Roma 1:1 - En Taar Weru a nunuwu' é Tontemboan

¹ En surat anio' a yaku owo, Paulus. Yaku anio' ata i Kristus Yesus si tinowao mamuali ruru'du'an-Na wo si sinisiro eng kumua in Abar Kaaruien i Amang Kasuruan.

Roma 1:1 ပူးပေါင်းရင်းမြစ်များ

Markus 1:14

Kekawus i Yohanes Mabaptis tinangka', si Yesus mai ang Galilea wo kumua in Abar Kaaruien i Amang Kasuruan.

Yohanes 12:26

Si séike' en sumelewir Yaku musti kumiit Yaku. Wo am bisake' en angéan-Ku, am bitu ka'i awéan si maselewir Yaku. Si séi e maselewir Yaku sia siriin oka i Amang-Ku.”

Yohanes 15:15

Kamu ra'io ka'i tuulen-Ku ata, ampa'paan ra'ica kailekan i ata sapa en émaan i tuangna. Taan kamu patuulen-Ku kara-karapi, ampa'paan aicua-Kuo waya ai camu sapa-sapake' sé lininga-Kuo asi Amang-Ku.

Yohanes 15:20

Ta'néieno mangé sapa sé aicua-Kuo ai camu: Si esa ata ra'ica lumébémai wo si tuangna. Sa séra imokoio Yaku, séra ka'i mokoi oka icamu. Sa émaan éra en taar-Ku, émaan éra oka ka'i sé aicua miow.

Kisah Para Rasul 13:9

Taan si Saulus si pengatuulen ka'i Paulus, kinawasa i Roh Le'nas. Téintengenna si masihir itu,

Kisah Para Rasul 20:24

Taan ra'io pandungenku eng katouanku, asalo ro'na lekepenku en tawoien si aiwéé i Apo' Yesus a yaku eng kumua in Abar Kaaruien andumoro' in upus aitambér i Amang Kasuruan a sé cita in tou.

Kisah Para Rasul 21:40

Wo wéanna kaloasan a si Paulus e rumoma'. Si Paulus mangé tumulung an daran wo suméin ing kama a sé tou keli itu. An tutuw é tou imeneso, sia tumo'tolo rumoma' ai séra maké i nunuwu' é Ibrani, icuana:

Kisah Para Rasul 22:21

Taan icua i Casuruan a yaku, ‘Mangém, iru'du'-Ku oka ko mangé tumayang asi tampa anio' wo mangé a sé bangsa ra'ica Yahudi.’ ”

Kisah Para Rasul 22:7

Wo aku makala'us icare'ba an tana' wo kalingaanku awéan suara makua in tana'i, ‘Saulus, Saulus, kéitu réén ko maoko-okoi Yaku?’

Kisah Para Rasul 26:1

Wo icua i colano Agripa a si Paulus, “Intarépé', wéanku kaloasan ko e rumoma' e méla in owakmu.” Wo si Paulus méé tuus mangkai ing kamana wo kumua,

Kisah Para Rasul 26:14

Pakasa kami icarepa an tana'. Wo kalingaanku awéan suara makua mai a yaku maké i nunuwu' é Ibrani tana'i, ‘Saulus, Saulus, kéitu réén ko maoko-okoi Yaku? Ico imokoio in owakmu in esa sa ko ra'ica mento' masundur Yaku si makakawasa ico.’

Kisah Para Rasul 27:23

Ampa'paan, kawengi si Amang Kasuruan si paapo'anku wo si makaanu yaku, rumu'du' mai si malaékat-Na mai tumulung an duruku.

Kisah Para Rasul 9:15

Taan icua i Casuruan a si Ananias, “Mangéo ko! Sinisir-Kuo si tou itu e mamuali ata-Ku eng kumua in Abar Kaaruien andumoro' Yaku a sé bangsa walina, a sé kolano wo ka'i a sé tou Israel.

Roma 1:16

Yaku ra'ica malawi' mengakua in Abar Kaaruien andumoro' i Yesus Kristus itu, ampa'paan en Abar itu awéan kaketeran i Amang Kasuruan en lumowir im pakasa sé tou maéman; kataré-taré sé tou Yahudi wo ka'i sé tou walina.

