Roma 1:16 - En Taar Weru a nunuwu' é Tontemboan

¹⁶ Yaku ra'ica malawi' mengakua in Abar Kaaruien andumoro' i Yesus Kristus itu, ampa'paan en Abar itu awéan kaketeran i Amang Kasuruan en lumowir im pakasa sé tou maéman; kataré-taré sé tou Yahudi wo ka'i sé tou walina.

Roma 1:16 ပူးပေါင်းရင်းမြစ်များ

Markus 8:38

Ampa'paan si séike' mangé e malawi' ampa'paan Yaku wo in sususuien-Ku an dior é tou sé ra'ica le'tek wo keli kamesé-meséaan anio', si Toyaang i Tou ka'i malawi' oka mangaku si tou itu an tutuw-Na maai ang kawasa wangko' i Amang-Na, mewali-wali wo sé malaékat le'nas.”

Lukas 9:26

Ampa'paan si séike' e malawi' ampa'paan Yaku wo in sususuien-Ku, si Toyaang i Tou ka'i malawi' oka isia an tutuw-Na maai sumawel ang karapi ing kawasa wangko'-Ku wo ing kawasa wangko' i Amang-Ku wo sé malaékat le'nas.

Yohanes 7:35

Ampa'paano in itu, sé kikiiten é tou Yahudi mengkung-kuanan, “Am bisa réén en angéan-Na akar kita ra'io ka'i meta'up wo Sia? Awéan réén em basa-Na i maangé a sé tou Yahudi sé imanangkéi an sangkum é tou Yunani? Masalé' réén Sia sumusui a sé tou Yunani?

Kisah Para Rasul 3:26

Ampa'paan in ituo, si Amang Kasuruan isumisiro si Ata-Na wo yutus-Na kataré-taré ai camu wosama' Sia kumamang icamu, en lalanna tawangen-Na kamu si esa wo si esa en tumela'u ing kaléwo-léwo'an.”

Roma 10:17

Anaé, sé tou ro'na maéman, ampa'paan séra luminga in abar. Wo en abar itu ro'na lingan éra ampa'paan awéan tou e mangé kumua in abar andumoro i Kristus itu ai séra.

Roma 15:19

wo en tuu-tuus kakaya'kaan sé niéma'ku maké ing kawasa i Roh Le'nas. En Abar Kaaruien andumoro' i Yesus Kristus itu aicuakuo waya a sé tou, tumo'tolai an Yerusalem akar an Ilirikum.

Roma 15:29

Kailekanku, sa aku mangé meta'up ang karapi miow, tantu paalianku oka mangé ai camu keli kamang i Kristus.

Roma 2:9

Pakasa in tou sé masalé'ke' mengéma-ngéma' sé léwo' sumangkum oka ing kasusaan wo ing kawenduan; kataré-taré sé tou Yahudi wo ka'i sé tou ra'ica Yahudi.

Roma 4:11

Anaé, an tutuw i Abraham ra'ipé' sinunat, sia maémano a si Amang Kasuruan. En sunat itu asalo tuus sapaoka si Abraham tinerima i Amang Kasuruan wo nianggap-Na wutul ampa'paan maéman ai Sia. Anaé, si Abraham tinerima i Amang Kasuruan an tutuw sia ra'ipé' sinunat. Ampa'paan in ituo sia mamuali amang im pakasa é tou maéman mandé ka'i sé tou maéman itu ra'ica sinunat. Wo ampa'paano im paémanen éra, séra nianggap wutul i Amang Kasuruan.

1 Korintus 15:2

Sa kamu tumimboi mauli-ulit a si Abar Kaaruien si aicuakuo itu, kamu linowiro i Amang Kasuruan. Taan sa kamu ra'ica matimboi mauli-ulit asi Abar Kaaruien itu, em paémanen iow ra'ica wana torona.

1 Korintus 2:2

Ampa'paan eng kauré aku mewali-wali wo icamu, pinusé'kuo ra'ica kiimku kumua andumoro' sé walina ai camu, aluar andumoro'ke' i Yesus Kristus si maté ang kayu salip.

1 Korintus 2:4

An tutuw aku maroma' wo makua in Abar Kaaruien ai camu, yaku ra'ica mapaké nunuwu' ing kapinteran in tou im percayan iow, taan aku mapercaya a si kawasa i Roh Le'nas.

1 Korintus 9:12

Sa sé tou walina masusui in Taar i Casuruan ai camu wo séra awéan hak e makéré sé paperlun éra susur in endo ai camu, tantu icamipé' en lébé awéan hak wo iséra. Taan ra'ica kiim ami maké in hak itu. Aweso taré tanggongen ami in esa eng kawenduan ami, wosama' kami ra'ica sumémpér sé tou en tumerima in Abar Kaaruien andumoro' i Yesus Kristus.

