Matius 12:46 - En Taar Weru a nunuwu' é Tontemboan

⁴⁶ An tutuw i Yesus mapaaré' wo sé tou keli itu, si inang-Na wo sé mepoow wo i Sia mai am bitu. Séra makatulung ang kesot rumaméji meta'up wo Sia.

Matius 12:46 ပူးပေါင်းရင်းမြစ်များ

Matius 1:18

Tana'i en sisisilen andumoro' ing ketou i Yesus Kristus: Si Maria inang i Yesus, tinantuano kawéngen i Yusuf, taan an tutuw éra ra'ipé' icumawéng, si Maria maowa-owako ampa'paan ing kawasa i Roh Le'nas.

Matius 12:47

Wo icua i esa tou ai Sia, “Tuang, si inang wo sé mepoow wo si Tuang ang kesot. Séra rumaméji e meta'up wo si Tuang.”

Matius 13:55

Ra'ica réén Sia itu toyaang i bas ing kayu? Ra'ica réén si inang-Na si Maria wo sé mepoow wo Sia si Yakobus, si Yusuf, si Simon wo si Yudas?

Matius 2:11

Wo séra muntep am balé itu, sérén éra si Toyaang itu ang karapi i Maria inang-Na. Wo séra kumundu wo kumuru en sumiri' si Toyaang itu. Wukaan éra en tampa pengaémaan ing kasiyaan wo iwéé éra eng kasiyaan éra tanu raragés ai Sia tanumai mas, kamenyan wo mur.

Matius 2:20

Icua i malaékat itu ai sia, “Yusuf, tumooro! Indono si Toyaang itu wo si inang-Na wo maréngo sumawel an tana' Israel. Ampa'paan séra sé mawasa maté si Toyaang itu imatéo.”

Markus 2:21

Ra'ica wana esa tou en tumampal ing kaéng weru ang karai matu'a. Ampa'paan sa eng kaéng weru itu sumusut, ro'na kumésé' ing karai matu'a wo makawangkero eng késé'na.

Markus 6:3

Ra'ica réén Sia bas ing kayu, toyaang i Maria, mepoow wo si Yakobus, si Yoses, wo si Yudas wo si Simon? Wo ra'ica réén sé poo-poow-Na wéwéné mewali-wali wo icita am bia'i?” Wo icélong éra Sia.

Lukas 1:43

Si séi réén aku anio' akar si inang i Tuangku mai meta'up wo yaku?

Lukas 2:33

Kelinga i Yusuf wo si Maria sapa en aicua i Simeon andumoro' i Toyaang itu, séra mangaya-ngaya'ka'.

Lukas 2:34

Wo si Simeon sumombayang mangilek a si Amang Kasuruan wosama' méé mai ing kamang ai séra. Wo icuana a si Maria inang i Toyaang itu, “Maria, si Toyaang anio' aitantuo i Amang Kasuruan e mai mukum sé kelian tou Israel sé ra'ica maéman a si Casuruan wo mai lumowir kelian tou Israel sé maéman ai Sia. Wo si Toyaang anio' mamuali oka tuus tanu popokéi i Amang Kasuruan a sé tou iméma' ing kamesé-meséaan. Taan Sia icélong oka é tou keli.

Lukas 2:48

Wo an tutuw é matu'a-Na suméré Sia, séra mangaya'ka' wo icua i inang-Na ai Sia, “Toyaangku, kéitu réén-Ko iméma' tanu siitu ai cami? Si amang-Mu wo yaku ra'io makaaté in sama' maéré-éré Ico.”

Lukas 2:51

Wo si Yesus maréng a Nazaret mewali-wali wo sé matu'a-Na wo Sia menonou le'tek a sé matu'a-Na. Pakasa sé imamuali itu pakaéma'ke' i Maria an untep in aténa.

Lukas 8:10

Wo icua-Na, “Kamu intarépé' winéan i Amang Kasuruan kamang tatambér e makailek andumoro' ing Kakolanoan in Sorga. Taan a sé tou walina andumoro' ing Kakolanoan in Sorga itu, icua-Ku maké in andéan wosama', ‘Mandé sinéré éra, taan ra'ica kaangéan éra sapa en sinéré, wo mandé ka'i lininga éra, taan ra'ica kaangéan éra sapa en lininga.’

Yohanes 19:25

Wo an duru in salip i Yesus makatulung si inang-Na, wo si wéwéné poow i inang-Na, wo si Maria penanaan i Klopas, wo si Maria Magdalena.

Yohanes 2:1

Asi endo katelu awéan pésta kawéng ang Kana an sangkum ing Galilea. Wo si inang i Yesus mai am bitu.

Yohanes 2:12

Kumawus in itu si Yesus mangé ang Kapernaum mewali-wali wo si inang-Na, tua-tuari-Na tuama wo sé murit-Na. Séra mento' am bitu wayake' im pira ngando.

Yohanes 2:5

Taan icua i inang-Na a sé tou sé mengaselewir am pésta itu, “Émaano mangé sapa si aicua i Yesus ai camu.”

Yohanes 7:10

Taan kekawus é poo-poow i Yesus mangém an Yerusalem en tuma'néi in endo wangko' itu, si Yesus mangé ka'i ang karapi i maene-enep akar ra'ica kinailekan é tou.

Yohanes 7:3

Anaé, icua é poo-poow i Yesus ai Sia, “Lébé loor itela'u-Mu en tampa anio' wo Ko mangé an Yudea en tuma'néi in endo wangko', wosama' sé tou mengakiit ai Co ro'na suméré ka'i in tawoien sé émaan-Mu sa.

Yohanes 7:5

Aicua é poo-poow i Yesus in taniitu, ampa'paan séra in esa ka'i ra'ipé' mercaya sa Sia itu ayutus i Amang Kasuruan.

Kisah Para Rasul 1:14

Séra im baya le'tek mengali'us wo meesa en até mengasombayang. Séra mengasombayang mewali-wali wo sé piraan wéwéné ang karapi i Maria inang i Yesus wo sé poo-poow i Yesus.

1 Korintus 9:5

Ra'ica réén wana hak kami e makawali si penanaan ami esa paémanen eng kumiit ang karapi ami mangé sumelewir, kaputé im pinengaéma' é tuari i Apo' Yesus, wo sé ruru'du'an walina icauntep si Petrus?

Galatia 1:19

Taan ra'ica ipeta'upku sé ruru'du'an walina, yaku asalo meta'up wo si Yakobus, poow i Apo' Yesus.