Roma 1:5

Wo ampa'paano i Yesus Kristus ituo, si Amang Kasuruan imééo mai ing kamang a yaku mamuali ruru'du'an e makin waya sé tou ang kayo'baan wosama' séra maéman wo le'tek a si Yesus Kristus. Émaanku waya en itu, wosama' e ngaran i Yesus Kristus iparayo-rayo wo pasiri-siriin.

Roma 1:9

Kamu ipenomba-nombayangku wo si Amang Kasuruano en sairi sapaoka aku uli-ulit mengasombayang torona miow. Siao si Amang Kasuruan si pengaselewiranku ang karapi in lekep en até an tutuwku mengakua in Abar Kaaruien andumoro' i Toyaang-Na.

Roma 11:13

Taan intarépé' icuaku ai camu é bangsa ra'ica Yahudi: Yaku ayutusai mamuali ruru'du'an i Apo' Yesus eng kumua in Abar Kaaruien a sé tou ra'ica Yahudi. Wo anggapenku en tawoien itu patus irayo.

Roma 15:16

Yaku mamuali ata maselewir a si Kristus Yesus e mengakua in Abar Kaaruien andumoro' i Yesus Kristus a sé tou ra'ica Yahudi. En tawoienku tanu in tawoien é imam si mengawéé i raragés, ampa'paan aku makawali sé tou ra'ica Yahudi a si Amang Kasuruan wosama' séra teriman-Na tanu raragés si casalé'-Na wo si line'naso i Roh Le'nas.

Roma 15:29

Kailekanku, sa aku mangé meta'up ang karapi miow, tantu paalianku oka mangé ai camu keli kamang i Kristus.

Roma 16:18

Ampa'paan sé tou tanu siitu ra'ica matawoi sumelewir si Kristus Apo'ta, taan séra matawoi asalo makiit ing kasalé'an éra in esa. Séra maroma' mapaké i roroma' matawér wo nunuwu' sé manam palingan, akar séra imuwako sé tou sama' en até.

Roma 16:25

Irayoo mangé si Amang Kasuruan! Siao e ro'na méma' im paémanen iow makaketer tanu en aituru' an Abar Kaaruien andumoro' i Yesus Kristus si pakua-kuaku. En Abar Kaaruien itu pengakuaku kiit in aituru' i Amang Kasuruan si paene-enep-Na tumo'tolai indior.

1 Korintus 1:1

En surat anio' a yaku owo Paulus, si tinowao mamuali ruru'du'- an i Yesus Kristus kumiit ing kasalé'an i Amang Kasuruan. Wo en surat anio' aipaticku wo si Sostenes, poowta an esa paémanen.

1 Korintus 9:1

Poo-poow, yaku anio' tou ra'ica pakakawasaan é tou walina. Yaku ruru'du'an i Yesus, ampa'paan aku isuméréo in owak i Yesus Apo'ta, wo ka'i ampa'paan icamu ituo em buéna im pinatawoiku torona i Casuruan.

2 Korintus 1:1

En surat anio' a yaku owo, Paulus si mamuali ruru'du'an i Yesus Kristus kumiit ing kasalé'an i Amang Kasuruan. En surat anio' aipaticku mewali-wali wo si Timotius poowta an esa paémanen. En surat anio' aicirim ami a sé jamaat i Amang Kasuruan ang Korintus, wo ka'i a sé tou le'nas an Akhaya.

2 Korintus 11:5

Yaku uli-ulit ra'ica mendam lébé wawa' wo sé ruru'du'- an wangko' itu.

2 Korintus 11:7

An tutuwku makua in Abar Kaaruien i Amang Kasuruan ai camu, yaku ra'ica imangilek ongkos ai camu mandé waya'ke' im pira. Wo in taniitu iwawa'ku en owakku e rumangka' icamu. Meséa' réén sé niéma'ku itu? Tantu ra'ica!

2 Korintus 12:11

Yaku rumayoo in owakku in esa tanuoka sé tou bodok. Taan kamuo sé ilumesé' akar aku méma' tanu siitu. En ulitna icamuo si musti mengarayo yaku tanu siitu. Ampa'paan mandé ka'i aku anio' ipakua é tou ra'ica makailek in sapa-sapa, taan am baya-waya yaku ra'ica kaindoan é ruru'du'an wangko' itu.

