ra'ica pineputé, si esa winéanai sia'i, sé walina ka'i winéanai siitu.

2 Korintus 8:12

Sa kita mawéé ang karapi in lekep en até, teriman oka i Amang Kasuruan sapa sé aiwééta kiit ing kawooanta. Ampa'paan si Amang Kasuruan ra'ica kawisa mako tumuntut ai cita e méé si ra'ica kawooanta.

Efesus 3:5

Indior em pawasa-wasan-Na itu ra'ipé' kawisa aicua a sé tou, taan intarépé' sé pawasa-wasan-Na itu aituru'o i Roh i Amang Kasuruan a sé ruru'du'an sé sinisir-Na wo ka'i a sé nabi-Na.

Efesus 4:11

Wo Siao en tumambérai ing kamang a sé tou. Awéan tou sé aitantu-Na mamuali ruru'du'an, mamuali nabi, mamuali tou mengakua in Abar Kaaruien andumoro' i Yesus Kristus, mamuali gembala é jamaat wo ka'i guru.

Filipi 3:15

Ampa'paano itu, mayoo kita sé lekepo em paémanen e mawerot in taniitu. Sa awéan ai camu membalinaan em pakawerot wo yaku andumoro' in itu, ituru' oka i Amang Kasuruan ai camu sapaoka en aicuaku itu wutul.

1 Tesalonika 5:20

Wo tioo pengaepesen iow im beren e nunuwu' i Casuruan sé aicuao é nabi ai camu.

2 Petrus 1:20

Si kumataré-taré musti ta'néien iow, sapaoka e nunuwu' asi Amang Kasuruan owo sé aipatic é nabi indior ang Kitap Le'nas ra'ica toro ti'tiren kumiit im bewerot in tou.