Matius 11:23 - En Taar Weru a nunuwu' é Tontemboan

²³ Wo kamu sé tou ang Kapernaum, weroten iow réén sapaoka kamu angkaien oka akar an sorga? Ra'ica! Taan taré, itiya'-Na oka kamu a naraka! Sa eng kakaya'kaan si imamualio an uner iow itu niéma'-Ku an Sodom, tantu eng kota itu awéané' akar intarépé'.

Matius 11:23 ပူးပေါင်းရင်းမြစ်များ

Matius 10:15

En ulitna icua-Ku mangé ai camu, asi endo kaka'puan ing kayo'baan sé tou ang kota Sodom wo ang Gomora lébé porakai en ukumanna wo taré sé tou ang kota itu.”

Matius 16:18

Icua-Ku ka'i ai co: Ico si Petrus wo am bawo im batu karang anio' tooran-Ku oka sé jamaat-Ku wo ra'ica kawisa kawasan im papaté.

Matius 17:24

An tutuw i Yesus wo sé murit-Na icateka'o ang Kapernaum, wo mai sé matagi im pajak im Balé Le'nas mamuéi a si Petrus, “Si Gurumu mengawér im pajak im Balé Le'nas rua dirham kuma'pa ra'ica?”

Matius 4:13

Wo itela'u-Na e Nazaret wo mento' ang Kapernaum, an tembir in lour Galilea an sangkum in Zebulon wo Naftali.

Matius 8:5

An tutuw i Yesus muntep ang Kapernaum, mai si esa perwira meta'up wo Sia, wo mekiupus,

Lukas 10:15

Wo kamu sé tou ang kota Kapernaum, weroten iow réén sapaoka angkaien i Amang Kasuruan kamu akar an sorga? Ra'ica. Taan taré, itiya'-Na oka kamu an tampa é tou imaté.”

Lukas 14:11

Ampa'paan, si séike' mengarangka' in owak, sia iwawa' oka wo si séike' e mengawawa' in owakna, sia iparangka-rangka' oka.”

Lukas 16:23

An tampa é tou imaté si tou siya' itu ang karoro'an imawendu. Wo an tutuw sia kumanat angé, sérénna si Abraham an tampa tayang wo si Lazarus an duruna.

Lukas 4:23

Wo icua i Yesus ai séra, “Tantu icua oka miow a Yaku si andéan anio', ‘Éi dokter, samaano mio' en owak-Mu in esa.’ Icua miow in taniitu ampa'paan liningao miow sapaoka Aku iméma'o ing kakaya'kaan ang kota Kapernaum wo en itu musti émaan-Ku ka'i an doong-Ku in esa.”

Kisah Para Rasul 2:27

Ampa'paan ra'ica iwaya i Casuruan aku mento' melala'us ang kakawasaan im papaté, wo ra'ica iwaya i Casuruan en owak i Tou-Na Le'nas mawuruk an untep ing kubur.

Kisah Para Rasul 2:31

Ampa'paano in itu airiornao icumua sapa e mamuali oka sa. An tutuw itu aicuanao andumoro' si Mesias touen oka sumawel. Sia ra'ica iwaya i Amang Kasuruan kawasan im papaté wo en owak-Na ra'ica mawuruk.

Yudas 1:7

Taniitu ka'i eng kota Sodom wo eng Gomora wo sé kota an sangkumna. Sé tou a mangé mbitu mengaéma' sé meputé wo im pinengaéma' é malaékat itu, ampa'paan séra mengabersina wo maéma' ing kasalé'an in owak sé ra'ica loor. Ampa'paan in itu séra makéré in ukuman an api si ra'ica mape'de-pe'del akar ing kauré-uré, en itu mamuali popokéi a sé pakasa in tou.

Wahyu 1:18

wo Si Menonou. Yaku si matéo, taan intarépé' séréno Aku menonou, wo Aku menonou akar ing kauré-uré. Pakakulun-Ku eng kukusi' im papaté wo eng kakolanoan im papaté.

Wahyu 11:8

Wo e mayat éra ipakawaya oka an lalan ing kota wangker. Ang kota ituo si Casuruan éra aisalip. Ampa'paan ing kaléwo'an é tou, eng kota itu ro'na ipeputé tanu in Sodom kuma'pa Mesir.

Wahyu 20:13

Wo isarakan in ta'sic sé tou imaté an untepna, wo isarakan ka'i im papaté wo eng kakolanoan im papaté sé tou imaté an untepna. Wo séra si esa wo si esa akimen kiit sé pinengaéma' éra.

Wahyu 6:8

Wo kaséréanku esa kawayo kulo tina'. Wo si tou makasaké asi cawayo itu, e ngaranna ‘Papaté’, wo pakiiten ing kakolanoan im papaté. Séra in dua winéan kawasa e maté sé sangapeepat tou ang kayo'baan anio' ang karapi in sa'bel, ang karapi ing kaareman, ang karapi in sakit malawé, wo ang karapi é binatang léwo' sé ang kayo'baan.