2 Korintus 2:12

An tutuwku icateka'o mangé an Troas eng kumua in Abar Kaaruien andumoro' i Yesus Kristus, kinaséréankuo sapaoka si Amang Kasuruan imuka'o in lalan a yaku en sumelewir am bitu.

2 Korintus 4:5

En Abar si pakua ami ra'ica andumoro' in owak ami in esa. En Abar itu andumoro' i Yesus Kristus si Apo' é pakasa in tou. Wo icami asaloke' imamuali tanu ata en sumelewir icamu kumiit ing kasalé'an i Yesus.

Galatia 1:1

En surat anio' a yaku owo Paulus. Yaku mamuali ruru'du'an, ra'ica airu'du' é tou wo ra'ica ka'i niangkai i esa tou. Taan aku mamuali ruru'du'an ampa'paan i Yesus Kristus wo si Amang Kasuruan, Amangta, si tumou sumawel si Yesus an uner é tou imaté.

Efesus 1:1

En surat anio' a yaku owo Paulus, si mamuali ruru'du'an i Kristus Yesus kumiit ing kasalé'an i Amang Kasuruan. En surat anio' aipaticku ai camu tou le'nas an Efesus, sé le'tek maéman a si Kristus Yesus.

Efesus 1:13

Taniitu ka'i camu tou ra'ica Yahudi sé lumingao in sususuien wutul i Amang Kasuruan, siituo en Abar Kaaruien si mengawéé ing kalowiran ai camu. Wo an tutuw iow maémano a si Kristus, tinerimao miow e Roh Le'nas si aijanji-Na tanu tuus kamu imamualio tou-Na.

Efesus 4:11

Wo Siao en tumambérai ing kamang a sé tou. Awéan tou sé aitantu-Na mamuali ruru'du'an, mamuali nabi, mamuali tou mengakua in Abar Kaaruien andumoro' i Yesus Kristus, mamuali gembala é jamaat wo ka'i guru.

Filipi 1:1

En surat anio' a yaku owo Paulus wo si Timotius ata-ata i Kristus Yesus. Icirimku en surat anio' a sé pakasa in tou le'nas sé meesao wo si Yesus Kristus an Filipi, icauntep sé tou mengatilik sé jamaat wo sé maselewir an jamaat.

Filipi 2:11

wo séra im baya mangaku sapaoka si Yesus Kristus itu Kasuruan. Wo in taniitu, si Amang Kasuruan Amangta em parayo wo pasiriin.

Kolose 1:1

En surat anio' a yaku owo Paulus si mamuali ruru'du'an i Kristus Yesus kumiit ing kasalé'an i Amang Kasuruan wo ka'i asi Timotius poowta.

Kolose 1:25

Yaku imamualio tou si mengaselewir sé jamaat itu ampa'paan aku tinokéan i Amang Kasuruan in tawoien eng kumua im pakasa in Taar-Na ai camu.

1 Tesalonika 2:2

Kailekan iow ka'i, an tutuw ami ra'ipé' mai ai camu, kami niokoio wo aiséroo an Filipi. Taan mandé ka'i in taniitu kami tinawango i Amang Kasuruan wosama' kami ra'ica wana eng kaindé'an eng kumua in Abar Kaaruien-Na ai camu.

1 Tesalonika 2:8

Ampa'paan ing kaupusan ami ai camu, akar kami arui eng kumua in Abar Kaaruien i Amang Kasuruan ai camu. Wo ra'ica siituke,' kami ka'i arui e méé ing katouan ami ai camu, ampa'paan kamu uli-ulit icaupus ami.

1 Tesalonika 2:9

Poo-poow, tantu kata'néiané' miow tambisa kami rumaméji menawo-nawoi endo wo em bengi en tumanggong ing kaperluan ang katouan ami in esa, wosama' kami ra'ica méé pamuléngen an esaan angé ai camu an tutuw ami makua in Abar Kaaruien i Amang Kasuruan ai camu.

