Matius 13:11 - En Taar Weru a nunuwu' é Tontemboan

¹¹ Isowat i Yesus, “Si Amang Kasuruan imééo mai ing kamang tatambér ai camu e makailek in sususuien sé icaenepé' andumoro' ing Kakolanoan in Sorga, taan ai séra ra'ica.

Matius 13:11 ပူးပေါင်းရင်းမြစ်များ

Matius 13:10

Kekawus in itu, sé murit i Yesus mai wo mamuéi ai Sia, “Guru, kéitu réén si Guru masusui ai séra mapaké in andéan?”

Matius 16:17

Icua i Yesus ai sia, “Pakakamangen ko é Simon toyaang i Yunus ampa'paan ra'ica sé tou en icumua in itu ai co, taan si Amang-Ku an sorga.

Matius 19:11

Taan icua i Yesus ai séra, “Ra'ica pakasa sé tou makawoo tumerima in sususuien itu. Wayake' sé tou aitantuo mai i Amang Kasuruan.

Matius 20:23

Icua i Yesus ai séra, “Mémang kamu melep oka asi paelepan si musti elepen-Ku. Taan andumoro' in lumukut ang kakan wo ang ka'biri-Ku, Yaku ra'ica wana hak en tumantu ampa'paan sé palukutan itu aitu'tulo i Amang-Ku a sé tou si aitantu-Nao.”

Markus 10:40

Taan andumoro' si séi en lumukut ang kakan wo ang ka'biri-Ku, Yaku ra'ica wana hak en tumantu in itu. En tampa itu tinu'tulo i Amang Kasuruan a sé tou sé aitantu-Nao.”

Markus 4:11

Wo isowat-Na, “Sé sususuien icaenep andumoro' ing Kakolanoan i Amang Kasuruan aicua-Kuo ai camu. Taan a sé tou walina ipakua-Ku maké in andéan,

Lukas 8:10

Wo icua-Na, “Kamu intarépé' winéan i Amang Kasuruan kamang tatambér e makailek andumoro' ing Kakolanoan in Sorga. Taan a sé tou walina andumoro' ing Kakolanoan in Sorga itu, icua-Ku maké in andéan wosama', ‘Mandé sinéré éra, taan ra'ica kaangéan éra sapa en sinéré, wo mandé ka'i lininga éra, taan ra'ica kaangéan éra sapa en lininga.’

Yohanes 6:65

Wo icua ka'i i Yesus, “Ampa'paan in ituo aicua-Kuo ai camu: Ra'ica wana mandé esake' tou e ro'na mai a Yaku sa kumiitke' ing kasalé'anna in esa. Si esa wo si esa tou ro'na mai a Yaku ampa'paano si Amang e méma' sia mai a Yaku.”

Yohanes 7:17

Sa si tou masalé' maéma' ing kasalé'an i Amang Kasuruan, kakailekanna oka en sususuien-Ku anio' asi Amang Kasuruan owo kuma'pa mai a Yaku owo in esa.

Kisah Para Rasul 16:14

Esaan angé ai séra, sé iluminga icami mapaar, awéan esa wéwéné makangaran Lidia. Sia ang kota Tiatira owo, sia mawangkér ing kaéng pares. Si Lidia anio' tou ra'ica Yahudi taan sia mengaapo' a si Amang Kasuruan. Wo an tutuw i Paulus mapaar andumoro' si Yesus, en aténa winuka' i Amang Kasuruan akar tinerimana sapa em ipakua i Paulus.

Roma 11:25

Poo-poow esa paémanen, icuaku ai camu sé icaenepé' wosama' kamu ra'ica matirayo. Si anioo em pawasan i Amang Kasuruan sé icaenepé' itu: Kelian sé tou Israel imamualio keté ro'kos taan séra mamuali taniitu ra'ica akar ing kauré-uré, taan akarke' i malekep eng kakelina é tou ra'ica Israel sé maéman a si Kristus sé aitantuo i Amang Kasuruan.

Roma 16:25

Irayoo mangé si Amang Kasuruan! Siao e ro'na méma' im paémanen iow makaketer tanu en aituru' an Abar Kaaruien andumoro' i Yesus Kristus si pakua-kuaku. En Abar Kaaruien itu pengakuaku kiit in aituru' i Amang Kasuruan si paene-enep-Na tumo'tolai indior.

1 Korintus 13:2

Mandé ka'i aku tinambéranai ing kamang eng kumua in taar i Amang Kasuruan, makailek im pakasa sé paene-enep, makaanuo waya ing kakailekan, wo makaanu im paémanen lumeke-lekep e ro'na méra ing kuntung, taan sa aku ra'ica mengaupus sé tou walina, yaku uli-ulit ra'ica wana torona.

1 Korintus 15:51

Wéé mio' sumama-sama' an dékén! Awéan sé icaenepé' en aicuaku ai camu: ra'ica pakasa icita e maté, taan en owakta im baya mawalina.

