Matius 5:19 - En Taar Weru a nunuwu' é Tontemboan

¹⁹ Ampa'paan in ituo si séike' e misi in esaanke' perénta an ukum Torat mandé ka'i en itu si tumeki-tekic, wo en itu isusuina a sé tou walina, sia lumukut oka an tampa si mawawa-wawa' ang Kakolanoan in Sorga. Taan si séi e mengaéma' wo ipasusuina waya em perénta an ukum Torat, sia lumukut oka an tampa si rumangka-rangka' ang Kakolanoan in Sorga.

Matius 5:19 ပူးပေါင်းရင်းမြစ်များ

Matius 11:11

En ulitna icua-Ku mangé ai camu, an uner é tou si aitou é wéwéné ra'ica wana en lumébémai eng kawangko' wo si Yohanes Mabaptis. Taan sé tou ipawawa-wawa' ang Kakolanoan in Sorga, lumébémai eng kawangko' wo si Yohanes Mabaptis.

Matius 19:28

Icua i Yesus ai séra, “En ulitna icua-Ku mangé ai camu, ang kayo'baan weru, si Toyaang i Tou lumukut oka am palukutan-Na iparayo-rayo wo pasiri-siriin e makim waya sé tou. An tutuw itu, kamu im baya é murit-Ku lumukut oka ka'i asi sangapulu' rua palukutan pasiri-siriin mewali-wali wo Yaku e makim sé sangapulu' rua suku é Israel.

Matius 20:26

Taan kamu ra'ica toro mengaéma' tanu siitu! Si séike' e masalé' mamuali tou wangko', aweso taré' sia sumelewir icamu.

Matius 28:20

Wo susuiano mangé séra wosama' émaan éra waya sé aiperénta-Ku ai camu. Pena'né-na'néieno mangé, Yaku kasake' ang karapi miow akar ing kaka'puan ing kayo'baan.”

Lukas 1:15

Sia mamuali oka tou wangko' an dior i Amang Kasuruan. Ang kauréna menonou ra'ica kawisa melep in anggor kuma'pa melep in elepen mengalangu. Sia kawasan oka i Roh Le'nas tumo'tolke' mai sia am poot i inangna.

Lukas 11:42

Icawangkuro mio' kamu sé tou Farisi! Ampa'paan ipengawéé miow a si Amang Kasuruan sangapepulu' wuéna in tinanem iow tanumai salasi, inggu wo pakasa in lalaina in tinanem pengaséndéén sé membam-balinaan. Taan sé pengaémaan iow marapitke' a sé tou walina wo ka'i ra'ica mengaupus a si Amang Kasuruan. En ulitna si musti pengaémaan iow, tioo marapit a sé tou walina wo mengaupus angé a si Amang Kasuruan wo tioo ilupa miow e mengaéma' sé walina.

Lukas 9:48

Icua-Na a sé murit-Na, “Si séi en sumungkul si toyaang teké' anio' ang karapi in arui en até ampa'paan makiit Yaku, sia sumungkulo Yaku. Wo si tou isumungkul Yaku, sia isumungkulo si Amang Kasuruan si imutus Yaku. Anaé, si séi si mawerot in owakna tou wawa', siao itu si tou iparangka-rangka'.”

Kisah Para Rasul 1:1

Tuang Teofilus, ang kitapku kataré, aipaticku andumoro' im pakasa sé niéma' wo sé aisusui i Yesus,

Roma 3:8

Ampa'paan in ituo awéan tou makua, “Mayoo émaanta sé léwo', wosama' eng kaloo-looran kaséré-séréan!” Mémang wutul awéan sé tou mengawuruk i ngaranta sapaoka icitao en icumua in itu. Sé tou tanu siitu patus in ukumen i Amang Kasuruan.

Roma 6:1

Sa taniitu, sapapé' en icuata intarépé'? Ro'napé' réén kita mengéma-ngéma' ing kamesé-meséaan wosama' en upus aitambér i Amang Kasuruan mengawe-ngawes ai cita?

Roma 6:15

Anaé, sapa en icuata? Ro'napé' réén kita mengéma-ngéma' ing kamesé-meséaan ampa'paan kita ra'io pakakawasan in ukum Torat wo ampa'paan kita intarépé' menonouo an upus aitambér i Amang Kasuruan? Tantu ra'ica!

1 Timotius 6:11

Taan ko é Timotius, ico tou i Amang Kasuruan, tumayango mangé ko asé pakasa ing kaléwo-léwo'an. Rumaméjio mangé ko kumiit sé anio': tioo mengarapit, mengaapo' mangé makiit ing kasalé'an-Na, le'tek maéman a si Yesus, mengaupus sé kakélé tou, talesen mengasaru ing kasusaan wo ko'kos en até.

Titus 3:8

Pakasa e nunuwu' sé aicuaku anio' wutul wo loor wo awéan torona a sé pakasa in tou. Icasalé'ku icuamu waya en sususuien itu a sé tou maéman a si Amang Kasuruan wosama' séra uli-ulit rumaméji tumawoi loor.

1 Petrus 5:4

Wo an tutuw i Yesus si Gembala Wangko' imayo sumawel, kamu makéré oka mahkota a rarayo wo in sisiri' ai Sia. Siituo e mahkota si ra'ica materi.

1 Yohanes 3:4

Wo si tou mengaéma' ing kamesé-meséaan, sia ka'i sumunduro im perénta i Amang Kasuruan. Ampa'paan sa sumundur im perénta-Na, en itu kamesé-meséaan.

Wahyu 2:20

Taan iséro'-Ku kamu, ampa'paan aiwayake' miow si esa wéwéné makangaran Izebel. Si wéwéné itu matuul in owakna nabi i Amang Kasuruan, taan sia masusui wo mengasélé'kow sé ata-Ku mengabersina wo mengakan ing kakanen sé ayumpero a sé opo-opo'.