1 Timotius 1:1

En surat anio' a yaku owo Paulus, si mamualio ruru'du'an i Kristus Yesus kumiit im perénta i Amang Kasuruan Si Lumolowirta wo si Kristus Yesus si paarapenta.

1 Timotius 2:7

Siituo imangémai aku sinisir i Amang Kasuruan mamuali ruru'du'an-Na e mangé a sé tou ra'ica Yahudi eng kumua in abar andumoro' im paémanen wutul. Pakasa sé aicuaku anio' ulit! Yaku ra'ica matowo.

2 Timotius 1:11

Sinisir i Amang Kasuruan aku mamuali ruru'du'an-Na wo guru eng kumua in Abar Kaaruien andumoro' i Yesus Kristus a sé tou.

Titus 1:1

En surat anio' a yaku owo, Paulus. Yaku anio' ata i Amang Kasuruan wo ruru'du'an i Yesus Kristus. Yaku ayutus en tumawang sé tou sinisiro i Amang Kasuruan wosama' em paémanen éra makaketer wo ro'na makailek in sususuien wutul. En sususuien itu en tumawang iséra tumambisa menonou mengaapo' a si Amang Kasuruan.

Ibrani 5:4

Wo ra'ica wana esa tou ka'i mangkai in owakna in esa mamuali imam wangko', taan en tou mamuali imam wangko' sa sia towan i Amang Kasuruan kaputé i Harun.

Ibrani 7:26

Anaé, si Yesus ituo si Imam Wangko' si paperlunta. Sia itu le'nas, Sia ra'ica wana kaséaan wo ra'ica wana e ro'na méé kaséaan. Sia aitané asé tou sé iméma' ing kamesé-meséaan, wo niangkai angé asi tampa pasiri-siriin an sorga.

Yakobus 1:1

Siri' a yaku owo Yakobus, ata i Amang Kasuruan wo i Apo' Yesus Kristus. Aipaticku en surat anio' a sé sangapulu' rua suku Israel am panangkéian sé maémano a si Yesus Kristus.

1 Petrus 4:17

Ampa'paan intarépé' an témponao pakasa in tou akimen i Amang Kasuruan wo eng kataré akimen-Na, sé tou-Na in esa. Wo sa kita sé tou-Na eng kataré akimen-Na, tambisa réén e mamuali sa a sé tou sé ra'ica maéman in Abar Kaaruien-Na?

2 Petrus 1:1

En surat anio' a yaku owo, Simon Petrus. Yaku anio' ata wo ruru'du'an i Yesus Kristus. Ipaticku en surat anio' ai camu sé maémano a si Yesus Kristus kaputé ami. Si Yesus Kristus itu Amang Kasuruan wo Lumolowirta. Sia iméma' icamu maéman ampa'paan si pengaémaan-Na wutul wo ra'ica marapit.

Yudas 1:1

Siri' a yaku owo, Yudas. Yaku anio' ata i Yesus Kristus si mepoow wo si Yakobus. En surat anio' aicirim a sé tou sé tinowa i Amang Kasuruan sé icaupus-Na keli wo ka'i sé pakatéiran-Na e mamuali tou i Yesus Kristus.

Wahyu 1:1

An untep ing kitap anio' aipatic andumoro' sé kamamualian sé makala'us mamuali. Sé kamamualian itu aituru'o i Amang Kasuruan a si Yesus Kristus wosama' ro'na ituru' i Yesus a sé ata-Na. Kekawus in itu yutus i Yesus si malaékat-Na e maai a si ata-Na Yohanes en sumisil sé kamamualian itu.

Wahyu 22:6

Kekawus in itu, si malaékat itu kumua a yaku, “Sé aicuaku anio' ro'na percayan wo wutul. Wo si Amang Kasuruan si mééo i Roh-Na a sé nabi, ayutus-Nao si malaékat en tumuru' a sé ata-Na sapa sé ra'io uré mamuali sa.”

Wahyu 22:9

Taan icua i malaékat itu a yaku, “Tioo méma' taniitu! Yaku asaloke' ata, kaputému wo kaputé é poo-poowmu an esa paémanen, sé nabi wo pakasa in tou sé makiit sapa sé aipatico ang kitap anio'. Apoono mangé si Amang Kasuruan.”