Roma 11:14 - En Taar Weru a nunuwu' é Tontemboan

¹⁴ Arapenku, ang karapi in tawoienku itu sé tou Israel sé esa taranak wo yaku manganat ai camu tou ra'ica Yahudi. Ang karapi in tumaniitu, arapenku aku ro'na lumowir piraan tou asé tou Israel.

Roma 11:14 ပူးပေါင်းရင်းမြစ်များ

Roma 10:19

Wuéienkupé' ka'i: Ra'ipé' réén kailekan é tou Israel en abar itu? Én, kailekan érao, ampa'paan kataré-taré si Musa kumua i nunuwu' i Amang Kasuruan ai séra tana'i, “Émaan-Ku oka kamu manganat a sé tou sé ra'ica tou-Ku, wo émaan-Ku oka kamu mae'bow, ampa'paan Aku méé ing kamang a sé tou sé paanggapen iow bodok.”

Roma 11:11

Anaé, intarépé' keli sé tou Israel icasangkil ampa'paan séra ra'ica maéman. Wuéienku sumawel: Sa sé tou Israel icasangkilo tanu siitu, icélong réén i Amang Kasuruan séra akar ing kauré- uré? Ra'ica taniitu, séra teriman oka. Taan ampa'paan ing kaséaan éra, akar si Amang Kasuruan méé mai in lalan kalowiran a sé bangsa walina. Émaan-Na taniitu ai séra wosama' sé tou Israel manganat ai séra.

Roma 9:3

Séra itu poo-poowku kaputé wo yaku. Yaku in esa tu'tulo ing kutuken i Amang Kasuruan wo ipetané asi Kristus sa en itu ro'na méma' sé tou Israel itu malowir an ukuman ing kamesé-meséaan.

1 Korintus 1:21

Ampa'paan mandé tambisa eng kapinteran é tou ang kayo'baan, ra'ica makawoo makatuus si Amang Kasuruan sa asalo maké ing kapinteran in esa. Taan ampa'paan ing kapinteran i Amang Kasuruan, pinusé'-Nao en lumowir sé tou maéman ai Sia kumiit in abar ipakua-kua ami. En abar itu, paanggapen é tou ra'ica maéman a si Yesus, abar ra'ica wana torona.

1 Korintus 10:33

Menonouo mio' kaputéku. Raméjinku marui in até é tou am baya-waya. Yaku ra'ica mangéré ing kalooranku in esa, taan aku mangéré ing kalooran é tou keli wosama' séra ro'na lowiren.

1 Korintus 7:16

Éi kamu wéwéné-wéwéné maémano a si Kristus, ra'ipé' réén kailekan iow sapa e mamuali sa. Icamuo wona' e méma' sé penanaan iow ro'na lowiren. Taniitu ka'i kamu é tuama sé maémano a si Kristus, ra'ipé' réén kakailekan iow sapa e mamuali sa. Icamuo wona' e méma' sé penanaan iow ro'na lowiren.

1 Timotius 1:15

Sé nunuwu' anio' ulit wo ro'na teriman wo percayanmu. En aicua tana'i: Si Kristus Yesus mai ang kayo'baan en lumowir sé tou ang kamesé-meséaan. Wo a sé im pakasa in tou sé sumangkumo mengaéma' ing kamesé-meséaan, yakuo si kumeli-keli mengaéma' ing kamesé-meséaan.

1 Timotius 2:4

wo icasalé'-Na ka'i wosama' pakasa in tou malowir wo makailek in sususuien wutul.

1 Timotius 4:16

Ampa'paan ituo, téirano mangé sumama-sama' en owakmu wo ka'i téirano mangé sumama-sama' en sususuien wutul itu. Ico musti le'tek mengaéma' im pakasa in itu. Sa émaanmu waya en itu, ico lowiren i Amang Kasuruan ang karapi é tou sé mengalinga ai co.

2 Timotius 1:9

Aiwéé-Nao eng kalowiran ai cita wo tinowa-Na kita wosama' menonou le'nas kumiit ing kasalé'an-Na. Niéma'-Na waya en itu ra'ica ampa'paan kita maéma' ing kaloo-looran, taan ampa'paan pinewasa-Nao indior. An tutuw eng kayo'baan anio' ra'ipé' niéma'-Na, Sia mawasao tumambérai in upus-Na ai cita in tou ampa'paan i Kristus Yesus.

2 Timotius 2:10

Ampa'paan in iituo aku talesen mengawuléng ing kawenduan itu wosama' sé tou sinisiro i Amang Kasuruan ro'na maéman a si Kristus Yesus wo makéré ing kalowiran ang karapi i rarayo wo in sisiri' akar ing kauré-uré.

Titus 3:5

An tutuw itu Sia lumowiro icita, en itu ra'ica ampa'paan kita mengaéma' im butul an dior-Na taan ampa'paan aituru'-Nao eng kaupusan-Na ai cita. Weresin-Na eng kamesé-meséaanta wo pakén-Na e Roh Le'nas e méma' ing katouanta maweru. En itu meputé kita tumou sumawel.

Filemon 1:12

Intarépé' sia si paupu-upusku itu, iru'du'ku mangé sumawel ai co.

Ibrani 1:14

Sa taniitu, si séi réén sé malaékat itu? Séra sé roh mengaéma' sapa sé airu'du' i Amang Kasuruan, sé ayutus-Na en tumawang sé tou sé makéré oka ing kalowiran.

Ibrani 2:3

Sa taniitu, tambisa réén kita? Kita ra'ica toro icawekar an ukuman, sa ra'ica wéanta rékén en abar andumoro' ing kalowiran si lébé pentingai wo in taar itu. Ampa'paan si Apo' Yesus in esa eng kataré-taré makua in abar andumoro' ing kalowiran itu, wo sé tou kataré-taré iluminga in itu, aicuao éra en abar itu ai cita akar kakailekanta sapaoka en abar itu wutul.

Yakobus 5:20

Ta'néien iow en anio': Si tou e makin sumawel si tou meséa' tumela'u in lalan sélé'kow, niéma'nao e mu'kur i tou itu lowiren oka am papaté wo niéma'nao eng kamesé-meséaan i tou itu niampungan.