1 Korintus 9:18

Anaé, sa taniitu sapa en laasa kéréanku? En laasa kéréanku anio': yaku makawoo kumua in Abar Kaaruien andumoro' i Yesus Kristus wo ra'ica wana e méé laasa, wo aku ra'ica maké in hakku e mangilek in laasa e mengakua in Abar Kaaruien itu.

2 Korintus 2:12

An tutuwku icateka'o mangé an Troas eng kumua in Abar Kaaruien andumoro' i Yesus Kristus, kinaséréankuo sapaoka si Amang Kasuruan imuka'o in lalan a yaku en sumelewir am bitu.

2 Korintus 4:4

Sé tou ra'ica mapercaya, em pakawerot éra winolao i opo' léwo' si makakawasa ing kayo'baan anio', akar séra ra'io mailek in sendot in Abar Kaaruien itu. Anaé, séra ra'ica makailek tambisa eng kawangko' i rarayo wo in sisiri' i Kristus, si meputé ulit wo si Amang Kasuruan.

2 Korintus 9:13

Wo asi kasamaan in até sé aituru' miow itu, kelian oka en tou an Yerusalem rumayo si Amang Kasuruan ampa'paan séra isumeréo icamu wutu-wutul menonou makiit wutul in Abar Kaaruien andumoro' i Yesus Kristus. Wo ka'i séra rumayo si Amang Kasuruan ampa'paan kamu wutul lekep en até mawéé in tatawang ai séra wo a sé pakasa in tou walina.

Galatia 1:7

En ulitna ra'ica wana lalan walina e makéré ing kalowiran. Taan kamu tinawéro é tou sé mengalicoko icamu ang karapi in sususuien andumoro' in abar sé mengasélé'kow. Em peangé-angén éra en sumali'si' in Abar Kaaruien andumoro' i Yesus Kristus si pakua ami.

1 Tesalonika 2:13

An tutuw ipakua ami en taar i Amang Kasuruan, tinerimao miow en itu tanu nunuwu' i Casuruan ra'ica nunuwu' é tou. Wo en aisowat iow itu wutul, ampa'paan en taar i Amang Kasuruan itu ang karoro'ano i matawoi ang katouan iow sé maéman a si Apo' Yesus. Ampa'paan in ituo kami mengua-ngua i makapulu'sama' ai Sia.

1 Timotius 1:11

En sususuien wutul itu aipatic an Abar Kaaruien andumoro' i Yesus Kristus, si asi Amang Kasuruan wangko' owo si patus parayo. Wo en Abar Kaaruien itu aitokéo a yaku en icua.

2 Timotius 1:12

Ampa'paan aku makua in Abar Kaaruien itu, akar sangkumku eng kawenduan am bui anio'. Taan aku ra'ica malawi', ampa'paan kailekanku si Apo' Yesus si paémanenku. Émanenku Sia awéan kawasa en tuméir in tawoien si aitoké-Na a yaku akar asi endo kaka'puan ing kayo'baan.

2 Timotius 1:16

Taan wayake' si Onesiforus si ra'ica taniitu. Pangilekenku wosama' si Casuruan méé mai ing kaupusan-Na a si Onesiforus wo sé pamaléna, ampa'paan sia tatap mengéma-ngéma' yaku arui. Sia ka'i ra'ica malawi' mengaai a yaku, mandé ka'i aku am bui.

2 Timotius 1:8

Anaé, ico ra'ica toro malawi' masairi in andumoro' i Apo'ta Yesus. Ico ka'i ra'ica toro malawi' mangaku sa aku karapimu ampa'paan aku intarépé' am bui. Yaku am bui ampa'paan maselewir a si Yesus Kristus. Ico ka'i musti sumangkum in okoi tanu yaku ampa'paan mengakua in Abar Kaaruien andumoro' i Yesus Kristus. An tutuw ko sumangkum in okoi, tantu si Amang Kasuruan méé mai kaketeran ai co.

Ibrani 4:12

En Taar i Amang Kasuruan itu menonou wo makakawasa. Wo en Taar itu ilumébé mai ing katelew in sa'bel rua telewa, ro'na tumopok rarem keli akar tumané i mu'kur wo e roh, wunak wo wuku-wuku in du'i, wo ro'na kailekan-Na waya sé an untep im bewerot wo im paaté-atén é tou.

1 Petrus 4:16

Taan sa kamu okoien ampa'paan tou Krésten, kamu ra'ica toro malawi'. Aweso taré kamu rumayo wo sumiri' si Amang Kasuruan ampa'paan kamu patuulen makiit si Kristus.