Roma 12:12 - En Taar Weru a nunuwu' é Tontemboan

¹² Maaru-aruio mangé kamu ang karoro'an i maarap a si Amang Kasuruan. Wo malese-leseno mangé mengasangkum ing kawenduan, wo ka'i le'tek mengasombayang.

Roma 12:12 ပူးပေါင်းရင်းမြစ်များ

Matius 5:12

Maaru-aruio wo masalé-salé'o, ampa'paan en laasamu wangko' an sorga. Sé nabi menonou indior ka'i niokoio tanu siitu.”

Lukas 10:20

Mandé in taniitu, kamu tioo masalé-salé' ampa'paan kinalao miow sé sétang, aweso taré kamu maaru-aruio ampa'paan e ngaran iow aipatico an sorga.”

Lukas 21:19

Sa kamu wutu-wutul le'tek maéman a Yaku kamu makéré oka ing katouan akar ing kauré-uré.”

Lukas 8:15

Wo en lulumbo irumongkor an tana' kemel itu, ayandé sé tou ilumingao in Taar i Amang Kasuruan wo en Taar itu wutu-wutul ayéma' éra an untep in até akar séra méé wua'na ing kale'tekkan.”

Kisah Para Rasul 1:14

Séra im baya le'tek mengali'us wo meesa en até mengasombayang. Séra mengasombayang mewali-wali wo sé piraan wéwéné ang karapi i Maria inang i Yesus wo sé poo-poow i Yesus.

Kisah Para Rasul 12:5

Taniituo si Petrus tinang am bui. Taan sé tou maéman ra'ica mento' menomba-nombayang a si Amang Kasuruan torona i Petrus.

Kisah Para Rasul 2:42

Séra mengali'us mewali-wali wo le'tek mengalinga sé ruru'du'an mengasusui in andumoro' i Yesus. Wo séra tatap mengaéma' im perjamuan wo mengasombayang.

Kisah Para Rasul 6:4

Wo in taniitu, kami asaloka mengasombayang wo mengakua in Taar i Amang Kasuruan.”

Roma 15:13

Pekiupusenku a si Amang Kasuruan si palemboian im paarapen, e méé mai ing kaaruian wo ing kaeluran si mawuta-wuta ampa'paan kamu maéman ai Sia, wosama' eng kaketeran i Roh Le'nas lumepe-lepet ai camu, am paarapen a si Amang Kasuruan.

Roma 15:4

Pakasa en aipatic ang Kitap Le'nas indior en sumusui ai cita. Wo pakasa en sususuien an untepna aiwéé e méma' icita talesen wo méé ing kaketeran im paémanen, wosama' kita tatapke' i maarap a si Amang Kasuruan.

Roma 2:7

Sé tou le'tek mengaéma' sé loor sé masalé' makéré i rarayo wo in sisiri' wo ing katouan sé ra'ica maka'pu, séra wéan-Na oka ing katouan akar ing kauré-uré.

Roma 8:25

Taan sa em paarapen itu ra'ipé' imamuali, en itu musti entoonta ang karapi in talesen.

1 Korintus 13:13

Anaé, intarépé' awéan telu hal si kasake' émaanta: maéman, mengaarap wo meupu-upusan. Taan si penting keli asé telu itu meupu-upusan.

2 Korintus 12:8

Makateluo aku mekiupus a si Casuruan wosama' en sakit itu angkaienai a yaku.

Filipi 3:1

Anaé, é poo-poowku, maaru-aruio mangé ampa'paan kamu meesao wo si Apo' Yesus. Yaku ra'ica mendam in uter e matic sumawel sapa sé aipatickuo ai camu. Ampa'paan eng kasalé'anku en tuméir icamu wosama' kamu ra'ica kauwakan in sususuien imasélé'kow.

Filipi 4:4

Maaru-aruio mangé ampa'paan kamu meesao wo si Apo' Yesus! Makasapé' icuaku, maaru-aruio mangé!

