Roma 1:20 - En Taar Weru a nunuwu' é Tontemboan

²⁰ Mandé si Amang Kasuruan ra'ica kaséréan taan Sia ro'na kailekan é tou asé niéma'-Nao, tanu mai eng kaketeran-Na akar ing kauré-uré wo eng kale'nasan ing kakawasaan-Na tumo'tolke' mai eng kayo'baan anio' niéma'. Anaé, mandé esake' tou ra'ica wana e ro'na kumua sapaoka sia ra'ica makatuus si Amang Kasuruan.

Roma 1:20 ပူးပေါင်းရင်းမြစ်များ

Matius 5:45

Sa émaan iow taniitu, kamu mamuali toya-toyaang i Amang iow an sorga, si mantangai si yéndo a sé tou léwo' wo a sé tou sama' wo mawéé mai in uran a sé tou sé maéma' im butul wo a sé tou sé ra'ica mengaéma' im butul.

Markus 10:6

Taan asi kataré-taré si Amang Kasuruan méma' ing kayo'baan anio', niéma'-Na tuama wo wéwéné.

Yohanes 1:18

Ra'ica wana tou en sumangkumo suméré si Amang Kasuruan, wayake' si Toyaang-Na Esa-esa. Sia meputé wo si Amang wo susut keli ai Sia. Siao en cumua ai cita andumoro' si séi si Amang Kasuruan itu.

Yohanes 15:22

Sa Aku ra'ica mai ang kayo'baan wo ra'ica aicua-Ku ai séra en sususuien i Amang Kasuruan, tantu séra ra'ica perlu kumélong Yaku, anaé séra ra'ica iméma' ing kamesé-meséaan. Taan intarépé' Aku ang kayo'baano wo aicua-Kuo en sususuien itu ai séra, taan Aku aicélong érake'. Anaé, ra'ica wana alasan séra kumua sapaoka séra ra'ica méma' ing kamesé-meséaan.

Kisah Para Rasul 17:29

Ampa'paan kita toya-toyaang-Na, kita ra'ica toro mengawerot sa si Amang Kasuruan itu meputé im patong mas, pérak kuma'pa watu si niéma' é mengaéma' im patong.

Kisah Para Rasul 22:1

“Éi tuang-tuang wo sé poo-poow, lingan iow, awéan en icuaku ai camu e méla in owakku!”

Roma 1:19

Wo sapa e ro'na kailekan é tou andumoro' i Amang Kasuruan, kakailekan éra wutul an untep in até, ampa'paan en itu aituru'o i Amang Kasuruan ai séra.

Roma 16:26

Taan intarépé', ampa'paano im perénta i Amang Kasuruan si menonou akar ing kauré-uré, si paene-enep-Na itu aituru'o wo aicuao a sé im pakasa in suku maké ing kitap-kitap sé aipatico é nabi, wosama' séra maéman wo le'tek a si Amang Kasuruan.

Roma 2:1

Éi poo-poow, kailekan iow sapaoka sé tou mengaéma' ing kaléwo'an ukumen oka i Amang Kasuruan. Anaé, si séi réén kamu akar akimen iow sé tou walina? Kamu in esa ka'i ra'ica icawekar ang kameséaan! Ampa'paan sa kamu maakim sé tou walina taan kamu in esa maéma' ing kameséaan tanu iséra, eng kaangéanna kamu imakimo ka'i in owak iow in esa.

Roma 2:15

Anaé, asé peri éra ituo, imééo tuus sapaoka en ukum Torat itu aipatico an até éra. Em pakawerot éra sumangkum mengaséa' in owak in esa, sumangkum ka'i mengawutul in owak in esa, en itu aituru' in até weresi éra.

1 Korintus 1:20

Sa taniitu, sapa en torona é tou awéan kapinteran? Wo sapa en toronana sé tou makailek wutul in Torat? Wo sapa en torona sé tou pandéi ang kayo'baan anio' sé masalé' masundur i nunuwu' é tou walina? En ulitna aituru'o i Amang Kasuruan sapaoka eng kapinteran é tou pandéi itu ra'ica wana torona.

Kolose 1:15

Si Kristus itu tanu paséréan pakasa im peri i Amang Kasuruan si ra'ica kaséréan. Si Kristus itu Toyaang-Na luluna si lébé penting asé pakasa sé niéma'-Na.

Kolose 2:9

Anaé, kamu tioo katawéran in sususuien itu, ampa'paan pakasa em peri i Amang Kasuruan awéano an owak i Kristus ang karapi in lekep.

1 Timotius 1:17

Irayoo si Amang Kasuruan! Siao si Colanota akar ing kauré-uré. Sia awéan akar ing kauré-uré, Sia ra'ica kaséréan wo Sia wayake' in esa. Sia itu parayo-rayo wo pasiri-siriin akar ing kauré-uré. Ulit.

1 Timotius 6:16

Siao ka'i si ra'ica kakawasaan im papaté. Sia menonou ang kasendotan wo sé tou ra'ica toro sumusut asi sendot itu. Wo ra'ipé' wana tou si sumangkumo suméré Sia. Siake' si patus siriin. Pakasa eng kawasa ai Sia akar ing kauré-uré. Ulit.

Ibrani 11:27

Ampa'paan im paémanenna, itela'una en Mesir ra'ica maindé' icae'bow i colano Mesir. Sia mawaya' melala'us makaséréke' an dior tanuoka makaséréo si Amang Kasuruan si ra'ica kaséréan itu.

Ibrani 9:14

Anaé, sa en enda' wo en awu é binatang itu ro'na meresi in tou, lébé-lébépé' ka'i en enda' i Kristus! En enda'-Na ro'na lume'nas in até weresita asi mengéma-ngéma' sé ra'ica wana en torona, wosama' kita ro'na maapo' a si Amang Kasuruan si menonou. Ampa'paan si Kristus imééo in owak-Na in esa a si Amang Kasuruan tanu raragés si makaleke-lekep, ampa'paano ing kawasa i Roh i Amang Kasuruan si menonou akar ing kauré-uré.