Matius 5:30 - En Taar Weru a nunuwu' é Tontemboan

³⁰ Sa eng kamamu kakan méma'o ico meséa', pokoleno mio' wo tiya'o, ampa'paan lébé loor ko kainaan esa kama wo taré awéan rua kama taan pakasa en owakmu yuntep an api ra'ica mape'de-pe'del.

Matius 5:30 ပူးပေါင်းရင်းမြစ်များ

Matius 11:6

Wo pakakamangen sé tou sé ra'ica icumélong Yaku.”

Matius 13:21

Taan en itu ra'ica imaa'mut sama' wo ra'ica itumang uré. Sa séra meta'up ing kasusaan kuma'pa in okoi ampa'paan in taar itu, séra makala'us tumela'u im paémanen itu.

Matius 16:23

Wo si Yesus suméléng wo kumua a si Petrus, “Tumayango ko é sétang! Icoo si esaan watu masangkil Yaku, ampa'paan ico ra'ica mawerot in sapa em paweroten i Amang Kasuruan, taan sapa em paweroten é tou.”

Matius 17:27

Taniitu ka'i wo icita, kita ro'nake' ra'ica mér im pajak im Balé Le'nas. Taan, wosama' kita ra'ica mamuali watu pasangkilan é tou matagi im pajak im Balé Le'nas, aweso taré ko mangéo mesi sera' an lour, si sera' kataré pinesimu, indonmu wo wukaan em ba'ba'na wo kaséréanmu oka roit epat dirham. Indono mio' en doit itu wo mangéo iwéé a sé tou matagi im pajak em bér im pajakta in dua.”

Matius 18:8

Sa eng kamamu esa kuma'pa eng kécéimu esa iméma' ico meséa', pokolen wo itiya'o eng kama kuma'pa eng kécéi itu! Aweso taré ko mandé waya oka in esa kama kuma'pa esa kécéi taan tumerima ing katouan akar ing kauré-uré, wotaré ico rua kama wo rua kécéi taan yuntep an api si ra'ica mape'de-pe'del akar ing kauré-uré.

Matius 22:13

Wo icua i colano a sé atana, ‘Wa'keseno eng kécéi wo eng kama i tou itu wo iwangkilo mangé sia an tampa riréimbeng. A mangé mbitu kalingaan oka en amé' wo eng kare'ket im baang.’

Matius 25:20

Wo mai si ata tinokéan lima talenta wo isarakanna a si tuangna sangapulu' talenta. Wo icuana a si tuangna, ‘Tuang, yaku tinokéan i tuang lima talenta, sérén i tuang en untungku lima talenta.’

Matius 26:31

Wo icua i Yesus a sé murit-Na, “Asi wengike' anio' icamu im baya tumela'u oka Yaku. Ampa'paan ang Kitap Le'nas aipatico in tana'i, ‘Patén-Ku oka si gembala, wo sé domba itu icasera-serar oka.’

Matius 5:22

Taan icua-Ku ai camu, si séi si mae'bow a si poowna musti ukumen. Wo si séi e mengawa'ba' si poowna, musti isaru' an dior é Mahkamah Agama. Wo si séi ka'i e makua si poowna bodok, sia patus itiya' an api ra'ica mape'de-pe'del.

Matius 5:29

Sa em berenmu kakan méma'o ico meséa', tu'iceno wo tiya'o mio'! Ampa'paan aweso taré ko kainaan esa weren wo taré awéan rua weren taan pakasa en owakmu yuntep an api ra'ica mape'de-pe'del.

Markus 9:43

Sa eng kamamu esa iméma' ico ang kamesé-meséaan, pokoleno mio', ampa'paan aweso taré ko mandé wayaoka in esa kama tumerima ing katouan akar ing kauré-uré an sorga, wotaré awéan rua kama taan ko aitiya'ke' a naraka, an untep in api si ra'ica mape'de-pe'del. [

Lukas 12:5

Intarépé' icua-Ku ai camu andumoro' si séi e musti caindé' miow. Si musti caindé' miow wayake' si Amang Kasuruan! Ampa'paan Sia awéan kawasa e maté in owak é tou wo ka'i awéan kawasa en tuméndél i mu'kur é tou an api si ra'ica mape'de-pe'del akar ing kauré-uré. Anaé, icua-Ku ai camu, wayake' si Amang Kasuruan e musti caindé' miow.

Lukas 17:2

Sa si tou itu tumawér esaan asé tou sé ra'ipé' keter em paémanen anio' akar méma' ing kamesé-meséaan, aweso taré eng kolot i tou itu wa'kesan im batu wangker wo mangé iwangkil an ta'sic.

Roma 9:33

Wéanio' rékén sumama-sama', tanu in aipatic ang Kitap Le'nas tana'i, “Aiweta'-Kuo ang kuntung Sion esa watu e méma' sé tou icasangkil, si esa watu wangker si méma' oka sé tou icalepok. Taan si séi e maéman a si Casuruan, ra'ica ipapalawi'.”

1 Korintus 8:13

Anaé, sa eng kakanen si ayumpero a sé opo-opo' itu iméma'ke taré si poowku esa paémanen méma' ing kamesé-meséaan, ra'io kiimku ka'i kuman in sama'na, sa ampa'paan yaku akar si poowku esa paémanen lumepok ang kamesé-meséaan. En itu meputéo aku mamualike' watu pasangkilan ai sia.

Galatia 5:11

Poo-poow, awéan sé tou makua sapaoka aku masusuié' andumoro' in sunat a sé tou ra'ica Yahudi wosama' séra musti sunaten iciit in ukum Torat. Taan em pakua éra itu ra'ica wutul. Sa em pasusuiku tanu siitu, yaku ra'ica okoien é tou Yahudi. Wo sa aku masusuié' andumoro' in sunat, ra'ica iméma' sé tou Yahudi mae'bow mandé ka'i aku masusui andumoro' ing kepaté i Yesus ang kayu salip.

1 Petrus 2:8

Wo awéan ka'i en aipatic, “Si watu itu mamuali watu pasangkilan akar icawangkur.” Eng kaangéanna séra casangkil asi watu itu akar cawangkur ampa'paan séra ra'ica maéman wo ra'ica makiit in Taar i Amang Kasuruan, tanu siituo en aitantu mai i Amang Kasuruan ai séra.