“Sa kamu mengapuasa, tioo en amo miow susa tanu sé tou punek. En amo éra mapa in susa kéndoon, wosama' sérén é tou sapaoka séra ang karoro'an i mapuasa. En ulitna icua-Ku mangé ai camu, siituo en laasa si kinéréano éra.
Anaé, sa kamu méé sapa-sapake' en tumawang sé tou lengéi, tioo ipakua-kua tanu sé pengaémaan é tou punek am balé-walé paapo'an é agama Yahudi wo an lala-lalan wosama' séra irayo é tou. En ulitna icua-Ku mangé ai camu, séra makéréo in laasa éra.
Taan sa kamu sumombayang, muntepo ang kamar iow, palenano em papalen wo sumombayango mangé a si Amang iow si an tampa caenep. Wo in taniitu, si Amang iow si makaséré mai sé caenep, suli'an-Na oka sapa e niéma' miow itu.
Taan icua i Abraham, ‘Éi toyaangku, ta'néieno mangé sumama-sama', an tutuw ko menonoué', ico imakéréo waya sé loor taan karu' si Lazarus makéréke' waya sé ra'ica loor. Intarépé' sia makéréo im pangiboran am bia'i wo ico mawendu keli.
Ampa'paan si Amang mééo mai ing kawasa a Yaku e merénta waya sé tou, wosama' Aku ro'na méé ing katouan akar ing kauré-uré ai séra sé aisarakano i Amang a Yaku.
Taan intarépé' kailekanta sapaoka pakasa sé aipatic an ukum Torat, torona é tou sé menonou pakakawasan in ukum Torat. Wo in taniitu ra'ica wana mandé esake' tou e ro'na méé alasan sapaoka en owakna wutul, anaé pakasa en tou ang kayo'baan meséa' an dior i Amang Kasuruan.
Tantu émaan-Na! Ampa'paan si Amang Kasuruan itu wutul, wo pakasa en tou kotowo. Tanu en aipatic ang Kitap Le'nas andumoro' i Amang Kasuruan in tana'i, “Pakasa sé aicua-Mu wutul. An tutuw Ko in akimen, tantu Ico muntung.”