1 Korintus 2:14

Si tou ra'- ica pengaakinen i Roh i Amang Kasuruan, ra'ica mengaterima sé ipakua i Roh i Amang Kasuruan, ampa'paan paanggapenna sé ipakua i Roh itu ra'ica wana torona. Wo en itu ra'ica kaangéanna, ampa'paan wayake' si tou makaanu i Roh i Amang Kasuruan e ro'na makaangé andumoro' in itu.

1 Korintus 2:7

Sé ipakua ami itu kapinteran asi Amang Kasuruan owo. Eng kapinteran itu ra'ipé' kailekan é tou wo aicaenepé', taan en itu tinu'tulo i Amang Kasuruan an tutuw eng kayo'baan anio' ra'ipé' niéma' wosama' kéréanta em bagéan asi rarayo wo in sisiri'-Na.

1 Korintus 4:1

Poo-poow, anggapeno mai kami tou sé matawoi maselewirke' a si Kristus, sé tinokéan makua in abar andumoro' im pawasa-wasan i Amang Kasuruan en lumowir sé tou. Em pawasa-wa- san itu ra'ipé' kailekan é tou walina.

1 Korintus 4:7

Si séi réén iméma' icamu lumébémai wo sé tou walina? Awéan réén sé mamualio anu miow wo ra'ica asi Amang Kasuruan owo? Pakasa sé anu miow itu asi Amang Kasuruan owo, sa taniitu kéitu réén kamu marayo-rayo in owak tanuoka kéndo' sé mamualio anu miow itu ra'ica aiwéé i Amang Kasuruan?

Efesus 1:18

Isombayangku ka'i wosama' wukaan-Na mai en até miow akar kakailekan iow em paarapen si aiwéé-Na an tutuw iow tinowa-Na, wo akar kakailekan iow taloso wangko' eng kasiyaan im bagéan sé aitu'tul-Nao a sé tou le'nas.

Efesus 1:9

Intarépé' em pawasa-wasan itu aicua-Nao ai cita kumiit ing kasalé'an-Na, siituo si pawasan indior si pakaenepé' a sé tou. Wo em pawasa-wasan-Na itu pinusé'-Nao lekepen oka i Kristus.

Efesus 5:32

En sususuien andumoro' é mempenanaan anio', eng kaangéanna rarem keli. Em paangé- angénku tumuru' in ubungan i Kristus wo sé jamaat.

Efesus 6:19

Wo ipengasombayang angé ka'i aku, wosama' an tutuwku i rumoma' wéan i Amang Kasuruan aku nunuwu' isumoma, akar ra'io wana eng kaindé'anku ing kumua in Abar Kaaruien en andumoro' i Yesus Kristus. En Abar Kaaruien itu indior ra'ipé' aicua a sé pakasa en tou, taan intarépé' aicuao ai séra.

Kolose 2:2

Yaku rumaméji tanu siitu wosama' en até éra kaiboran wo meesa ang kaupusan akar séra makasiya' ang kakailekan andumoro' sé wutul wo uli-ulit maéman. Wo in taniitu kakailekan éra oka em pawasan i Amang Kasuruan sé indior icaenepé'. Em pawasan-Na itu tumuru' a si Kristus.

1 Timotius 3:16

Indior en sususuien wutul itu ra'ica kailekan é tou, taan intarépé' sé icaenep andumoro' in sususuien wutul sé ra'io cakua itu, winuka'o i Amang Kasuruan. Sé icaenep itu tana'i: “Si Yesus imayo wo mamualio tou, wo aituru' i Roh Le'nas sapaoka Sia itu wutul. Sia mapaturu'o in owak-Na a sé malaékat, wo en sisisilen andumoro' Sia itu icaseraro a sé bangsa. Wo Sia émanen é pakasa ing kayo'baan, wo Sia niangkaio mangé an sorga ang karapi i rarayo wo in sisiri'.”

1 Timotius 3:9

Séra musti menonou ang karapi in até weresi wo uli-ulit makiit in sususuien si aituru'o i Casuruan.

Yakobus 1:5

Sa awéan esaan ai camu mendam wayapé' im pira eng kapinteran asi Amang Kasuruan owo, aweso taré sia mangilek angé a si Amang Kasuruan. Wo énan-Na oka mai em pinangilek itu. Ampa'paan si Amang Kasuruan mengawéé a sé im pakasa in tou ang karapi ing kasamaan in até, ra'ica mengaimbo'.

1 Yohanes 2:20

Taan tinerimao miow e Roh Le'nas asi Yesus Kristus owo, ampa'paan in itu kamu im baya makaileko in sususuien wutul.

1 Yohanes 2:27

Wo andumoro' icamu in esa, si Casuruan imééo mai i Roh Le'nas eng kumawasa icamu wo akar intarépé' e Roh Le'nas itu awéané' ai camu. Anaé kamu ra'io sangali susuian é tou walina, ampa'paan kamu penusu-nusuian i Roh Le'nas andumoro' im pakasa in itu. Wo sapa en aisusui-Na itu wutul wo ra'ica towo. Tinerimao miow en sususuien itu ai Sia, ampa'paan in itu kamu musti menonou angé meesa wo si Kristus.