Kolose 1:11

Pekiupusen ami ka'i a si Amang Kasuruan wosama' kamu keteren-Na mai ang karapi ing kawasa i rarayo wo in sisiri'-Na, wosama' an tutuw iow meta'up ing kawenduan, kamu kasake' le'tek wo talesen masaru waya in itu,

Kolose 1:27

Wo Sia masalé' kumua a sé tou-Na sapaoka sé icaenepé' itu uli-ulit loor wo wangko' asé pakasa in tou sé ra'ica Yahudi. Sé ipakaenep itu tana'i, si Kristus an atéo miow, eng kaangéanna kamu awéan paarapen makéré im bagéan asi rarayo wo in sisiri' asi Amang Kasuruan owo.

Kolose 4:12

Si Epafras méé ka'i mai in siri' ai camu. Sia esaan an jamaat iow wo ata i Yesus Kristus. Kamu penomba-nombayangna wosama' em paémanen iow a si Kristus Yesus makaenté-enté' tanu tou wangkoo wosama' kamu ka'i wutu-wutul makailek sapa waya sé icasalé' i Amang Kasuruan.

Kolose 4:2

Masombayango mangé in re'dem kamu ang karapi im bewerot weresi wo ka'i makua mangé i makapulu'sama' a si Amang Kasuruan.

1 Tesalonika 1:3

Susur ami sumombayang a si Amang Kasuruan Amangta, pena'né-na'néien ami em pakaselewir iow ampa'paan kamu maéman a si Yesus. Kata'néian ami tambisa kamu maselewir a sé tou walina ampa'paan séra icaupus iow. Kata'néiané' ami mandé ka'i kamu talesen meta'up ing kawenduan, pengaraméjin iow mengaéma' sé loor ampa'paan maara-arapke' a si Yesus Kristus Apo'ta.

1 Tesalonika 5:8

Taan kita anio' sé maéman a si Casuruan, musti kumawasa in owak tanu ing katouan é tou in sendot. Kita ka'i musti maéman a si Amang Kasuruan wo meupu-upusan, siituo en tuméir icita aipeputé wo si suraro mengapaké ing karai bési pari'dir in owak. Kita ka'i musti mauli-ulit maarap sapaoka kita lowiren oka i Casuruan, aipeputé wo si suraro makapaké in topi waja en tuméir in do'kosna.

2 Tesalonika 1:4

Ampa'paan in itu, kami arui masisil a sé jamaat in andumoro' icamu, ampa'paan kamu kasake' maéman a si Yesus wo kasake' talesen mandé ka'i kamu mendam in okoi wo ing kawenduan.

2 Tesalonika 3:5

Pangileken ami a si Casuruan wosama' akinen-Na mai kamu akar en até miow makailek sapaoka si Amang Kasuruan mengaupus icamu wo ka'i si Yesus Kristus mengawéé ing katalesenan ai camu.

1 Timotius 6:11

Taan ko é Timotius, ico tou i Amang Kasuruan, tumayango mangé ko asé pakasa ing kaléwo-léwo'an. Rumaméjio mangé ko kumiit sé anio': tioo mengarapit, mengaapo' mangé makiit ing kasalé'an-Na, le'tek maéman a si Yesus, mengaupus sé kakélé tou, talesen mengasaru ing kasusaan wo ko'kos en até.

2 Timotius 3:10

Taan ko é Timotius, makaileko sé aisusuiku, em periku, em pendirianku, tambisa aku maéman a si Yesus, eng katalesenanku, en upusku a sé tou wo eng kale'tekanku mengaéma' in tawoienku.

Titus 2:13

Émaanta waya en itu ang karoro'anta mengento-ngento'pé' wo maarap in endo i Casuruan maai sumawel. Sia itu si Amang Kasuruan mangko-wangko', Siao si Yesus Kristus si Lumolowirta. Sia maai wuta i rarayo wo in sisiri' wo maali mai ing kamang ai cita im baya.

Titus 3:7

Aitambér-Nao mai en upus-Na wosama' kita anggapen-Na wutul an dior-Na wo ro'na makéré ing katouan akar ing kauré-uré, kiit im paara-arapenta.

Ibrani 10:32

Taan ta'néieno mangé si oras ilumangkoio, an tutuw kataré-taré en até miow tinélangai in sendot i Amang Kasuruan e makatuus asi Kristus. An tutuw itu kamu meta'up ing keli kawenduan taan kamu makawoo tumang am paémanen iow.

Ibrani 10:36

Anaé, intarépé' kamu musti malese-lesen sa meta'up ing kawenduan, wosama' kaémaan iow eng kasalé'an i Amang Kasuruan. Wo in taniitu kamu ro'na tumerima sapa sé aijanji-Na.

Ibrani 12:1

Tumo'tolke' mai indior, keli en tou sé imamuali sairi im paémanen éra torona icita. Kita pakali'ciren é tou keli itu tanuoka ing kambung makali'cir icita. Ampa'paan in ituo mayoo tiya'ta waya em pamuléngen wo ing kamesé-meséaan si makaléngkété' ai cita, wo kasake' talesen am pekowaan si pakasarunta.

Ibrani 3:6

Taan si Kristus le'tek tanu Toyaang si makakawasa am balé i Amang Kasuruan. Wo icitao em balé-Na itu sa timboianta wutu-wutul em paémanenta wo em paarapen si pengatirayota.

Ibrani 5:7

An tutuw i Yesus menonou tanu tou ang kayo'baan, Sia masombayang wo mapekiupus ang karapi imaangko' maamé' a si Amang Kasuruan si makawoo lumowir Sia am papaté. Ampa'paan Sia le'tek wo wuta in siri' a si Amang Kasuruan, akar en sombayang-Na lininga.

Ibrani 6:12

Wo in taniitu kamu ra'ica mangenger. Taan en casalé' ami wosama' kamu mengaandé mangé a sé tou sé tumerima in janji i Amang Kasuruan ampa'paano im paémanen wo ing katalesenan éra imaento-ento' mai in janji-Na itu.

Ibrani 6:15

Si Abraham talesen keli mangento-ngento' in janji itu mamuali, wo in taniitu kinéréanna sapa si aijanjio i Amang Kasuruan ai sia.

Yakobus 5:7

Ampa'paan in ituo é poo-poow, malese-leseno mangé kamu akar si Apo' Yesus maai sumawel. Séréno tambisa si tou menganguma talesen keli mengento-ngento' in uran an oras i mausew wo an oras in tinanem mua'. Sia talesen mengento-ngento' im buéna si awéan em bééna asi tana'na itu.

1 Petrus 4:13

Taan maaru-aruio mangé, ampa'paan kamu kumiito imendam ing kawenduan tanu si pinendamai i Kristus, wosama' an tutuw i Kristus maai sumawel ang karapi i rarayo wo in sisiri'-Na, kamu ro'na masalé-salé' wo maaru-arui.

1 Petrus 4:7

En endo kaka'puan ing kayo'baan makatawio. Ampa'paano in itu, musti kawasan iow en owak asé kaléwo-léwo'an wo elur em bewerot wosama' kamu ro'na sumombayang.

2 Petrus 1:6

Wo asi kapinteran iow itu musti awesan iow i makawoo kumawasa in owak. Wo asi kumawasa in owak itu musti awesan iow ka'i ing katalesenan mengasaru im baya-waya. Wo asi katalesenan mengasaru im baya-waya musti ka'i awesan iow i menonou le'tek a si Amang Kasuruan.

Wahyu 13:10

“Si séi si aitantuo e mamuali tawanan, sia mamuali oka tawa- nan. Si séi si aitantuo patén in sa'bel sia patén oka in sa'bel.” Ampa'paan in ituo sé tou le'nas musti talesen wo le'tek maéman mandé meta'up ing kawenduan.